81. ہوائی ڈاک دے زریعے ناشتہ ۳

ایلیاہ چھیتی نال بادشاہ دے محّل توں ٹُر گیا۔ اک گل پکی سی: اوہ ذرا وی ویلا نئیں سی گوا سکدا کیوں جو بادشاہ آپنی شاہی وچ ایلیاہ نوں مارن لئی کجھ وی کر سکدا سی۔ اوہ ڈردا نئیں سی کیوں جو اوہ جاندا سی پئی خدا وفادار اے تے اوہنوں کلا نئیں چھڈے گا۔

خدا نے بڑی صفائی نال نبی نوں ایہہ آکھیا۔

خدا: ”ایلیاہ، ایتھوں چلا جا۔ مشرق وچ چلا جا تے کریت دے نالے کول جاکے چھپ جا۔ اوتھے توں نالے وچوں پانی وی پی سکنا ایں تے میَں تینوں کھانا وی مہیا کراں گا۔“

کیہ تُسی جاندے ہو خدا نے ایہہ کیتا؟

اوہنے کاں گھلے جیہڑے ایلیاہ لئی گوشت تے روٹی لیاوندے سن۔ ایہہ عجیب کم سچ وچ ہویا سی: خدا نے ہر روز ہوائی ڈاک دے ذریعے شاہ ویلے تے شام ویلے دی روٹی گھلی۔

خدا وفادار اے۔ جیہڑی شے وی اوہدے نوکر نوں لوڑ سی خدا نے اوہنوں دِتی۔ لُکن دا تھاں، کھانا تے پانی۔

بہت سارے لوکاں دی زندگی ایس توں پہلاں مشکل وچ سی۔ نہ مینہ سی، نہ فصل، تے نہ ای کھان نوں کھانا۔ اچانک ای کریت دا نالہ سُک گیا۔ جدوں ایہہ ہویا، تے خدا نے ایلیاہ نوں اک ہور راہ وکھایا پئی صارپت نوں جا جیہڑا شہر دی آخری حدوں پراں سی۔

شہر دے وچ وڑدے ہوئے اوہنے اک عورت نوں پوچھیا:

ایلیاہ: ”مینوں اک پیالے وچ پانی تے روٹی دے۔“

اوس عورت نے دُکھی ہو کے اوہدے ول ویکھیا تے تھکی واج نال بولی:

عورت: ”میرے کول کجھ وی نئیں۔ بس گھڑے وچ اک مُٹھی آٹا اے تے کپی وچ کجھ چووے تیل رہ گیا اے۔ بس میرے کول ایہو کجھ اے۔ میَں آپنے لئی تے آپنے پُتر لئی ایہدے نال کجھ بناواں گی۔ ایہہ ساڈی اک ویلے دی خوراک ہووے گی۔ تے اوہدے بعد ۔۔۔ اسی مر جاواں گے۔“

ایلیاہ: ”ڈر ناں! خدا نے مینوں تیرے کول گھلیا اے۔ اوہنے آکھیا اے پئی جدوں تک ایہہ سوکڑا اے تدوں تک نہ تیرا آٹا مُکے گا تے نہ تیری کپی وچوں تیل گھٹ ہووے گا۔“

خُدا وفادار اے! اوہ جو وی وعدہ کردا اے اوہنوں پورا کردا اے۔

نہ آٹا مُکیا؛ تے نہ کپی وچوں تیل مُکیا جد کہ اوہ عورت روز کجھ نہ کجھ پکاﺅن لئی اوہناں دوہنواں شیواں نوں ورتدی سی۔ ایلیاہ نبی، عورت تے اوہدا پُتر روز کھانا کھاوندے سن۔ کیہ ایہہ عجیب گل نئیں!

خُدا وفادار اے! تُسی سدا اوہدے اُتے بھروسہ رکھ سکدے ہو!

لوک: بیان کرن والی، خُدا، ایلیاہ، عورت

حقوق: بحق سی ای ایف جرمنی محفوظ نے۔