2. طوفان دا اُٹھنا

اچانک طوفان آیا۔ (آوازاں: طوفان، بدلاں دا گجنا، بارش)

لہراں کشتی نال ٹکران لگیاں تے کشتی نوں ایدھر اودھر دھکن لگیاں۔

طوفان بہت ای خطرناک سی۔ کشتی دے وچ لوکاں نے کشتی نوں گھٹ کے پھڑ لیا۔ اوہ سب لوک بہت ڈر گئے کیونکہ اوہ جاندے سن کہ گلیل دی جھیل وچ آون والا طوفان کنا خطرناک ہوندا اے۔ اک واری فیر اک لہر کشتی نال ٹکرائی۔ طوفان ہور ودھ گیا تے جھیل وچ ہور وی زیادہ شور مچ گیا۔

کی اوہ سارے بچ جاون گے؟

کشتی وچ کجھ لوک مچھیاں پھڑن والے سن۔ اوہناں نے اینج دے کئی طوفان پہلوں وی ویکھے سن، پر ایہہ ہنیری اینی ڈاڈی سی کہ ایس توں پہلوں اوہناں نے اینا وڈا تے خطرناک طوفان نئیں سی ویکھیا۔

شاگرد: ’’مدد کرو! اسی ڈُب رہے آں!‘‘

جدوں ا وہ آپنی جان بچاون وچ لگے دے سن، یسوع پیچھے کشتی وچ لیٹیا ہویا سی— تے سو رہیا سی!

جدوں طوفان بہت ای تیز ہویا تے اوہ دوڑدے ہوئے یسوع دے کول گئے تے چیخ کے کہن لگے:

شاگِرد: ’’یسوع! تہانوں کوئی پرواہ نئیں بھاویں اسی ڈُب جائیے؟ تہانوں ساڈی مدد کرنی چاہیدی اے! اسی ڈُب جاواں گے!‘‘

تسی کیہنوں پکاردے ہو جدوں تہاڈی زندگی دی کشتی نال خوف تے فکر دیاں لہراں ٹکراوندیاں نے۔

یسوع ساریاں دا مالک اے۔ اوہ اٹھ کے کھلوتا تے ہوا نوں پُکار یا۔

یسوع: ’’تھم جا! رُک جا!‘‘

ہوا اک دم رُک گئی تے خاموشی ہو گئی۔ سارا کجھ اینج ہو گیا جیویں کوئی طوفان آیا ای نئیں سی۔

شاگِرد ایس معجزے نوں ویکھ کے حیران ہو گئے۔

شاگِرد: ’’یسوع کو ن اے ؟ ہوا تے لہراں وی ایہدا حُکم مندیاں نے!‘‘

یسوع مالک اے: اوہ ہر طرح دی قدرت دا مالک اے تے بیما ریاں تے سب بدروحواں اُتے وی اوہدا اختیار اے۔ تے یسوع ای موت اُتے وی اختیار رکھدا اے۔

کوئی وی اوہدے جیہا نئیں، تے کوئی وی اوہ کم نئیں کر سکدا جو کہ اوہنے کیتے۔

تے شاگرداں نے سوچیا کہ اوہ، کشتی تے یسوع وی ڈُب جاون گے۔

یسوع: ’’تہاڈا ایمان کتھے وے؟ تسی کیوں ڈردے او؟‘‘

اوہناں نوں آپنے نال اوہو سوال کرن دی لوڑ سی جیہڑا یسوع نے اوہناں نال کیتا۔

یسوع تہاڈی زندگی وچ آون والیاں لہراں دا مالک اے۔

اوہدے نال ضرورت، پریشانی، سکول وچ مشکلاں تے بیماری دیاں لہراں بارے گل کرو۔

یسوع مالک اے، ایس لئی ڈرو نہ، بلکہ اوہدے اُتے بھروسہ رکھو۔

لوک: بیان کرن والی، شاگرد، یسوع

حقوق: بحق سی ای ایف جرمنی محفوظ نے۔