77. قبر خالی اے

یسوع دے بیلی اوہدی لاش سولی اُتوں لا کے لے گئے تے اوہنوں اک نوی قور وچ دھریا جیہڑی چٹان وچ کھودی ہوئی سی۔ تے فیر اوہناں نے اک وڈا پتھر دھرو کے اوہدا مُنہ بند کر دِتا۔

(پیچھے کوئی عام گیت یا ساز وجایا جاوے)

کُڑی: ”یسوع نوں سولی چاڑھیا گیا، خدا نے اوہنوں سزا دِتی۔
کیوں جو اسی بڑے پاپی ساں، اوہ مویا۔
اوہ میرے تے تہاڈے لئی مویا۔“

بڑے ای دُکھ دے نال، چیلے کٹھے ہو کے اک گھر وچ بیٹھے تے سارا کجھ یاد کیتا۔ کسے نوں وی ایہہ سمجھ نہ آئی پئی آخر یسوع نے آپنی جان کیوں دِتی۔ پطرس نوں خاص کر بڑا دُکھ ہویا۔ اوہ بہت شرمندہ سی پئی اوہنے یسوع دا انکار کیتا تے تین وار ایہہ آکھیا پئی اوہ یسوع نوں نئیں جاندا۔ اوہ آپنے آپ نوں ایڈا ڈراکل ہوون لئی معاف نئیں سی کرسکدا پیا۔ ہن ویلا لنگ گیا سی۔ کیوں جو یسوع مر گیا سی۔

(پیچھے کوئی عام گیت یا ساز لایا جاوے)

مُنڈا: ”یسوع نے صلیب اُتے جان دِتی، اوہنے ساڈی خاطر آپنا خون وگایا۔
جدوں اسی آپنے پاپ اوہدے کول لیاوندے اَں، اوہ سانوں معاف کردا اے۔
اوہ مینوں تے تہانوں وی معاف کر دیندا اے۔“

اچانک تیزی نال بوہا کھُلیا۔

مریم: ”اوہ جیوندا اے! یسوع جیوندا اے! ہن اوہ قور وچ نئیں اے۔“

دوجی مریم: ”اک فرشتے نے سانوں ایہہ وڈی خوش خبری دِتی۔ پطرس، اوہنے خاص کر سانوں ایہہ آکھیا سی پئی اسی تہانوں ضرور دسئیے۔ یسوع جیوندا اے۔“

پطرس: ”تہانوں آکھیا گیا اے تُسی مینوں دسو پئی یسوع جیوندا اے؟“

پطرس آپنے آپ نوں پیچھے نہ رکھ سکیا۔ اوہ یوحنا دے نال دوڑ کے قور وَل گیا جِنا تیز اوہ دوڑ سکیا اوہ دوڑیا۔ اوہناں نے اندر ویکھیا۔ یسوع دا بدن اوتھے موجود نئیں سی۔ اوہناں نے ویکھیا تے یقین کیتا پئی یسوع مویاں وچوں جیو کھلوتا اے تے ہن فیر جیوندا اے۔ اوہ چھیتی نال مُڑ دوڑے تے دوجیاں نوں ایہہ گل دسی۔

(پیچھے کوئی عام گیت یا ساز لایا جاوے)

مُنڈا تے کُڑی: ”یسوع قور وچ پیا سی، پر اوہ مویا نئیں سی۔
ایسٹر دے دن اوہ فیر جیو کھلوتا، ہیلیلویاہ۔
تہاڈے لئی تے میرے لئی ہیلیلویاہ!“

تہاڈے لئی تے میرے لئی۔ چیلیاں لئی تے پطرس لئی، ہارے ہوئے لوکاں لئی تے اوہناں لئی جنہاں نے بہت سارے بُرے کم کیتے نے۔ یسوع ساڈی تھاں اُتے مویا تے فیر جیو اُٹھیا۔

لوک: بیان کرن والی، مریم، دوجی مریم، پطرس، مُنڈا، کُڑی

حقوق: بحق سی ای ایف جرمنی محفوظ نے۔