861. ٹیری نال سب ٹھیک اے ۶

فلپ تے روتھ ارام نال سوتے ہوئے سن۔ اوہناں نے گھر وچ بہت سارے پیراں دی واج سُنی۔ اوہناں نوں ایہہ وی نئیں سی پتہ پئی ڈاکٹر ساری رات ٹیری دے بستر کول بیٹھا رہیا۔

یسوع، چنگا ایالی، چپ کر کے ٹیری نوں آپنے ہتھاں اُتے چُک کے اسمان اُتے آپنے نال لے گیا۔

اگلی صبح، جدوں روتھ نے سُنیا پئی ٹیری مر گیا اے، اوہ تھوڑا تھوڑا رون لگی۔ اوہنے تے فلپ نے آپنے ساریاں نالوں چنگے بیلی نوں گوا دِتاسی۔

اوہدی قبر اُتے پادری ربنجر نے یسوع دی کہانی، اُچی واج وچ پڑھی، جنازے دے بعد، روتھ دُکھی ہو کے جنگل وچوں لنگدی پئی سی۔ ایہہ سوچنا بڑی تکلیف دی گل سی پئی ٹیری ہن جیوندا نئیں سی۔ اوہ اخروٹ دے رُکھ ہیٹھاں بہہ کے اُچی اُچی رون لگ پئی۔

ٹینر صاحب: ”روتھ، توں کیوں روندی پئی ایں؟“

ٹینر صاحب اچانک اوہدے کول آ کھلوتے۔ اوہ چراگاہ دیاں ساریاں بھیڈاں دا مالک سی۔ روتھ نے اوہناں نوں اوہ سارا کجھ دسیا جیہڑا اوہدے نال ہویا سی۔

روتھ: ”میَں اکثر دعاکیتی۔ پر کوئی گل ناں بنی۔ ٹیری فیر وی مر گیا۔“

ٹینر صاحب: ”کیہ تینوں لگدا اے پئی یسوع نے کوئی غلطی کر دِتی اے؟ تُوں کی کہویں گی جے میری کوئی اک بھیڈ بڑی بیمار ہو جاوے تے میَں اوہنوں چُکاں تے اوہنوں ایسی چراگاہ وچ لے جاوان جیہڑی پہلاں نالوں وی چنگی ہووے؟“

روتھ نوں سمجھ آون لگ پئی۔

ٹینر صاحب: ”یسوع ٹیری نوں ایسی تھاں لے گیا اے جتھے اوہ بہت خوش اے۔ ایس لئی تینوں دُکھی ہون دی کوئی لوڑ نئیں اے۔“

روتھ: ”پر اوہناں نے اوہنوں دھرتی وچ دفن کر دِتا اے۔ اوہ چنگے ایالی دے کول کس طرح ہو سکدا اے؟“

ٹینر صاحب نے اک اخروٹ چُکیا۔

ٹینر صاحب: ”ویکھ، روتھ! ایس اخروٹ دے کھولڑ دی کوئی قیمت نئیں اے۔ پر حیاتی ایہدے بالکل اندر موجود اے۔ ایہدے نال ای نواں رُکھ بنے گا۔ توں ٹیری دے جسم نوں ایس کھولڑ نال ملا کے ویکھ۔ ویسے تے اوہ دھرتی وچ دفن اے پر اینہوں ایہدی لوڑ نئیں اے۔ پر اوہدے اندر دا حصہ اوہدی اصلی حیاتی یسوع دے نال اے۔ اوتھے اوہدا جسم نواں ہووے گا جہدے وچ کوئی پیڑ نئیں ہووے گی۔ ایہدے بارے وچ سوچ، روتھ۔“

گھر وچ، فلپ نے محسوس کیتا پئی روتھ ہن دُکھی نئیں ہوندی پئی۔

فلپ: ”روتھ، مینوں چنگے ایالی دے بارے وچ دسن لئی شکریہ تاں پئی میَں اوہنوں جان سکاں۔ ٹیری ہن اوہدے نال اے۔ تے اک دن اسی وی اوہدے کول ٹُر جاواں گے۔“

روتھ: ”تے کل میَں سکول وچ بچیاں نوں چنگے ایالی بارے دسن والی اَں تاں پئی اوہ وی اوہدے بارے وچ جان سکن۔“

تُسی کِنہوں یسوع، چنگے ایالی دے بارے وچ دس سکدے او؟

لوک: بیان کرن والی، ٹینر صاحب، روتھ، فلپ

حقوق: بحق سی ای ایف جرمنی محفوظ نے۔