Home -- Malagasy -- Perform a PLAY -- 058 (God puts everything right 6)
58. Mamerina ny zavatra rehetra amin'ny laoniny Andriamanitra 6
Tena andro mampientam-po ity andro ity! Nanao dia fanindroany hankany Ejipta indray ny rahalahin'i Josefa mba hividy vary. Tsy fantatr'izy ireo fa ny rahalahiny no lehilahy faharoa nandidy ny firenena, ilay namidin'izy ireo ho andevo 20 taona lasa izay, satria nialona azy izy ireo.
Nanome baiko hanomanana fety i Josefa. Mitovy tanteraka amin'ny ao an-trano ny filaharan'ny fipetrahana. Hafahafa izao, hoy ny eritreritr'ireo rahalahiny. Rehefa teny an-dalana hody izy ireo nony farany, niaraka tamin'ny lasakany feno vary, dia tena afa-po tokoa. Saingy tsy afaka nandeha lavitra izy ireo...
Mpanompo: "Mijanòna! Aza mihetsika. Nangalarinareo ny kapoaky ny divay volafotsy izay an'ny tompoko!"
Rahalahy: "Tsia, tsy nangalatra na inona na inona izahay. Hamarinonao àry."
Nosavain'ilay mpanompo ny zavatra rehetra. Ny kitapo farany nosokafany dia ny an'i Benjamina.
Mpanompo: "Ity no mpangalatra. Afaka mandeha daholo ianareo rehetra, fa ianao kosa mijanona eto ho andevo."
Dia nentiny teo anatrehan'i Josefa izy ireo. Tora-kovitra izy rehetra, dia niankohoka teo anatrehany. Nibaiko olona iray izy hametraka ilay kapoaka tao anatin'ny iray tamin'ireo kitapo mba hitsapana ny rahalahiny. Hiray hina ve izy ireo sa mbola ratsy fo be ihany? Josefa niteny mafy tamin'izy ireo.
Josefa: "Nahoana no nanao izao ianareo? Mijanona ho andevo eto ny mpangalatra."
Dia nandray fitenenana i Joda.
Rahalahy: "Azafady indrindra, mba avelao i Benjamina handeha, ary raiso aho ho toy ny andevo eo amin'ny toerany. Raha tsy izany, dia ho faty noho ny alahelo ny rainay."
Niray hina ireo rahalahy. Nampahafantatra ny tenany tamin'ireo i Josefa.
Josefa: "Tsy fantatrareo ve aho? Izaho no Josefa, rahalahinareo."
Dia talanjona izy rehetra ka tsy niteny na dia indraim-bava akory aza. Ary Josefa dia nitomany noho ny hafaliana ka nanoroka azy ireo.
Josefa: "Andriamanitra no naniraka ahy ho aty Ejipta, mba ho velona ianareo. Mandehana alaivo ny raintsika sy ny fianakavianareo. Dimy taona mosarena no mbola ho avy, fa izaho no hikarakara anareo."
Nomeny fanomezana maro be izy ireo mba hoentina mody any an-trano.
Faly be ny rainy rehefa nandre fa mbola velona i Josefa! Fotoana tsy ela taorian'izay, olona 70 no nifindra monina niaraka tamin'ny fananany rehetra ary nanorim-ponenana tany amin'ny faritra tsara indrindra tao Ejipta. Tena fety tokoa izany! 20 taona aty aoriana, vao nihaona tamin'ny rainy indray i Josefa. Nanova ny zava-drehetra ho tsara Andriamanitra. Ary niaiky ny tsy nety nataony ihany koa ireo rahalahy tamin'ny farany.
Rahalahy: "Josefa, mamelà ny helokay tamin'izay rehetra nataonay taminao. Miala tsiny izahay."
Josefa: "Mamela anareo aho. Ianareo nikasa izany ho ratsy fa Andriamanitra nanova izany ho amin'ny tsara."
Nanova ny zava-drehetra ho amin'ny tsara Andriamanitra! Ny fikasany dia ny hamelona ny vahoakany.
Mpandray anjara: Mpitantara, mpanompo, Josefa, rahalahy
© Zon'ny mpamorona: CEF Alemaina