851. مردکی لئی انعام ۳

ملکہ آستر بڑی ہمت والی سی۔ بغیر سدے دے، اوہ فارس دے بادشاہ کول ٹُر گئی۔ ایہہ کرن نال اوہنے آپنی جان نوں خطرے وچ پا لیا۔ پر فیر وی اوہنے ایہہ کیتا کیوں جو اوہ آپنے لوکاں نوں بچانا چاہندی سی، یہودیاں نوں۔

بادشاہ اخسویرس آپنے تخت اُتے بیٹھا سی۔ اوہنے آستر نوں آوندیاں ویکھ لیا۔ اوہنے آپنا سونے دا عصا اوہدے وَل رکھیا، جہدا مطلب سی پئی اوہنوں آون دی اجازت اے۔

بادشاہ: ”ملکہ آستر توں کیوں آئی ایں؟ توں کیہ چاہندی ایں؟“

آستر: ”میرے بادشاہ سلامت، مہربانی کر کے اج ہامان نوں لے کے میرے نال کھانا کھان آﺅ۔“

بادشاہ: ”نوکرو، چھیتی جا کے ہامان نوں لے آﺅ۔ ملکہ نے سانوں کھانے تے سدیا اے۔“

آستر نے اوہناں لئی مزے دار کھانا تیار کیتا۔

بادشاہ: ”ملکہ آستر، کیہ توں اجے وی کجھ چاہندی ایں؟ میَں تہانوں آپنی ادھی بادشاہی تیک دے سکدا اَں۔“

آستر: ”مہربانی نال تسی کل فیر ہامان نوں لے کے کھان لئی آیو جے۔ تد میَں تہانوں آپنی خواہش دساں گی۔“

بڑی تسلی نال ہامان بڑے چنگے مزاج وچ آپنے گھر مُڑ گیا تے شیخی مارن لگیا۔

ہامان: ”میَں ایڈا وڈا افسر اَں۔ مینوں بادشاہ دے نال ملکہ نے کھانے تے بلایا۔ بس مینوں! کل فیر بلایا اے۔ پر ایہہ اک شے مینوں اجے تیک سمجھ نہیں پئی آوندی: مردکی مینوں سیس نہیں نواندا۔“

بیوی: ”تے کیہ توں اوہنوں ایس طرح ای چھڈ دیویں گا؟ اوہنوں سوُلی چاڑھ دے، اوس یہودی نوں!“

آستر نے ناں ویکھیا پئی ہامان نے اوہدے مترئے پیو لئی پھا لایا سی۔ ایہہ پھا ۰۸ فُٹ اُچا سی۔ پر خدا نوں ایہہ دِسیا۔ اوہ حکومت کردا اے! تے ایسے لئی اوہنے بادشاہ اخسویرس نوں ساری رات سون ناں دِتا۔

بادشاہ: ”نوکرو، مینوں نیندر نہیں پئی آوندی۔ میرا روزنامچہ لے آﺅ۔ تے اُچی واج وچ پڑھو اجے جو جو کجھ ہویا اے۔“

روزنامچے تھوں پتہ لگا پئی مردکی نے بادشاہ دے خلاف ہون والی سازش نوں روکیا۔

بادشاہ: ”مردکی نوں ایہدے بدلے وچ کیہ انعام دِتا گیا؟“

نوکر: ”کجھ وی نہیں دِتا گیا۔“

اگلے دن ہامان محل وچ آیا۔ اوہ بادشاہ تھوں اجازت لینا چاہندا سی پئی مردگی نوں پھا لا دیوے۔

بادشاہ: ”ہامان، مینوں اوس بندے نوں کیہ دینا چاہیدا اے جہدا بادشاہ شکریہ ادا کرنا چاہندا ہووے؟“

ہامان نوں یقین سی پئی بادشاہ اوہنوں انعام دینا چاہندا اے۔

ہامان: ”اوہنوں بادشاہ دا چوغہ پوانا چاہیدا اے تے تاج تے بادشاہ دے گھوڑیاں وچوں اک اُتے بٹھانا چاہیدا تے گلیاں وچ پھیرنا چاہیدا اے۔ بادشاہ دے اک نوکر نوں اوہدے نال نال ٹُرنا چاہیدا اے تے اعلان کردے جانا چاہیدا اے: ایہہ اوہ بندہ اے جنہوں بادشاہ عزت دینا چاہندا اے۔“

بادشاہ: ”ہامان مردکی لئی ایس طرح ای کر!“

ہامان دے رنگ اُڈ گئے۔

اگلے ڈرامے وچ، تُسی سُنو گے پئی بائبل دی ایہہ کہانی کس طرح جاری رہی۔

لوک: بیان کرن والی، بادشاہ، آستر، ہامان، عورت، نوکر

حقوق: بحق سی ای ایف جرمنی محفوظ نے۔