83. اک رات جیل وچ

نئیں، ایہناں معتبر بندیاں نوں ایہہ گل چنگی نہ لگی۔ اوہناں دے مُنہاں اُتے غصہ سی، اوہناں دے متھیاں اُتے وٹ سن، تے اوہناں دیاں اکھاں وچ حسد سی۔

پہلا فریسی: ”ہور کِنا چِر اسی ایہہ ویکھدے رہئے؟“

دوجا فریسی: ”میَں وی ایہہ ای کہناں: اساں اوہناں نوں یسوع بارے بولن توں ڈکیا سی۔“

پہلا فریسی: ”جے ایسے طرح ای ہوندا رہیا، تے چھیتی ای سارے ایہہ منن لگ پین گے پئی خُدا نے یسوع نوں جوایا اے۔“

دوجا فریسی: ”آو اوہناں دے سرداراں نوں پھڑ لئیے۔“

فریسیاں دی ا یہہ ای چال سی، پئی اوہ ای کرنا اے جو اوہ مندے نے۔ پہلاں اوہناں نے یسوع نوں سولی چاڑھیاتے فیر اوہناں نے اوہدے گواہواں نوں چپ رہن لئی آکھیا۔ ہیکل دے سپاہی تکدے ہوئے لوکاں دی پیٹروچوں نکلے۔ اوہناں پطرس تے یوحنا نوں گرفتار کر لیا، اوہ اوہناں نوں اوتھوں لے گئے تے ساری رات اوہناں نوں قید خانے وچ ڈک دِتا۔

اگلے دِن اوہناں کولوں سوال پوچھے گئے:

منصف: ”کِنے تہانوں آکھیا اے پئی منادی کرو؟ تُسی کرامات کس طرح کردے ہو، جیویں پئی اک مفلوج نوں تُرن جوگا کر دینا؟“

پطرس ڈریا نئیں۔ اوہ دلیری نال بولیا:

پطرس: ”اساں اک مفلوج دی مدد کیتی ایس لئی سانوں مجرم ٹھہراندے او۔ خداوند یسوع اُتے ایمان لیاون نال کرامت ہوئی، جہنوںتساں سولی چاڑھ دِتا سی، تے جہنوں خدا نے فیر مویاں وچوں جوایا۔ بس یسوع ای لوکاں نوں نجات دےسکدا اے۔ تے پوری دُنیا وچ کوئی ایس طرح نئیں کر سکدا۔“

منصف پطرس دی ہمت اُتے حیران ہوئے تے آپس وچ گل کرن لگے پئی اوہناں نال کیہ کرنا چاہیدا اے۔

منصف: ”سانوں اینہاں بندیاں نال کیہ کرنا چاہیدا اے؟ اسی ایس حقیقت توں وی انکار نئیں کر سکدے پئی اک مفلوج تُرن پھرن جوگا ہو گیا؛ ہر کوئی ایہہ ویکھ سکدا اے۔“

منصف: ”پر سانوں دوجیاں نوں روکنا چاہیدا اے پئی اوہ ایہدے بارے نہ سنن۔ اسی بس اوہناں نوں یسوع بارے گل کرن توں منع کراں گے۔“

پطرس تے یوحنا نوں فیر اندر لیایا گیا۔

منصف: ”سُنو بندیو، تہانوں ہن یسوع دے بارے منادی کرن دی کوئی اجازت نئیں۔ سمجھ گئے؟ اسی تہاڈے کولوں اُمید رکھدے اَں پئی تُسی ایس حکم نوں منو گے، نئیں تے۔۔۔“

پر پطرس نے آپنے تے یوحنا ولوں ایہہ جواب دِتا:

پطرس: ”کیہ تُسی واقعی ایہہ چاہندے ہو پئی اسی خُدا دے بجائے تہاڈا حکم منئیے؟ ساڈے لئی چپ رہنا ناممکن اے۔ اساں یسوع دے نال رہ کے اوہدے وڈے کم ویکھے نے، تے اسی ضرور دوجیاں نوں اوہدے بارے دساں گے۔“

اوہناں نوں اک واری فیر آکھیا گیا پئی اوہ چپ رہن تے فیر اوہناں نوں جاون دِتا۔

سانوں بندیاں دے بجائے خدا دی گل مننی چاہیدی اے۔ جس طرح پئی پطرس تے یوحنا مندے سن۔

لوک: بیان کرن والی، دو فریسی، دو منصف، پطرس

حقوق: بحق سی ای ایف جرمنی محفوظ نے۔