811. برفانی گڈی دی ٹکر ۲

تُسی سکول بس دے بجائے برف والی گڈی وچ سکول جانا پسند کرو گے؟ انیتا تے لوقس جیہڑے سوئیٹزر لینڈ دیاں چوٹیاں اُتے رہندے سن، روز چھیتی وچ آپنی برف والی گڈی اُتے وادی وَل جاندے سن۔ پر کٹھے نہیں کیوں جو اوہ کٹھے نہیں کھلو سکدے سن۔ ایہہ کیوں ایڈا مشکل سی کٹھیاں رہنا؟ تے فیر منگل دے دیہاڑے ایس طرح ہویا۔ لوقس نہیں چاہندا سی پئی ایس طرح ہووے۔ اوہدی ایسی کوئی نیت نئیں سی۔ جدوں اوہ تیزی نال آپنی برف والی گڈی چلاندا پیا سی، اوہنے انیتا دی برف والی گڈی نوں ٹکر مار دِتی تے اوہ دونہویں نالے وچ ڈگ پئے۔

انیتا: ”اوہ پئی! توں دھیان نال نئیں چلا سکدا؟ تیریاں اکھاں ہےنیں کہ نہیں؟“

لوقس: ”انیتا، مینوں معاف کر دے۔ ٹھہر میَں تیری مدد کردا اَں۔“

انیتا: ”مینوں کلا چھڈ دے! میَں تیری مدد دے بغیر وی کھلو سکدی اَں۔“

لوقس: ”ایڈی پریشان نہ ہو، چھلی کُڑی۔“

اوہنوں ٹھنڈ لگدی پئی سی تے گیلیاں کتاباں دے نال، انیتا بڑی دیر نال سکول اپڑی۔

اُستانی: ”انیتا، کیہ ہویا اے؟“

انیتا: ”ایہہ لوقس دی غلطی اے۔ اوہنے مینوں نالے وچ دھکا دِتا۔ تے فیر اوہ دوڑ گیا تے مینوں اکلا چھڈ دِتا۔“

ہر کسے نوں انیتا اُتے ترس آیا، تے اوہناں نے لوقس وَل غصّے نال ویکھیا۔ کوئی وی نہیں جاندا سی پئی اندروں انیتا وی اونی ای بُری سی جِنا لوقس۔ ہر کسے نے آپنی جماعت دی اوس چنگی چیلی دی حمایت کیتی جہدی ماں مر گئی ہوئی سی۔

لوک اوہ ای ویکھدے نے جیہڑا باہروں دِسدا اے، پر خدا ساڈے دلاں دے اندر وی ویکھدا اے۔

اک ہولی جیہی واج نے لوقس تے انیتا نوں دسیا پئی حسد کرنا گناہ اے۔ پر اوہناں دونہواں وچوں کوئی وی پہل نہیں سی کرنا چاہندا۔ تے حالات بہتے خراب ہو گئے۔

بہار دے موسم وچ جدوں برف کھُر گئی، لوقس ڈینی نوں ملیا جیہڑا آپنی بلی دے بچے نال پہاڑاں وچ کھیڈدا پیا سی۔

لوقس: ”توں ایہہ کیہ کردا پیا ایں؟“

ڈینی: ”میَں انیتا لئی پھُل توڑدا پیا اَں۔“

لوقس: ”چنگا، چنگا، انیتا لئی۔ تیری بہن پاگل اے!“

لوقس نے ڈینی کولوں پھُل کھو لئے، اوہناں نوں تھلے سُٹ دِتا تے مِد دِتا۔

ڈینی: ”میَں آپنے ابو نوں دساں گا۔“

لوقس: ”نہیں توں ایس طرح نہیں کر سکدا۔“

لوقس نے ڈینی کولوں بلی دا بچہ لے لیا تے اوہنوں ڈوہنگے نالے دے اُتے ٹنگیا۔ فیر سب کجھ بجلی وانگ تیزی نال ہویا۔ سنووائٹ نے لوقس نوں نوندراں ماریاں تے اوہنے اوہنوں ڈوہنگی تھاں وچ سُٹ دِتا۔

ڈینی جیہڑا پئی صرف پنج سال دا سی اوہنے وی ایہدے پیچھے چھال مار دِتی، تِلکیا تے نالے وچ جا ڈِگیا۔ ڈریا ہویا لوقس تھلے ویکھن لگ پیا۔

لوقس: ”ڈینی! ڈینی، کیہ توں اجے و جیوندا ایں؟ کجھ بول!“

کوئی جواب نہ ملیا۔ لوقس نے آپنے آسے پاسے ویکھیا تے گھر دوڑ گیا۔ اوہ گودام وچ لُک گیا تے روندا گیا روندا گیا۔

فیر کیہ ہویا؟ تہانوں اگلی کہانی وچ پتہ لگے گا۔

لوک: بیان کرن والی، انیتا، لوقس، اُستانی، ڈینی

حقوق: بحق سی ای ایف جرمنی محفوظ نے۔