05. خبردار برفانی تودے دا خطرہ

سوئیزرلینڈ دے پہاڑاں وچ اک مُنڈا آپنیاں بھیڈاں پیا چاردا سی۔ اوہنوں پھُل تے برف دے چمکیلے پہاڑ چنگے لگدے سن۔ اک راہی پہاڑ دے نِکے جہے راہ وچوں نکل کے آیا۔

راہی: ”سلام، تہاڈا ناں کیہ اے؟“

ہنری: ”سلام، میرا ناں ہنری اے۔“

راہی: ”کیہ تُسی ایتھے بالکل کلے او؟“

ہنری: ”ہاں جی، مینوں چھُٹیاں نے تے میَں آپنے پیو دیاں بھیڈاں چارن لئی ایتھے آیاں ہاں۔“

راہی: ”تے تُسی ایّالی او۔ کیہ تُسی چنگے ایّالی نوں جاندے او؟“

ہنری: ”نہیں اوہ کون اے؟“

راہی: ”خداوند یسوع۔ بائبل وچ ایہہ دسیا گیا اے پئی لوکی نافرمان بھیڈاں وانگ نے جیہڑے خوشی نال آپنی راہ اُتے تُردے نے۔ چنگا ایّالی سانوں لبھدا اے۔ اوہ سانوں راہ وکھالنا چاہندا اے تے ساڈا دھیان رکھنا چاہندا اے تے اک دن سانوں آسمان اُتے لے کے جاوے گا۔“

ہنری: ”جدوں میَں مر جاواں گا تے کیہ اوہ مینوں اوتھے لے کے جاوے گا؟“

راہی: ”ہاں جی، تُساں بس اوہنوں آپنا ایّالی بنن لئی آکھنا اے۔“

ہنری: ”میَں ایسے ویلے ایہہ کرنا چاہواں گا۔“

ہنری نے سادی جیہی دُعا کیتی۔ ایہہ دُعا اوہدے دل وچوں نکلی۔ اوہ یسوع دا ہونا چاہندا سی۔

راہی نے جاون تھوں پہلاں ہنری نوں آکھیا:

راہی: ”ہن تھوں سدا تیک تہاڈاتعلق چنگے ایّالی نال اے۔ تُسی ایہہ آکھ سکدے ہو: خداوند میرا ایّالی اے۔ ویکھو، تُسی بائبل دی ایہہ آیت بولن لئی آپنیاں اُنگلاں نوں استعمال کر سکدے ہو۔“

ہنری نے آیت نوں فیر بولیا تے ہر لفظ دے نال آپنی اک اُنگلی کھبے ہتھ اُتے دھری۔ تے اوہنے چوتھی اُنگل نوں زور نال رکھیا تے آکھیا:

ہنری: ”خداوند میرا ایّالی اے۔“

اوہنے خوشی نال آپنے ماں پیو نوں ایس گل بارے دسیا۔ اوہدیاں چھٹیاں مُکیاں تے اوہنے فیر تھوں سکول جانا سی۔

پالا آگیا، تے سوئیزرلینڈ دے پہاڑاں وچ سردیاں بڑیاں خوف ناک وی ہو سکدیاں سن۔ اکثر اوتھے برف دے ٹبّے ڈِگن دا خطرہ ہوندا سی۔

ہنری برف دے اُچے اُچے ٹبّیاں وچوں پیا لنگدا سی۔ اچانک اوہنے گجن دا شور سُنیا۔ اوہ دوڑنا چاہندا سی، پر بڑی دیر ہو چُکی سی۔ طوفان نے اوہنوں گھیر لیا تے برف دے بھارے ٹوٹیاں نے اوہنوں آپنے ہیٹھاں دب لیا۔

جدوں رات ہو گئی، تے اوہدے ماں پیو نوں اوہدی فکر ہوئی۔ اوہناں نے کئی گھنٹے اوہنوں لبھیا۔ آخر جدوں اوہناں نے اوہنوں لبھ لیا، تے اوہناں ویکھیا پئی اوہنے آپنے کھبے ہتھ دی چوتھی اُنگل زور نال دب کے رکھی سی۔ مرن لگیاں، ہنری آپنے چنگے ایّالی نوں یاد کردا پیا سی۔

اوہدے ماں پیو بہت دُکھی سن۔ پر اوہناں نوں ایہہ جان کے تسلّی ہوئی پئی ہنری نوں اک دِن فیر آسمان اُتے ملاں گے۔

اوس دن جدوں اوہ سدا لئی چنگے ایّالی دے نال ہوون گے۔

کیہ تُسی وی ایہہ آکھ سکدے ہو: خداوند میرا ایّالی اے؟

لوک: بیان کرن والی، راہی، ہنری

حقوق: بحق سی ای ایف جرمنی محفوظ نے۔