Home -- Punjabi -- Perform a PLAY -- 023 (Peter starts again 8)
!ڈرامے- ایناں نُوں اپنے بیلیاں لئی ادا کرو
بچیاں دے ادا کرن لئی ڈرامے
32. پطرس فیر شُروع کردا اے ۸
منڈا: ”پطرس نوں کیہ ہویا اے؟“
کُڑی: ”اوہ اج بڑا وکھرا جیہا لگدا پیا اے۔“
منڈا: ”اج اوہ روز وانگ مخول وی نئیں کردا پیا۔“
کُڑی: ”تے اوہ بڑا چپ چپ لگدا پیا اے۔“
پطرس بڑا ای پریشان تے دُکھی لگدا پیا سی۔ اوہدے لک نال ہر ویلے اک بھارا تھیلا ہوندا سی جیہڑا نظر نئیں سی آوندا، اوہدے وچ کی ہوندا سی؟ پطرس اوہدے بارے کدی گل وی نئیں سی کردا۔
اک عجیب گل ایہہ سی پئی جدوں وی اوہ سنڈے سکول وچ ہوندا سی تے اوس ویلے اوہنوں آپنے تھیلے دا بھار بہتا لگدا سی۔ پطرس نوں ایہہ پتہ سی پئی جدوں تیک ایس تھیلے دا بھار اوہدے موہڈیاں اُتے وے تدوں تیک خدا اوہدے توں خوش نئیں ہو سکدا۔ اوہ ایسے سوچ وچ آپنے گھر ٹُر گیا۔ اوہ کلا رہنا چاہندا سی تے سیدھا آپنے کمرے وچ ٹُر گیا۔
اوہ بس اوسے سوچ وچ سی جیہڑے بھار نوں اوہ آپنے لک نال لے کے پیا پھردا سی۔
۔۔۔ اوہ شیواں جیہڑیاں اوہنے ہٹی توں چوری کیتیاں سن۔
۔۔۔ اوہ پیسے جیہڑے اوہنے آپنی ماں دے بٹوے وچوں چوری کیتے سن۔
۔۔۔ جھوٹ تے گندے مخول جنہاں نال اوہ لوکاں نوں ہساوندا سی۔
پطرس نوں پتہ سی پئی اوہ سدا ایس بھار دے نال نئیں جیو سکدا۔ خیر اوہ ایہہ جاندا سی پئی بائبل وچ جیہڑیاں گلاں لکھیاں نے اوہناں دے مطابق یسوع ہر شے نوں نواں بنا سکدا اے۔ اک نواں آغاز جیہڑا پطرس چاہندا سی تے ایس لئی اوہنے ایسا کم کیتا جیہڑا اوہنے پہلاں کدی نئیں سی کیتا: اوہنے دُعا منگی۔ پطرس نے بڑی ایمانداری نال یسوع نال گل کیتی تے اوہنوں دسیا پئی اوہ ہر گل واسطے کِنا شرمندہ اے۔
اوہنے اوہدے نال گل کیتی جہنوں اسی وی نئیں ویکھ سکدے، پر اوہ سدا ساڈے نال رہندا اے تے سدا ساڈی سُندا اے۔
پطرس: ”خداوند یسوع، میَں شکر کردا اَں پئی توں مینوں پیار کردا ایں جد کہ توں میرے بارے ہر گل جاندا ایں۔ کرم کر کے مینوں معاف کر دے میرے جھوٹ بولن، چوری کرن تے گندے گندے بول بولن لئی وی۔ میرے دِل نوں صاف کر دے تے میری زندگی وچ آ جا تے میرا مالک بن جا۔ آمین۔“
دُعا دے بعد پطرس نوں بڑا ای سکون ملیا، کیوں جو مسیح ایسیاں دُعاواں دا بڑا چھیتی جواب دیندا اے۔ اوہنے خوشی نال آکھیا:
پطرس: ”شکریہ خداوند یسوع توں مینوں معاف کیتا تے ہن سدا توں میرے نال رہویں گا۔“
لوکاں نوں اینج جاپیا پئی پطرس ہن بدل گیا ہے۔ اوہنے لوکاں نوں آپنی پریشانی دا سبب دسیا، کجھ لوکاں نے تے اوہنوں ٹھٹھے وی مارے تے اوہدی گل نہ سمجھ سکے۔
کیہ تہانوں وی کوئی بھارا جھولا دبدا پیا اے؟
مینوں نئیں پتہ پئی تہاڈے بھارے تھیلے وچ کی اے، پر میَں ایہہ جاندی اَں پئی تُسی ہر گل یسوع نوں ضرور دس سکدے ہو۔ تُسی وی پطرس وانگ کرو!
جے تُسی ایس طرح کرنا چاہندے ہو تے مینوں تہاڈے کولوں ایہہ سُن کے بہت خوشی ہووے گی۔
لوک: بیان کرن والی، دو بچے، پطرس
حقوق: بحق سی ای ایف جرمنی محفوظ نے۔