53. یروشلیم وچ مُلاقات

ہر تھاں دے لوک آئے۔ بتھیرے دوجے مُلکاں وچوں آئے۔ اوہ یروشلیم وچ پینتیکوست دی عید مناون آئے سن۔ ہزاراں لوک گلیاں وچ پھردے پئے سن۔ اوسے دِن، یسوع دے چیلے اک گھر وچ دعا کرن لئی اکٹھے ہوئے۔ اچانک اوہناں شور سُنیا، ہنیری۔ جیہڑے لوک باہر سن اوہناں وی ایہہ شور سُنیا۔ ایہہ کیہ ہو سکدا اے؟

کجھ ہور وی ہویا۔ چیلیاں دے سِراں اُتے اگ والیاں زباناں دِسیاں جیہڑیاں اوہناں اُتے ٹھہریاں رہیاں۔ ایس معجزے دا کیہ مطلب اے؟

ایہہ ایڈا چنگا تجربہ یسوع ولوں اک تحفہ سی۔ اوہنے آپنے چیلیاں نوں روح القدس دِتا۔ اوہ آپنے دوستاں نوں نئیں سی بھلیا۔ روح القدس دی وجہ توں، یسوع سدا آپنے بچیاں دے نال اے۔ اوہ تسلی دین والا، صلاح دین والا تے ساتھ دین والا اے۔ اوہدےسببوں خدا دے بچے سدا یسوع دے نال جُڑے رہندے نے جیہڑا کہ اسمان اُتے وے۔

گھر دے سامنے، لوک کٹھے ہوئے سن تے حیران سن۔

بندہ: ”ایس سب دا کیہ مطلب اے؟“

خوشی نال بھرے ہوئے، چیلیاں نے لوکاں نوں یسوع دے بارے وچ دسیا۔ ذرا سوچو، اوہ لوک جیہڑے دوجے مُلکاں وچوں آئے سن اوہناں نوں وی چیلیاں دیاں گلاں سمجھ آرہیاں سن۔ ہر کسے نوں یسوع دے دوستاں دیاں گلاں آپنی بولی وچ سمجھ آ وندیاں پیاں سن۔ چیلے اوہناں بولیاں وچ بول رہے سن جیہڑیاں اوہناں کدی سیکھیاں وی نئیں سن۔ ایہہ سب کجھ جیہڑا ہو ندا پیا سی ایہدا سبب یسوع سی۔

کجھ لوکاں نے ٹھٹھے مارے:

ٹھٹھے مارن والا: ”او، تُسی سارے نشے وچ او۔ اوہ وی دن دہاڑے!“

فیر پطرس بولیا:

پطرس: ”نئیں، اسی نشے وچ نئیں اَں۔ خدا نے آپنا وعدہ یاد رکھیا تے آپنا روح القدس، ساڈے لئی بھیجیا اے۔“

اوہ دلیری نال، یسوع دے بارے وچ ہور بولن لگ پیا، کہ کس طرح اوہنے آپنی جان دِتی تے فیر جی اُٹھیا تے ہن جیوندا اسمان اُتے وے۔

آدمی: ”کیہ ایہہ پطرس اے، اوہ جیہڑا یسوع نوں جاندا وی سی تاں وی اوہنے اوہدا انکار کیتا سی؟“

عورت: ”ایہہ اوہ ای اے۔ ایہہ ہن تھوڑا جیہا وی ڈریا ہویا نئیں پیا لگدا۔ ایہہ بالکل بدل گیا اے۔“

یسوع نے روح القدس دے وسیلے، پطرس نوں اک دلیر گواہ بنا دِتا۔ تے پطرس نے جو کجھ آکھیا اوہ بھیڑ وچ لوکاں دے دِلاں وچ اُتر گیا۔

آدمی: ”سانوں کیہ کرنا چاہیدا اے؟“

عورت: ”اساں بہت سارے بُرے کم کیتے نے۔“

پطرس: ”یسوع اُتے ایمان رکھو، تے خدا تہانوں معاف کرے گا تے تہانوں وی روح القدس ملے گا۔“

۰۰۰۳ لوکاں نے ایسے طرح کیتا۔ اوہناں نے دعا وچ یسوع نوں پکاریا تے بچ گئے۔ ایس پینتیکوست دے بعد، چیلیاں وچ اک نوی خوشی سی۔

لوک: بیان کرن والی، ٹھٹھے مارن والا، پطرس، آدمی، عورت

حقوق: بحق سی ای ایف جرمنی محفوظ نے۔