93. سنگسار تے تاج پوشی

پنجویں درجے والیاں نے بڑی تیاری کیتی سی تے قومی کھیڈاں دے مقابلے لئی اُڈیک وچ سن۔ ہر کسے نے آپنے ولوں بڑا چنگا کھیڈیا۔ تے آخری تقریب اُتے، ہر کوئی اوہناں دے لشکدے مُنہ ویکھ سکدا سی جنہاں نوں انعام ملنا سی۔

سٹین اک سورمے وانگ دوڑیا۔ سوچو جے اوہنے چنگی طرح دوڑ شروع کیتی ہوندی، تے ساریاں نالوں تیز دوڑیا ہوندا، ساریاں نالوں اگے لنگ جاندا تے آخری لکیر توں پہلاں، اک پاسے بہہ جاندا تے ہار من لیندا۔ کوئی سوچ وی نئیں سکدا۔ جیہڑا وی چنگی شروعات کردا اے اوہنوں چنگی طرح دوڑنا چاہیدا تے آپنی دوڑ نوں قائم رکھنا چاہیدا اے۔

جیہڑا وی یسوع دے نال تُردا اے ایہہ اوہناں لئی وی ضروری اے۔ ایمان وچ ایہہ ضروری اے پئی زندگی یسوع دے نال شروع کیتی جاوے، پر فیر ایہہ ساڈے اُتے وے پئی اسی کس طرح دوڑدے اَں تے کس طرح ایہدے وچ قائم رہندے اَں۔ یسوع ساڈی مدد کردا اے، تے میَں ویکھیا اے پئی کس طرح اوہنے ستفنس دی مدد کیتی۔ ایہو جیہے بہت لوک سن جیہڑے اوہنوں روکدے سن پئی ایمان نہ لیاوے۔ اسی بائبل وچ پڑھدے اَں پئی ایہہ لوک آئے تے تکرار شروع کیتی۔ پر ستفنس ایہدے وچ شریک نہ ہویا۔ تے ایس گل توں ہر کوئی غصّے وچ آ گیا۔ اوہناں نے ستفنس دے خلاف ہر پاسے جھوٹھیاںگلاں دا پرچار کیتا، اوہ بندہ جیہڑا خدا اُتے بھروسہ رکھدا سی تے جیہڑا غریباں دی مدد کردا سی۔ ستفنس نوں وی کچہری وچ آونا پیا۔

وکیل: ”ستفنس نے خدا دی بے عزتی کیتی اے تے ایہو جیہیاں گلاں کیتیاں نے جیہڑیاں پئی قنون دے خلاف نے۔“

منصف: ”کیہ ایہہ الزام سچا اے؟“

ہر کوئی ستفنس ول ویکھدا پیا سی۔ اوہدا مُنہ اک فرشتے وانگ لشکیا۔ آپنے آپ نوں بچاون دے بجائے، اوہ اوہناں نوں یسوع دے بارے وچ دسن لگ پیا۔

ستفنس: ”خدا دا پُتر دھرتی اُتے آیا۔ تُساں اوہنوں سولی چاڑھ دِتا۔ پر خدا نے اوہنوں مویاں وچوں وی جوایا۔“

کچہری وچ وی ستفنس خداوند یسوع دا وفادار رہیا۔ فیر اوہنے اُتے اسمان وَل ویکھیا تے آکھیا:

ستفنس: ”میَں اسمان نوں کھُلیا ہویا ویکھدا اَں تے یسوع خدا دے سجے پاسے کھلوتا اے۔“

اینہاں گلاں دے بعد غصّے نال بھرے لوک اوہدے اُتے ٹُٹ پئے۔ اوہناں نے اوہنوں ماریا، گھسیٹ کے شہر توں باہر لے گئے تے اوہدے اُتے روڑے ورسائے۔ ستفنس فیر وی قائم رہیا تے یسوع دا وفادار رہیا۔

اوہناں نے اینے روڑے ورسائے پئی اوہ مر گیا۔ مرن توں پہلاں، اوہنے دعا کیتی۔

ستفنس: ”خداوند یسوع، میَں اسمان اُتے تیرے کول آوندا اَں؛ اینہاں دے گناہ معاف کر۔“

آپنے مقصد تک پہنچن دا راہ اوکھا سی۔ پر ستفنس وفادار رہیا۔ تے ایس لئی، یسوع نے اوہنوں جلال دا تاج دِتا۔ یسوع اُتے بھروسہ رکھن تے وفادار رہ رہن وچ ای بھلیائی اے، نفرت تے طعنیاں اُتے اخیر نئیں ہو جاندا۔ ودھیا شیواں اگے آون والیاں نے۔

لوک: بیان کرن والی، وکیل، منصف، ستفنس

حقوق: بحق سی ای ایف جرمنی محفوظ نے۔