84. چھوٹا بندہ - وڈا دھوکھا

(بھیڑ وچ لوکاں دی واج)

زکائی: ”ہٹ جاوو! مینوں لنگن دیو!“

بندہ: ”اینے دھکے کیوں پئے لگدے نے؟ ہر کوئی آ سکدا اے۔“

زکائی: ”مینوں کجھ نئیں پیا دِسدا۔“

بندہ: ”چپ کر کے ایتھوں چلا جا۔“

اوہ اگے نہ لنگ سکیا۔ ہر کوئی اوہنوں جاندا سی۔ پر کوئی وی اوہنوں چنگا نئیں سی سمجھدا۔ اوہدے کول اک سوہنا گھر تے ساریاں نالوں چنگے کپڑے سن۔ اوہدا قد بہت نِکا سی، پر اوہ بڑا امیر سی۔ ہر کوئی جاندا سی پئی اوہنے آپنا سارا پیسہ ایمانداری نال نئی سی کمایا۔ اوہدے ناں دا مطلب سی ”بے قصور“، پر اوہ نِکا زکائی بڑا وڈا چور سی۔

اوہ یریحو وچ محصول لیندا ہوندا سی۔ جیہڑا وی شہر دے باہروں سامان منگاوندا سی اوہنوں زکائی نوں محصول دینا پیندا سی۔ زکائی اصولاں اُتے نئیں سی تُردا۔ اوہ نےلوکاں کولوں جِنے پیسے لینے ہوندے سن اوہدے تھوں بہتے لیندا سی۔ روم وچ اوہدا صاحب ایدے بارے کجھ نئیں سی کردا، زکائی جو چاہندا سی اوہ کردا سی۔ ایسے لئی اوس بندے نے جہدا ناں بے قصور سی خود نوں بہت زیادہ قصور وار بنا لیا۔

زکائی کول بہت سارا پیسہ سی، پر کوئی خوشی نئیں سی۔ اک دن یریحو وچ عجیب کم ہویا: اوتھے یسوع آیا!

ایہہ نِکے قدد والا زکائی یسوع نوں جانن دا موقع نئیں سی چھڈنا چاہندا، پر دوجیاں دے سببوں او اوہنوں ویکھ نئیں سی سکدا۔ رُکھ اُتے چڑھ جا۔ ایہہ چنگا طریقہ اے! اوہ چھیتی نال اُتے چڑھ گیا۔ کیہ زبردست نظارہ سی۔ یسوع آیا! اوہ نیڑے آوندا گیا۔ زکائی دی عجیب حالت بارے ذرا سوچو: یسوع سیدھا آ کے اوسے رُکھ ہیٹھاں کھلو گیا۔ زکائی دا دِل زور نال دھڑکن لگ پیا۔ یسوع نے اُتے ویکھیا۔ یسوع نے اوہدیاں اکھاں وچ اکھاں پا کے ویکھیا۔ یسوع نے اوہنوں کس طرح پچھانیا؟ یسوع نے اوہنوں آکھیا:

یسوع: ”زکائی، چھیتی نال رُکھ تھوں ٹھاں اُتر آ۔ آج میَں تیرے گھر آنا چاہندا آں۔“

زکائی نے چھیتی نال اوہو کیتا جو یسوع نے اوہنوں کرن لئی آکھیا۔ اوہ رُکھ تھوں ٹھاں اُتر آیا۔ اوہ خوشی نال یسوع نوں آپنے گھر لے گیا۔ پر دوجیاں نوں ایہہ ویکھ کے دُکھ ہویا۔

بندہ: ”یسوع اوہدے گھر جاندا پیا اے؟ کیہ یسوع ایہہ نئیں جاندا پئی اوہ کِڈا خراب بندہ اے؟“

جی ہاں، یسوع جاندا سی۔ فیر وی اوہ اوہنوں پیار کردا سی۔ زکائی یسوع دے بارے وچ جان گیا تے اوہنوں آپنے سارے گناہواں بارے دسیا۔

زکائی: ”خداوند یسوع، میَں تہاڈے نال وعدہ کردا اَں: میَں آپنی دولت دا آدھا حِصّہ غریباں نوں دے دیواں گا۔ تے جہدے کولوں وی میَں بہتے پیسے لئے نے، میَں اوہدوں چار گنا بہتا واپس کراں گا۔“

یسوع: ”زکائی، ہن توں بچ گیا ایں، کیوں جو میَں گواچے ہویاں نوں لبھن تے اوہناں نوں بچاون آیا ں۔“

یسوع تہاڈے کول وی آوے گا، اوہنوں آپنی زندگی وچ بلاوو تے اوہنوں دسو پئی تُسی کیہڑی شے تھوں تنگ او۔ او تواڈی زندگی نُوں ترتیب دے گا۔

لوک: بیان کرن والی، زکائی، یسوع، بندہ

حقوق: بحق سی ای ایف جرمنی محفوظ نے۔