Home -- Punjabi -- Perform a PLAY -- 055 (Innocent in jail 3)
!ڈرامے- ایناں نُوں اپنے بیلیاں لئی ادا کرو
بچیاں دے ادا کرن لئی ڈرامے
55. بے گناہ جیل وچ ۳
قید خانے دا بوہا زور نال بند ہویا۔ راکھے نے بوہے نوں جندرا ماریا تے ٹُر گیا۔ یوسف سلاخاں دے پیچھے بہہ گیا۔ کوئی غلطی نئیں کیتی! اوہنے کم تے چنگا کیتا پر ایسے وجہ توں اوہ قید وچ بیٹھا سی۔ کیہ تُسی ایہہ سمجھ سکدے ہو؟
یوسف نے سوچیا تے سوچدا ای رہیا۔
(پیچھے گیت جدوں اوہ سوچدا ہووے)
آپنے دماغ دی اکھ نال اوہنے آپنے بھراواں نوں ویکھیا۔ بڑے ورے لنگ گئے سن پئی اوہناں نے یوسف نوں کسے ہتھ مصر وچ ویچ دِتا سی۔ اوہناں نے اوہدے نال نفرت کیتی، بس ایس لئی کیوں جو خدا نے آکھیا سی پئی اوہ یوسف نوں اک وڈا حکمران بنائے گا۔
احرامِ مصر تے فرعوناں دی زمین وچ، فوطیفار اوہنوں غلام بنا کے لے آیا سی۔ یوسف آپنا کم چنگی طرح کردا ہوندا سی۔ فرعون دا افسر حیران ہویا؛ ایس تھوں پہلا ں اوہنوں ایڈا چنگا نوکر کدی نئیں سی ملیا۔ یوسف جیہڑا وی کم کردا اوہدے وچ کامیاب ہوندا۔ کدی کوئی کم غلط نہ ہویا۔ کیہ میَں تہانوں بھید دی گل دساں؟ خدا اوہدے نال سی تے اوہدی مدد کردا سی۔
فوطیفار نے اوہنوں آپنے گھر دا سارا اختیار دے دِتا تے سارے کھیتاں دی راکھی وی اوہدے سپرد کیتی۔ یوسف اعتبار دے قابل تے بہت سوہنا وی سی۔ فوطیفار دی بیوی نوں اوہ چنگا لگدا سی تے اوہ چاہندی سی پئی یوسف اوہدے نال خاوند وانگ رہوے۔
کیہ ایہہ ٹھیک اے؟ خدا دا حکم اے وے: تُوں زنا نہ کریں۔ ایہہ قنون اج وی موجود اے جس طرح پہلاں سی۔ یوسف نے خدا دی سُنی تے آپنے آپ نوں ایس بریائی تھوں بچا کے رکھیا۔
اک دِن فوطیفار دی بیوی نے یوسف نوں فیر توں آزمایا۔
تُسی کیہ کرو گے جے کوئی تہانوں آزمیش وچ پا کے بُرا کم کرن لئی آکھے؟ یوسف وانگ بنو: اوہ گناہ کرن دے بجائے دوڑ گیا۔ ایس عورت نے اوہدی پوشاک نوں پھڑ لیا تے کس کے پھڑی رکھیا، پر یوسف فیر وی اوتھوں نکل گیا تے آپنی جان بچاون لئی دوڑ گیا۔ اوہنے آپنے مالک دی بیوی نال گناہ نہ کرن دا فیصلہ کیتا۔ پر اوہ پریشان ہوئی تے یوسف اُتے الزام لاون دا طریقہ سوچن لگ پئی۔
جدوں اوس عورت دا خاوند کم توں مُڑ آیا تے اوہنے آپنے شوہر نوں دسیا پئی یوسف اوہدے کمرے وچ آیا سی تے تہاڈی تھاں لین دی کوشش کیتی۔ جدوں اوہنے رولا پایا تے یوسف دوڑ گیا تے آپنی پوشاک چھڈ گیا۔ ایہہ اوس عورت دا ثبوت سی۔
فوطیفار نے اوہدے جھوٹ اُتے یقین کر لیا تے اوہنوں یوسف اُتے بہت غصہ آیا۔ اوہنے اوسے ویلے اوہنوں قید وچ سُٹ دِتا۔
پر خدا قید وچ وی یوسف دے نال سی، تے ایس لئی ایہہ کہانی اجے مُکی نئیں۔ خدا دے کول یوسف لئی اجے وی منصوبے سن، بھاویں اوہ اوس ویلے ایہہ ویکھ نہ سکیا۔
اگلے ڈرامے وچ، یوسف دی کہانی چلدی رہوے گی۔
لوک: بیان کرن والی
حقوق: بحق سی ای ایف جرمنی محفوظ نے۔