24. طیفام، چڑیلاں دے ڈاکٹر دی دھی ۱

ہیٹی دے پہاڑاں اُتے سورج چمکیا۔ طیفام آپنے ماں پیو دے نال اک نِکی جیہی کچی جھگی وچ رہندی سی۔ اوہ بہت غریب سن تے ہمیشہ بدروحواں توں ڈردے رہندے سن۔ اوہ سچے خدا دے بارے کجھ نئیں سن جاندے جیہڑا اوہناں نوں پیار کردا سی تے جہنے آکھیا سی: ڈرو ناں کیوں جو میَں تہاڈے نال اَں۔

طیفام دا پیو، چڑیلاں دا ڈاکٹر، اورسٹل، صبح چھیتی اُٹھ دا سی، تے اوہدی ماں گھر دا کم کردی تے پیلیاں وچ وی کم کردی سی۔ طیفام وی اکثر اوہناں دی مدد کردی سی۔

ماں: ”طیفام، اسی کھود کے شکرقندی کڈھاں گے تے کل اوہناں نوں بازار لے کے جاواں گے۔ جا تے جا کے کیلے دے پتّے کٹ تاں جو میَں اوہناں نوں ٹوکری وچ وچھاں سکاں۔“

طیفام: ”جے میَں ایس طرح کراں گی، تے کیہ تُسی مینوں اوہ نوے کپڑے لے کے دیو گے جہدا تُساں میرے نال وعدہ کیتا سی؟“

ماں: ”اسی ویکھاں گے۔“

طیفام نے چھُرا لیا تے کیلے دے پودیاں ول ٹُر پئی۔ اوہدی سہیلی پیلیاںوچوں دوڑدی ہوئی اوہدے وَل آئی۔

مریم: ”طیفام! طیفام!“

طیفام: ”مریم، کل مینوں نوے کپڑے ملن گے، اوہ جنہاں اُتے لکھائی ہوئی ہووے گی۔“

مریم: ”لکھائی؟ تُو تے پڑھ وی نئیں سکدی۔ میَں پہلاں پڑھنا سیکھاں گی تے فیر میَں ایہو جیہا کجھ لواں گی۔“

طیفام: ”کیہ تُو میرے پیو کولوں نواں تعویز لویں گی جہدے نال توں بچی رہویں۔“

مریم: ”نئیں، میَں ہن تعویز نئیں پاوندی۔ ہن اسی مسیحی ہو گئے اَں تے بائبل خریداں گے۔“

طیفام: ”مریم، تُو پاگل ہو گئی ایں! بدروحواں نوں ایہہ سب پسند نئیں۔ تُو بیمار ہو جاویں گی۔“

مریم: ”طیفام، ہن مینوں ڈر نئیں لگدا۔ یسوع بدروحواں نالوں بہتا زور آور اے۔ اوہنے آکھیا اے: ڈرو ناں کیوں جو میَں تہاڈے نال اَں۔ وکٹر نے سانوں بائبل وچوں ایہہ دسیا اے۔“

طیفام: ”ایہہ سب جھوٹ اے، سب جھوٹ۔“

طیفام نے آپنا تعویز پھڑ کے رکھیا تے دوڑ گئی۔

طیفام: ”امّی، مریم ہن تعویز نئیں پاوے گی کیوں جو اوہ مسیحی ہو گئے نے۔“

مسیحی اوہ لوک ہوندے نے جیہڑے یسوع نال تعلق رکھدے نے تے ایس لئی، ہن اوہناں دا تعویز، راس منڈل، ستاریاں دے علم تے ٹونیا نال کوئی لینا دینا نئیں۔

خدا آپنے کلام وچ ایہناں شیواں توں منع کردا اے۔

کیہ تُسی ایس طرح دیاں شیواں اُتے بھروسہ رکھدے ہو، یا تُسی یسوع اُتے بھروسہ رکھو گے؟ اوہ کلا ای تہاڈی رکھوالی کر سکدا اے تے تہاڈی مدد کر سکدا اے۔ اوہ تہانوں وی آکھدا اے: ڈرو ناں کیوں جو میَں تہاڈے نال اَں۔

طیفام نئیں جاندی سی پئی اسی یسوع کولوں دُعا منگ سکدے اَں۔ اوہ سدا ڈردی رہندی سی۔

جد اورسٹل، چڑیلاں دے ڈاکٹر نے، ایہہ سُنیا پئی مریم تے اوہدے ماں پیو مسیحی ہو گئے نے، اوہدا مُنہ دُکھی ہو گیا تے فیر۔۔۔

ایس سچی مسیحی مشنری کہانی وچ اگے کیہ ہویا ایہہ اگلی کہانی وچ دسیا جاوے گا۔

لوک: بیان کرن والی، طیفام، ماں، مریم

حقوق: بحق سی ای ایف جرمنی محفوظ نے۔