Home -- Aymara -- Perform a PLAY -- 061 (A new star 1)
61. Tatit Jesusajj wawanacarojj mun Mä machak warawara 1
Warank warawaranacawa alajj pachan khanascäna. Mä khawkha jakenacawa Babilonianjja cielo uñchuquisipcäna.
Sabio 1: “¡Uñjapjjam, machak warawarawa! Janiw cunapachas uqham warawarajj uñjasiriquiti.”
Sabio 2: “Chekawa. Mayac uñsti uca warawarajja. ¿Camsañs muni?”
Aca jakenacajja atronomíat wal yatpjjäna, warawaranacatsa. Thakhapjjataynawa papironacana uqhamaraqui kalanacan kellkatanacansa – ucanacaruwa nayrajj kellkapjjäna – ucan catupjjataynawa cun sañs munqui uca.
Sabio 1: “Acajjaya. Uca warawarajj judíonacan reyipaw nasjje uc sañ muni.”
Sabio 2: “¡Mä jach’a reyi! Thakhañaniy yupaychañataqui. Jiwasanacan reyïraquiniwa.”
Jesús, wiñay reyijja yuritaynawa. Diosajj nayrakat awatirinacaruw yatiyatayna uqhamarac aca Babilonia yatiñaninacaru.
Uca yatiñaninacajja cuntejj waquiscänjja ucanac camellonacaparuw jaya viajetaqui cargt’apjjatayna uqhamaraqui regalonacampi.
Sarapjjañanacapänwa waranka kilometronaca. Phajjsinacawa viajapjjañapana. Jesurar uñcatañajja wali jach’änwa. Yupaychañ munapjjäna uqhamaraqui uñacht’ayaña jacäwinacapanjj Tatitüpjjatapa.
¿Jumast aca navidad tiempon uñacht’ayaraquismati? ¿Tatitumañap uqhamarac khespiyiriñap muntati?
Wali karjjatawa aca yatiñaninacajja Jerusalén jach’a marcaru puripjjäna.
Sabio 1: “Reyi yurqui ucajj cawqhanquisa? Warawarap uñjapjjta ucat yupaychiri jutapjjta.”
Janiw qhitis camscänti. Uca arunac ist’asinjja sustjasipjjataynawa. Rey Herodesaw juc’amp sustjasitaynajja. Uca ajjtañ phiru reyi, qhititaquitejj takenis khathatipjjänjja, reyïn chhakhayañjj wal ajjsaräna. Ratuquiw escribanacarojj jawsatayna.
Herodes: “¿Cawqhans judíonacan reyipajja yuriñapänjja yatipjjtati?”
Escriba: “Jisa, Diosan arunacapjja wal yatjjatapjj-jja. Belenat uca reyijj jutanejja.”
Aca arunacajja espadjamaw herodesarojj chhokhontänjja. Ucampis amuquïscänwa. Jamasat babiloniat jutir jakenacarojja jisct’atayna:
Herodes: “¿Cunapachas uca warawarajj uñstapjjtamjja? ¿Nayrakat cuna pachas uñjapctajj?”
Jan cuns amuyasinjja uca pachjja sapjjänwa. Jichajj take cun yatjjänwa.
Herodes: “Belenar sarapjjam uca wawar thaktapjjam. Cuna pachatejj jicjjatjjapjjatajja, yatiyapjjeta, uqhamana nayajj yupaychjjaraquï.”
¿Chekpachat Herodesajj yupaychañ munäna? Aca phiru c’arijja jupa sapa reyïñacmunänjja ucatwa wawa reyirojj jiwayañ munäna.
Uca yatiñaninacajja Jerusalenat sarjjapjjataynawa uca reyir thakhañataqui. Jutirinjja chict’ataquïscañaniwa jupanacampejja.
Uñstirinaca: Parliri, dos sabios, Herodes, escriba
© Copyright: CEF Germany