74. آگ لان والا ۶

اِتوار دی شام نوں، طیفام باہر بیٹھی سی تے اوہنے سورج نوں ویکھیا پئی او کس طرح ہیٹی دے پہاڑاں اولے ہیٹھاں تُر گیا۔ اوہ بہت خوش سی کیوں جو اوہ ہونئے ای خدا دی دھی بنی سی۔ اوہدے پیو، چڑیلاں دے ڈاکٹر، اورسٹل نے اوہدی بائبل کھو کے پاڑ دِتی سی۔ پر اوہ یسوع نوں کدی وی نئیں سی کھو سکدا، کیوں جو اوہ اوہدے دِل وچ سی۔ طیفام نوں آپنے پیو اُتے غُصّہ نئیں سی، جیہڑا ویڑے وچ بہہ کے نگا ہوون لئی اگ پیا سیکدا سی۔ اوہ فیر وی اوہنوں پیا رکردی سی۔ کیہ اوہنوں اک نوی خبر بارے پتہ سی؟

طیفام: ”ابو، وکٹر ہر اتوار نوں ساڈے پنڈ وچ کلام سناون آوندا اے۔“

اورسٹل: ”اوہدے لئی چنگا ہووے گا پئی اوہ ایس طرح نہ کرے۔“

اورسٹل آپنے مُنہ وچ ای بولدا رہیا، پر اوہنے پتہ نہ لگن دِتا پئی اوہ صبح نوں گرجے دے پیچھے لُک کے اوہنوں سُن کے آیا سی۔ اوہ وکٹر دیاں گلاں بارے ای سوچدا رہیا۔

وکٹر: ”یسوع نے میری زندگی بدل دِتی۔ میَں بدروحواں توں ڈردا رہندا ساں تے میَں اوہناں دی خدمت وی کردا ساں۔ پر جدوں میَں خدا دے پیار دے بارے وچ سُنیا، تے میَں یقین کیتا۔ ہن میَں خوش آں تے مینوں پتہ پئی یسوع سدا میرے نال اے۔ ہن میَں کدی کلا نئیں ہو سکدا۔“

اورسٹل اک نکے گھر وچ گیا جیہڑا اوہنے بدروحواں لئی بنایا سی۔

اورسٹل: ”بدروحو، مینوں آپنا زور وکھاو۔ ایس گرجے اُتے اگ ڈِگے تے ایہہ سڑ جاوے۔ کیہ اے کرن لئی میں تہاڈی مدد کراں؟“

ادھی رات نوں، اورسٹل بلدی ہوئی لکڑ دا ٹوٹا لے کے گرجے ول گیا۔ اوہ ہسیا تے اگ نوں گھا تے توڑی نال بنی چھت ول تاں کیتا۔

اچانک اک ہتھ نے اوہدی باں نوں پیچھا ول کھیچیا۔ چڑیلاں دا ڈاکٹر ڈِگ پیا۔

اورسٹل: ”وکٹر توں کِتھوں آ گیا ایں؟“

وکٹر: ”یسوع نے مینوں گھلیا اے تاں جو میَں تیرے نال گل کر سکاں۔ اوہ تینوں پیار کردا اے۔“

اورسٹل: ”کیہ اوہ اجے وی مینوں پیار کرے گا؟ میَں بدروحواں دی خدمت کیتی اے، میَں جھوٹ بولیا، میَں تینوں جانوں مارنا چاہندا ساں، تے میَں گرجے نوں ساڑن لگیا ساں۔ نالے میَں طیفام دی بائبل وی پاڑ دِتی۔ کیہ اوہ ہن وی مینوں پیار کرے گا؟“

وکٹر: ”تیرے ہر اک گناہ دی خاطر اوہنے صلیب اُتے آپنی جان دِتی سی۔ اوہ تینوں معاف کر دوے گا۔“

اورسٹل: ”میَں جو کجھ کیتا اے میَں اوہدے لئی بہت شرمندہ آں۔ مینوں سکون چاہیدا اے تے ہن میَں خدا دا پُتر بننا چاہندا آں۔“

چڑیلاں دا ڈاکٹر سنجیدہ سی۔ اوہنے آپنی جادوگری دا سارا سامان ساڑ دِتا تے اک نوی زندگی شروع کیتی۔ جہنے وی اوہدا لشکدا مُنہ ویکھیا اوہ خوش ہویا۔ پر ساریاں نالوں ودھ خوشی جیہنوں ہوئی اوہ طیفام سی۔

یسوع جیت گیا ہیٹی وچ تے ساڈے توں وی۔ اوہ ہر کسے نوں قبول کرنا چاہندا اے جیہڑے وی اوہدے کول آوندا اے تے جیہڑے وی خدا دے پُتر تے دھیاں بننا چاہندے نے۔

بائبل دسدی اے ”پر جنیاں اوہنوں قبول کیتا اوس اوہناں نوں حق دِتا پئی خدا دے پُتر بن جان یعنی اوہناںنوں جیہڑے اوہدے ناں اُتے ایمان لیاوندے نے۔“ (یوحنا ۱: ۲۱)

لوک: بیان کرن والی، طیفام، اورسٹل، وکٹر

حقوق: بحق سی ای ایف جرمنی محفوظ نے۔