19. چورکون اے ۳

جدوں گورے پردیسی نے اک ڈبے وچوں جیپ وچ تار لائی تے رِنگو تے بٹو بڑے شوق نال ویکھدے پئے سن۔

فیر اک چِٹی دیوار تیار کیتی گئی۔ بھارت دے اوس نِکے پینڈ وچ لوکاں لئی اے شے نوی سی۔ اوہناں نے ایس تھوں پہلاں کدی فلم نہیں ویکھی سی۔

صاحب گروُب: ’’خدا تہانوں ساریاں نوں پیار کردا اے۔ اوہنے دُنیا وچ آپنا پیارا پُتر گھلیا۔ اوہدا ناں اے یسوع۔ اوہ ساڈے وانگ انسان بنیا، گناہ دے بغیر۔ خدا گناہ تھوں نفرت کردا اے تے موت دے وسیلے اوہ سزا دیندا اے۔ پر یسوع نے بغیر کسی قیمت دے ایہہ سزا آپنے اُتے لےلئی تے ساڈی تھاں آپ صلیب اُتے جان دے دِتی۔ خدا نے فیر اوہنوں مویاں وچوں جوایا۔ یسوع اُتے یقین کرو۔ فیر تُسی بچ جاﺅ گے تے اسمان وچ تہانوں گھر ملے گا۔‘‘

فلم ختم ہو گئی۔ پانڈو نے اک نِکے واجے اُتے گیت وجایا، تے جیہڑا ا جیہڑا صاحب گروُب دے نال گل کرنا چاہندا سی اوہ اوتھے ٹھہریا۔

رِنگو: ’’صاحب، تُسی ہور کِنا چِر ساڈے نال رہو گے؟ میَں تہاڈے کولوں خدا دے بارے وچ ہورسُننا چاہندا اَں۔‘‘

صاحب گروُب: ’’کل اسی گڈی اُتے اگلے پینڈ جاواں گے۔ پر اسی اک دوجے نال فیرضرور ملاں گے۔‘‘

رِنگو تے بٹو نے آپنے گھر جانا سی۔ پر جیپ وچ پیا واجا۔۔۔ کیہ کوئی اوہناں نوں ویکھے گا تے نہیں؟ بجلی وانگ تیزی نال اوہناں نے اوہ ڈبہ چکیا تے اوس ساز نوں لے کے اوہ ہنیرے وچ غیب ہو گئے۔ اوہناں نے آپنے لُکن لئی اک پرانے چھپر نوں چُنیا۔ اوہناں دی اوہ رات بڑی پریشانی وچ لنگی۔ صرف اوہناں دے بُرے کماں دے کر کے نہیں سگوں اوہناں نوں لگڑ بگیاں تھوں پیلیاں دی راکھی وی کرنی پئی ہووے گی۔ چن دی لَو بہت سی۔

رِنگو: ’’بٹو، اوتھے کجھ ہلدا پیا اے۔ اک شیر۔ ایہہ شیر ای سی۔ میَں اوہدیاں اکھاں لشکدیاں ویکھیاں سن۔‘‘

بٹو: ’’کیہ توں ایہہ سُفنے وچ ویکھیا اے؟‘‘

رِنگو: ’’نہیں میَں سچی اوہنوں ویکھیا اے۔‘‘

اگلی صبح پورا پینڈ اوس خوفناک خبر بارے گلاں کردا پیا سی۔

بندہ: ’’اوہ شیر سی۔ بندیاں نوں کھاون والا شیر۔‘‘

عورت: ’’کیہ؟ کدوں؟ کِتھے؟‘‘

بندہ: ”نال والے پینڈ وچ اک بندے اُتے شیر نے حملہ کیتا سی۔‘‘

رِنگو: ’’اساں وی شیر ویکھیا سی۔‘‘

بڑا شور مچیا رہیا! جدوں تیک اک پرانے شکاری نے آپنا چنگا مشورہ دِتا۔

شکاری: ’’ساریاں نالوں چنگا طریقہ ایہہ آ پئی اک ڈھگے نوں کوہیا جاوے تے اوہدی لاش نوں اج راتی تلا دے کول رکھ دِتا جاوے۔ اسی وڈے رُکھ اُتے آپنے ہتھیار لے کے بہہ جاواں گے تے ویکھدے رہواں گے۔ ڈھگے دے خون دی خوشبو نال شیر آوے گا۔ تے جدوں اوہ آوے گا تے ڈھگے نوں کھانا شروع کردیوے گا، اسی اوہنوں گولی مار دیاں گے۔‘‘

بندہ: ’’رِنگو، کیہ تُسی نال آﺅ گے؟ سانوں تہاڈی لوڑ اے۔‘‘

اوہ بڑا فخر محسوس کردا پیا سی پئی اوہنوں چنیا گیا اے پئی اوہ اوہناں دے نال شکار کرے۔ پر نال اوہ گھابریا وی ہویا سی۔ اک شیر دا شکار کرنا بڑا خطرناک کم اے۔ ایہہ خطرناک ہو سکدا اے جے۔۔۔

اگلی کہانی وچ تُسی وی شکار اُتے نال آ سکدے او۔

لوک: بیان کرن والی، صاحب گروُب، رِنگو، بٹو، شکاری، بندہ، عورت

حقوق: بحق سی ای ایف جرمنی محفوظ نے۔