331. حیاتی دا سکُول ۱

شاگردی دے زمانے وچ جی آیاں نوں۔

کُڑی: ”ساڈے نال آﺅ تہانوں مزہ آوے گا۔“

(گلی دے شور دی واج: ٹیراں دی رگڑ دی واج، گڈیاں دا شور، سیکلاں دی گھنٹیاں وجن دی واج۔۔۔)

مُنڈا تے کُڑی اک دے بعد دوجا: ”صحیح رستہ چُنو۔ ایتھے گڈی کھلارنی منع اے۔ خطرناک موڑ۔ چِٹا تے لال نشان۔ میَں کِتھے اَں؟ میَں کِتھے جانا اے؟ ٹھہرو۔ آگاہی: تِلکن والی برف۔“

اینے سارے اشارے۔ تے سارے وکھو وکھ راہ دسدے نے۔ سڑک دے کنڈے ٹریفک دے اشارے تے نشان بڑے ضروری نے۔ ایہہ ایس لئی نہیں ہوندے پئی تہانوں مُڑ گھلیا جاوے یا تہاڈا پینڈا ودھایا جاوے، سگوں تہاڈی راکھی لئی تے تہانوں منزل تیک پہنچان لئی ہوندے نے۔

بائبل وچ وی خدا نے کجھ نشاناں نوں رکھیا اے تہاڈی حیاتی دے پینڈے لئی۔ اوہ آپنے حکماں دے وسیلے ساڈیاں مشکلاں نہیں ودھانا چاہندا، سگوں ساڈی حیاتی دی راکھی کرنا چاہندا اے۔ جیہڑا وی اوہدے حکماں دی پیروی کردا اے اوہ آپنی منزل تیک آپڑدا اے۔

کُڑی: ”شاگردی دے زمانے وچ ساڈے نال چلو۔“

مُنڈا: ”مینوں یقین اے میَں امتحان وچ کامیاب ہو جاواں گا۔“

حیاتی دا پینڈا بڑا سوہنا اے۔

ایہدے دو راہ نے، پر اسی اوہناں وچوں اک چُن سکدے اَں۔ بائبل اک سڑک دے نقشے وانگ اے۔ ایہہ سانوں دسدی اے پئی اسی کس راہ اُتے ٹُردے پئے اَں۔

پڑھن والا: ”تنگ رستے توں داخل ہوو۔ جیہڑا راہ کھلا اے اوہ بربادی وَل لے کے جاندا اے۔ بہتے لوک ایسے راہ اُتے جاندے نے۔ پر جیہڑا راہ تنگ اے اوہ سیدھا اےتے سدا دی حیاتی وَل لے کے جاندا اے۔ بڑے گھٹ لوک نے جیہڑے ایس تنگ راہ نوں چُنندے نے۔“

بائبل اک راہ دسن والے کھمبے وانگ اے۔ ایہہ سانوں دسدی اے پئی خدا تیک اپڑن دا اکو راہ اے یسوع مسیح۔

پڑھن والا: ”یسوع آکھدا اے: راہ، حق تے حیاتی میَں اَں؛ کوئی میرے وسیلے دے بغیر باپ دے کول نہیں آوندا“ (یوحنا ۴۱: ۶)۔

جدوں ساڈی حیاتی دے پینڈے وچ مشکلاں آوندیاں نے، جس طرح پئی اسی کسی ہنیری راہ اُتے ٹُردے ہوئیے تے سانوں راہ ناں دِسدا ہووے، تے اسی بائبل وچ لبھ سکدے اَں، کیوں جو ایہہ نور وانگ اے، اک چنگی لو وانگ اے۔ تے یسوع ساڈے شاگردی دے زمانے وچ ساریاں نالوں ودھیا اُستاد اے۔ اوہ تہاڈی حیاتی وچ تہاڈے نال چلنا چاہندا اے۔ بھاویں تُسی ڈِگے ہوئے ہو یا دُور ہو، یا کوئی حادثہ ہویا اے، اوہ تہاڈے نال رہوے گا تے تہانوں اکلا نہیں چھڈے گا۔ ایہہ اوہنے وعدہ کیتا ہویا اے۔

پڑھن والا: ”مصیبت دے دن میرے اگے مِنت کر؛ میَں تینوں چھڈاواں گا تے تُوں میری تمجید کریں گا“ (زبور ۰۵: ۵۱)۔

مشکل وچ دعا ساریاں نالوں پہلاں کم آوندی اے۔ آزما کے ویکھو!

میری دعا اے تہاڈی حیاتی دا پینڈا چنگا لنگے۔

ٹھہرو اگلی کہانی وچ پینڈا چلدا رہوے گا۔

لوک: بیان کرن والی، کُڑی، مُنڈا، پڑھن والا

حقوق: بحق سی ای ایف جرمنی محفوظ نے۔