431. رُوکو ۲

کُڑی: ”شاگردی دا زمانہ پہلا حصہ۔ اج اسی ٹھہرن دے نشان نوں ویکھاں گے!“

(ٹریفک دی واج)

مُنڈا: ”کیہ اوہ پاگل اے؟ اوہ رکن والے نشان دے کولوں بڑی تیزی نال لنگ گیا۔“

کُڑی: ”ہوسکدا اے اوہ چھیتی وچ ہووے۔“

بائبل وچ اسی اک بندے بارے پڑھدے اَں، اوہ وی چھیتی وچ سی۔ اوہدے بارے کوئی نہیں جاندا سی۔ ہر کوئی اوہدے کولوں ڈردا سی۔ اوہ قتل دےارادے رکھدا سی۔ بے قصور لوکاں اُتے ظلم کردا ہوندا سی۔

ساﺅل: ”اسی ہر مسیحی نوں مٹا دیاں گے۔ ہر اوس بندے نوں جیہڑا آکھدا اے پئی یسوع خدا دا پُتر اے۔ آﺅ دمشق چلئے۔“

اوہ عورتاں تے مرداں نوں گرفتار کرنا چاہندا سی۔ سردار کاہن نے اوہنوں ایہہ کرن دی اجازت دِتی سی۔

(ٹُرن دی واج) ساﺅل بڑا تیز ٹُردا پیا سی۔ پر اچانک اوہ ٹھہر گیا۔

آسمان تھوں اوہدے اُتے نور چمکیا۔

یسوع: ”ساﺅل! ساﺅل! توں کیوں میرے اُتے ظلم کردا پیا ایں؟“

ساﺅل: ”خداوند، توں کون ہے؟“

یسوع: ”میَں یسوع اَں، جنہوں توں دُکھ دیندا پیا ایں۔ اُٹھ کے کھلو جا۔ دمشق نوں جا تے اوتھے تینوں پتہ لگے گا پئی میَں کیہ چاہندا اَں پئی توں کریں۔“

ساﺅل دے نال جیہڑے لوک سن اوہناں نے وی واج سُنی پر اوہناں نوں کجھ دِسدا نہیں سی پیا۔ جدوں ساﺅل اُٹھ کے کھلوتا، اوہ انھا سی۔ اوہدے ساتھی اوہنوں شہر وچ لے گئے۔

یسوع نے ساﺅل نوں روکیا۔ تد اوہنے محسوس کیتا پئی اوہ غلط راہ اُتے ٹُردا پیا سی۔ اوہدا خیال سی پئی اوہ خدا اُتے ایمان رکھدا اے۔ پر ایہہ سچ نہیں سی! مسیح دے بغیر اسی سارے حیاتی دےغلط راہواں اُتے ٹُردے ہوندے اَں۔ اسی اوس راہ اُتے ہوندے اَں جیہڑا آسمان اُتے نہیں لے کے جاندا۔ ایہہ خطرناک راہ اے۔ ایس لئی یسوع نے ساﺅل نوں روکیا تے اوہدے نال دوجیاں نوں وی۔

کُڑی: ”میَں کدی نور نہیں ویکھیا۔“

خدا دے روکن دے اشارے ہر کسے لئی وکھرے ہو سکدے نے۔

مُنڈا: ”ایہہ کوئی حادثہ ہو سکدا اے یا کوئی بیماری، مثال دے طور تے۔ ایہہ تہاڈے لئی کیسا سی؟“

میرے لئی ”ٹھہرن دا نشان“ اک وعظ سی۔ خدا اکثر لوکاں نوں وی ٹھہرن دا نشان بنا کے دوجے لوکاں لئی استعمال کر سکدا اے۔

کُڑی: ”تے فیر ساﺅل دے نال کیہ ہویا؟“

اوہنے اقرار کر لیا پئی اوہ غلط راہ اُتے ٹُردا پیا سی تے فیر اوہنے دعا کیتی۔ تین دن بعد اک بندہ اوہنوں ملن آیا۔

حننیاہ: ”میرے پیارے بیلی ساﺅل، مسیح خداوند نے مینوں تیرے کول گھلیا اے تاں جو توں فیر ویکھ سکیں۔ روح القدس نال بھر جا، جیہڑا ساری حیاتی لئی تینوں زور بخشے گا۔“

اوسے ویلے ساﺅل نوں فیر دِسن لگ پیا۔

مُنڈا: ”تے فیر؟“

اوہ مسیحی جنہاں نوں اوہ جانوں مارنا چاہندا سی اوہ اوہدے ساریاں نالوں چنگے بیلی بن گئے۔ تے اوہ دوجے بہت سارے لوکاں نوں یسوع دے کول لیایا تے اوہناں نوں وی سیدھا راہ وکھایا۔

لوک: بیان کرن والی، کُڑی، مُنڈا، ساﺅل، یسوع، حننیاہ

حقوق: بحق سی ای ایف جرمنی محفوظ نے۔