Home -- Malagasy -- Perform a PLAY -- 035 (Rendezvous in Jerusalem)
35. Fotoana hihaonana any Jerosalema
Tonga avy any amin'ny toerana rehetra ny olona. Maro ireo avy any ivelany. Tonga tany Jerosalema izy ireo mba hankalaza ny Pentekosta. Olona an'arivony no mandeha eny an-dalambe. Tamin'io andro io dia nivory tao amin'ny trano iray ny mpianatr'i Jesoa Tompo mba hiara-mivavaka. Tampoka teo dia naheno feon'ny rivotra mahery izy ireo. Tsikaritry ny olona avy any ivelany ihany koa izany feo izany.
Mety ho inona àry izany?
Nisy zavatra hafahafa nitranga. Ary ny lelafo, toy ny lela mitarehin'afo, nidina tamin'ny tsirairay tamin'izy ireo.
Inona no dikan'io fahagagana io?
Fanomezana avy tamin'i Jesoa io tranga mahafinaritra io. Nomeny ny Fanahy Masina ny mpianany. Tsy nanadino ny namany Izy. Amin'ny alalan'ny Fanahy Masina dia miaraka amin'ny mpianany mandrakariva i Jesosy. Izy no Mpampionona sy Mpanolo-tsaina izay miaraka amintsika. Amin'ny alalany dia afaka mifandray foana amin'i Jesoa any an-danitra ny zanak'Andriamanitra.
Mitanatana vava, tsy nahateny ny olona teo anoloan'ny trano.
Vahoaka: "Inona no dikan'izany?"
Feno fifaliana ireo mpianatra ka lasa niresaka tamin'ny vahoaka momba an'i Jesoa. Alaivo sary an-tsaina hoe na dia ireo olona avy any amin'ny firenena hafa aza dia afaka mahatakatra izay ambaran'izy ireo. Samy nandre ny naman'i Jesoa niteny tamin'ny fiteniny avy izy ireo! Niteny tamin'ny fiteny tsy mbola nianarany mihitsy izy ireo! Jesoa no namela izany rehetra hitranga.
Ny sasany naneso hoe:
Mpanesoeso: "Hay, be loatra ny zavatra nosotroinareo – Vao maraina dia mamo ianareo!"
Ary hoy Petera:
Petera: "Tsia, tsy mamo izahay. Andriamanitra no nitana ny teny fikasany, ary naniraka ny Fanahiny Masina ho anay."
Nanohy niresaka momba an'i Jesoa tamin'ny heri-po sy fahasahiana izy. Nazavainy ny fomba nahafatesany sy nitsanganany tamin'ny maty, ary ny nandehanany any an-danitra ankehitriny.
Lehilahy: "Tsy i Petera ve io, ilay avy nandà an'i Jesoa?"
Vehivavy: "Izy mihitsy io, tsy sary tahotra intsony izy. Niova tanteraka izy."
Tamin'ny alalan'ny Fanahy Masina no nanaovan'Andriamanitra an'i Petera ho vavolombelona mahafatra-po. Nanohina ny fon'ny vahoaka ny zavatra nolazain'i Petera.
Lehilahy: "Inona àry tokony hataonay?"
Vehivavy: "Nanao zavatra ratsy maro izahay."
Petera: "Minoa an'i Jesoa Tompo, dia hamela heloka anareo Andriamanitra, ary handray ny Fanahy Masina ianareo."
Olona 3.000 no nanao izany. Nivavaka niantso an'i Jesoa izy rehetra dia voavonjy. Taorian'io fankalazana ny Pentekosta io dia nanana fifaliana vaovao ireo mpianatra.
Mpandray anjara: Mpitantara, vahoaka, mpanesoeso, Petera, lehilahy, vehivavy
© Zon'ny mpamorona: CEF Alemaina