121. برف وچ رستے ۵

انیتا نے اک کتاب پڑھی۔ پر اوہدا دھیان کِتے ہور سی۔

انیتا: ”دادی، میَں سون نوں چلی اَں۔ رب راکھا۔“

پر اوہ آپنے کمرے وچ نہ گئی: سگوں اوہ باہر ٹُر گئی تے ڈوہنگی برف وچ ٹُرن لگ پئی۔ جدوں اوہ تِلک کے ڈِگ پئی تے اوہدے پیر وچ ایسی بُری موچ آئی پئی ہن اوہ ہور ٹُر وی نہیں سکدی سی۔

انیتا (روندی ہوئی): ”ہن مینوں کیہ کرنا چاہیدا اے؟ جدوں تیک میَں کسے نوں لبھاں گی تدوں تیک تے میَں جم گئی ہوواں گی۔“

اوہ برف وچ بہہ گئی تے روئی۔ اسمان اُتے تارے چمکدے پئے سن۔ انیتا نے اُتے ویکھیا۔ کیہ خدا اوہنوں رہائی دیوے گا، بھاویں اوہ لوقس نال بڑا بھیڑا ورتدی سی؟

فیر اوہنے لمبیاں لکڑ دیاں جُتیاں دی برف اُتے چھیتی نال آون دی واج سُنی۔

انیتا: ”مدد کرو! مدد کرو! لوقس، کیہ ایہہ توں ایں؟ مہربانی کر کے میری مدد کر۔ میرے پیر وچ موچ آئی اے۔“

لوقس: ”میَں برف والی گڈی لے کے آوندا اَں۔ ایہہ لے میری جیکٹ لے لے جدوں تیک میَں مُڑ نہیں آوندا۔“

جدوں فیر اوہ اکلی سی، تے اوہنے آپنے پورے دل نال دعا کیتی۔

انیتا: ”پیارے خداوند یسوع، میَں گنہگار اَں تے مینوں تیری لوڑ اے۔ مہربانی نال میرے سارے گناہ معاف کر دے۔ میَں تیری دھی بننا چاہندی اَں۔ تے ایہہ ایس لئی نہیں پئی میَں ایس ویلے مصیبت وچ اَں۔ آمین۔“

لوقس برف والی گڈی تے کمبل لے کے مُڑ آ گیا۔

انیتا: ”لوقس، میَں تینوں کجھ دسنا چاہندی اَں۔ اوہ میَں ای سی جہنے تیرا نِکا گھوڑا خراب کیتا۔ یسوع نے مینوں معاف کر دِتا اے۔ توں وی مہربانی کر کے مینوں معاف کر دے۔ ہن میَں تیرے نال نفرت نہیں کردی۔“

لوقس: ”میرا خیال سی پئی اوہ توں ای ہوویں گی مینوں دسن لئی شکریہ۔ میَں تینوں معاف کردا اَں۔“

انیتا آپنے گھر وچ محفوظ سی، تے نال والے گھر وچ لوقس نے دعا کیتی۔

لوقس: ”خداوند یسوع، مہربانی کر کے مینوں اک راہ دیو جہدے تھوں میَں انیتا نوں ایہہ ثابت کر سکاں پئی ڈینی نال جو ہویا میَں اوہدے بارے شرمندہ اَں۔“

فیر اوہنوں شہر والے ڈاکٹر دا خیال آیا۔ کیہ اوہ فیر تھوں ڈینی دی لَت نوں پوری طرح ٹھیک کر سکے گا؟ رات دے ویلے، تے برف دے طوفان دے وچ، لوقس خطرے دے باوجود لکڑ دیاں لمبیاں جُتیاں نال برف اُتے تِلک کے تھلے شہر وچ اُتریا۔ تھکیا ہویا اوہ سلامتی نال اپڑ گیا، ویسے تے ایہہ خطرناک سی۔ پر اوہدا ایہہ کم شاباش دے لائق سی۔ ڈاکٹر مدد کرنا چاہندا سی۔ ڈینی نوں لمبے عرصے تیک ہسپتال وچ رُکنا پیا، پر جدوں اوہ گھر آیا، تے بہت ای خوشی دا ماحول سی۔ اوہ فیر تھوں ٹُر سکدا سی! لوقس نوں آون دی دعوت دِتی گئی۔ اوہ بہت خوش سی جدوں اوہنے ڈینی نوں بغیر سہارے دے ٹُردے ویکھیا۔

ڈاکٹر: ”ڈینی، تینوں لوقس دا شکرادا کرنا چاہیدا اے۔ اوہنے آپنی جان نوں خطرے وچ پایا جدوں اوہ مینوں ملن آیا۔“

لوقس: ”میَں اکلے ایہہ نہیں کیتا۔ یسوع نے مینوں راہ دِتی، تے اوہنے میری مدد کیتی پئی میَں ایہہ کر سکاں۔“

تے اوہدا پرانا بیلی جیہڑا پہاڑاں وچ اے اوہنے ہر شے لئی پیسہ دِتا۔ پر اوہ لوقس دا رازدار بن کے رہیا۔

لوک: بیان کرن والی، انیتا، لوقس، ڈاکٹر

حقوق: بحق سی ای ایف جرمنی محفوظ نے۔