11. خداوند یسوع دا جنم

(بہت سارے قدماں دی واج)

بادشاہ دا پیغام دین والا: ’’ناصرت دے لوکو! ایدھر آؤ تے بادشاہ دا پیغام سُنو! سارےلوکاں دے نا ں لِکھے جاون گے۔ ایس مُلک دے ہر شہری نوں جا کے آپنے آپنے پنڈ وچ آپنی گنتی لئی ناں لکھواونے ہون گے۔
اونج تے ایہہ کوئی خوشخبری نئیں۔ پر جدوں تہاڈا ناں لکھ کے تہانوں گِن لیا جاوے تے فیر تسی مڑ کے آ سکدے ہو۔
ایہہ قانون ساریاں نوں مننا پَوے گا!یاد رکھو: بادشاہ بڑا ڈاہڈا اے۔‘‘

ناصرت دے سب لوکاں نوں ایہہ حُکم چنگا نہ لگیا۔ بہت سارے لوک اُداس ہوئے۔ بادشاہ دا حُکم اوہناں دے منصوبیاں دے مطابق نئیں سی پر ایہہ سب خُدا دے منصوبے دے مطابق سی۔

مریم تے یوسف نے وی ایس لمبے سفر لئی تیاری کرنی سی۔ یوسف داؤد دی نسل وچوں سی، ایہو وجہ سی پئی اوہنوں وی مڑ کے بیت لحم جانا پیا، جتھے ا وہ پیدا ہویا سی۔

سفر کرن وچ مزا تے بڑا آوندا اے، پر اودوں مزا نئیں آوندا جدوں تہانوں ٹُر کے۰۶۱ میل داسفر کرنا ہووے!

مریم لئی تے سفر کرنا بہت ای مشکل سی کیوں جو اوہدا پہلا بچہ پیدا ہون والا سی۔

اوہ پہلاں توں جاندی سی پئی اوہ خُدا دے پُتر نوں جمن والی اے کیوں جو فرشتہ اوہنوں ایہہ خوشخبری پہلاں توں دے چُکیا سی۔

یسوع، دنیا نوں بچاون والا-ایہہ خُدا دا بھلیائی دا منصوبہ سی۔

بیت لحم داسفر تے ختم ای نئیں سی ہو رہیا۔ اوہ پنج دن توں سفر کر دے پئے سن۔ مریم تے یوسف نے آپ تے ایہہ منصوبہ نہیں سی بنایا۔پر ایہہ خُدا دے منصوبے دا حصہ سی ایس لئی اوہناں نے خُدا دی گل سُنی۔

بیت لحم وچ اوہ بہت پریشان ہوئے۔

سرائے دا مالک: ’’کجھ وی نئیں ملے گا۔ ہر کمرے وچ لوک نے۔ کِتے ہور پتہ کرو۔ جاو ایتھو، ایتھے تہاڈے لئی کوئی تھاں نئیں۔‘‘

اوہ جتھے وی جاوندے اوہناں نوں تھاں نہ ملدی۔

آخر اوہناں نوں اک گدام وچ تھاں لبھی۔

اک گدام جہیڑا کہ خُدا دا منصوبہ سی۔

تے فیر ادھی رات دے ویلے، اک معجزہ ہویا۔

یسوع پیدا ہویا۔ مریم نے یسوع نوں لے کے تے اوہنوں کپڑے وچ ولیٹ کے کھُرلی وچ رکھیا۔

خُدا دا منصوبہ پورا ہویا۔

سوچو ۰۰۷ سال پہلاں ایہہ ہویا، خُدا نے پہلاں ای ایہہ عہد کیتا سی پئی مسیح بیت لحم وچ پیدا ہو وے گا۔

خُدا نے دنیا نال جیہی محبت رکھی پئی اوہنے آپنے منصوبے نوں پور اکیتا تے آپنے پُتر نوں ساڈے کول گھلیا۔

لوک: بیان کرن والی، بادشاہ دا پیغام دین والا، سرائے دا مالک

حقوق: بحق سی ای ایف جرمنی محفوظ نے۔