Home -- Punjabi -- Perform a PLAY -- 061 (A new star 1)
!ڈرامے- ایناں نُوں اپنے بیلیاں لئی ادا کرو
بچیاں دے ادا کرن لئی ڈرامے
16. اک نواں تارا ۱
رات ویلے اسمان اُتے لکھاں تارے چمکدے پئے سن۔ بابل دے لوکاں دوربین نال لو نال بھرے اسمان نوں ویکھیا۔
پہلامجوسی: ”اوہ ویکھو، اک نواں تارا! ایہہ تارا ایس توں پہلاں کدی وی نئیں سی۔“
دوجامجوسی: ”توں ٹھیک آکھدا پیا ایں۔ اچانک اک نواں تارا نکل آیا اے۔ ایہدا کیہ مطلب ہو سکدا اے؟“
ایہہ مجوسی تاریاں دے علم بارے بہت کجھ جاندے سن۔ آپنے ایس سوال دا جواب لبھن لئی اوہناں وٹیاں دیاں بنیاں تختیاں تے لمبے لمبے طوماراں نوں ویکھیا۔
پہلا مجوسی: ”ایہہ ایتھے وے: ایہہ تارا سانوں دسدا اے پئی یہودیاں دا بادشاہ پیدا ہویا اے۔“
دوجا مجوسی: ”اک بڑا ای خاص بادشاہ! ساریاں نالوں چنگی گل ایہہ ہووے گی پئی اسی جا کے ایہنوں لبھیے تے اوہنوں وڈیائیے۔ اوہ ساڈا وی بادشاہ ہو سکدا اے۔“
یسوع، ابدی بادشاہ پیدا ہویا سی۔
پہلاں خدا نے ایالیاں نوں ایہہ دسیا تے فیر بابل دے مجوسیاں نوں۔
ایہدے فوراً بعد مجوسیاں نے آپنے پینڈے لئی سمان تے تحفے آپنے اونٹھاں اُتے لدے۔
اوہناں نے ۰۲۶ میل نالوں بہتا پینڈا کرنا سی۔ اوہناں نوں ایہہ پینڈا کرن لئی کئی مہینے لگے۔ پر یسوع اوہناں لئی ایڈا ای ضروری سی۔ اوہ اوہنوں وڈیاناں چاہندے سن تے ہر کسے نوں ایہہ دسنا چاہندے سن پئی اوہناں نے اوہنوں آپنی زندگی دا مالک من لیا اے۔
کیہ تُسی وی ایس وڈے دن اُتے یسوع نوں ایہہ کر کے وکھالو گے؟ کیہ تُسی وی اوہنوں آپنا مالک تے نجات دین والا بنانا چاہندے ہو؟
مجوسی آخر اوس وڈے شہر یروشلیم اپڑ گئے تے اوہ تھک گئے سن۔
پہلا مجوسی: ”اوہ بادشاہ کِتھے وے جیہڑا پیدا ہویا اے؟ اساں اوہدا تارا ویکھیا سی تے اوہدی وڈیائی کرن آئے اَں۔“
کسے نے اوہناں نوں جواب ناں دِتا۔ لوک ایس تھوں حیران ہوئے تے آپنے راہ اُتے ٹُردے رہے۔ ساریاں نالوں ودھ ہیرودیس بادشاہ حیران ہویا۔ اوہ خطرناک بادشاہ، جہدے کولوں سارے لوک ڈردے سن، اوہنوں آپنا تخت کھنجن دا ڈر سی۔ اوہنے چھیتی نال آپنے عالماں نوں بلایا پئی اوہ اوہدے کول آون۔
ہیرودیس: ”کیہ تُسی جاندے ہو پئی ایہہ یہودیاں دا بادشاہ کِتھے پیدا ہووے گا؟“
عالم : ”ہاں جی بالکل اسی جاندے اَں۔ اساں خدا دا کلام پڑھیا اے۔ بادشاہ بیت لحم وچوں ہووے گا۔“
ایہہ لفظ ہیرودیس نوں تلوار وانگ چُبھے۔ پر اوہنے کسے اُتے آپنا ڈر ظاہر نہ ہوون دِتا۔ اوہنے لُک چھپ کے بابل تھوں آون والے بندیاں نوں پوچھیا:
ہیرودیس: ”تارا کدوں دِسیا سی؟ تُساں اوہنوں پہلی واری کدوں ویکھیا سی؟“
اوہناں نوں تریخ دسنی تے نئیں سی چاہیدی پر فیر وی اوہناں دس دِتی۔ ہن اوہ جاندا سی پئی اوہنوں کیہ جانن دی لوڑ اے۔
ہیرودیس: ”بیت لحم وچ جاوو تے اوس بچے نوں لبھو۔ جدوں تُسی اوہنوں لبھ لوو تے فیر مُڑ آ کے مینوں دسو، تاں جو میَں وی اوہدی وڈیائی کر سکاں۔“
کیہ اوہ حقیقت وچ ایس طرح کرنا چاہندا سی؟ نئیں۔ اوہ خطرناک تے جھوٹا بندہ آپ ای کلا ساریاں اُتے بادشاہ بنیا رہنا چاہندا سی تے ایس کر کے اوہ اوس چھوٹے بچے بادشاہ نوں جانوں مارنا چاہندا سی۔ مجوسی یروشلیم وچوں نکلے۔
اگلی کہانی وچ تُسی ایہہ سُنو گے پئی اوہدے بعد کیہ ہویا۔
لوک: بیان کرن والی، دو مجوسی، ہیرودیس، عالم
حقوق: بحق سی ای ایف جرمنی محفوظ نے۔