Home -- Quechua -- Perform a PLAY -- 031 (Alarm on the farm)
31. Granjapi uj willay rikhurin
¿Qan rejsinkichu Juanta? Pay kawsan América del Sur cheqapi uj granjapi. Wata junt’aynimpitaj uj chilwisituta regalasqanku, kawsashaj chilwisitutapuni á. Juantaj sapa p’unchay mikhuchispa sumajta qhawashan. Chanta manaraj unaypi juch’uy chilwiqa manchay jathun wallpaman tukurparin. Q’ellumantaqa, yuraj ch’ilo phurusniyojman tukurpan, chayraykutaj Juanqa sutichasqa wallpantaqa "señora Blanco", nispa. Thapatapis ruwapun ima Juanqa, chanta sapa kuti runtuta churaspa señora Blancoqa, manchayta qhaparirej kasqa. (cacareo)
Trigo tarpusqa wiñajtinñaqa, señora Blancoqa kaymanta jinalla manaña rututa churasqachu.
Juan: "Mamay, Mamáy. ¿Imataj kan señora Blancorí? Manaña runtuta churanchu, chanta tukuy p’unchaytaj trigo ukhullapi chinkas kashan."
Mamá: "Ay waway, ujchhikanta suyanalla…"
Manchay kusisqa mamanqa Juanman nisqa. Uj maskha semanamantataj ñapis yachasqaña Juanqa imaraykuchus jina kasqanta.
Juan: "Mamáy, mamáy, jamuy kayta qhawanki…"
Trigo ukhumanta señora Blancoqa manchay askha chilwisitusniyoj llojsirimusqa. Juantaj aswan kusisqa chayta rikuytawanqa.
(Sirena)
Jinallapi uj p’unchay nina uyarikusqa, q’usñitaj mayta llojsirisqa wasinku qayllamantaqa. Chay chaypi tarpusqas ruphaykushasqa arí, mana wañuchinapaj jina kasqa ninaqa. Wasinkupis ñak’aymanta ayqesqa ninamantaqa.
Juan: "Kunan ¿maypi kashan señora Blancorí? ¿Kaypichu...?"
Juansitoqa mana yuyayllatapis munasharqachu chay ruphasqa trigo ukhusta mask’aspaqa. ¿Imataj chay karqarí? Uj yana morq’opacha chaypi choqarayasharqa. Yanallata q’ala ruphasqata señora Blancota ñawpaqempi qhawarin Juansitoqa. T’ijuykuspa oqharejtintaj; ¿imataj chaypi kasharqarí? Wallpa ruphasqa urapi tukuynin chilwisitus kasharqanku manchay manchharisqas kawsakushaj.
Juan: "Uumm, ¿imaynapitaj kawsarqankurí?"
Mamá: "Uywitakunaqa chay ratito mana allin kajta riparanku á. Nina jamojtinkamachá, chilwisitusqa mamampa uranman pakaykukurqanku. Payqa phawarispa ripoyta aterqa, kay juch’uykunarí, mana. Señora Blancoqa manchayta munakorqa chilwisitusnintaqa, chayrayku lijrasnin urapi pakaysuspa saqerqa nina payta ruphaykunanta. Sacrificakun wawitasnin salvakunankurayku."
Papá: "Yuyani may llakisqa kashasqaykita Juansito, jinapis yuyashani señora Blancoqa uj sumaj yachakuyta qowanchej, imaynachus Jesucristoj munakuynin kasqanta: Payqa mana pejpa nisqallan voluntariamente noqanchejnejta cruzpi wañorqa, noqanchej kawsananchejta munaspar. Chayta amapuni qonqankichu, Juansito."
Personajes: Relator, Juan, mamá, papá
© Copyright: CEF Germany