76. یسوع دا ثبوت

سارہ: ”میَں کس طرح ایہہ یقین کر لواں پئی ایہہ سب سچ اے؟“

کیہ مطلب اے تہاڈا؟

سارہ: ”یسوع دے بارے وچ۔ کیہ تُسی ثابت کر سکدے ہو پئی اوہ سچ وچ خدا دا پُتر اے؟“

کیہ تُسی ایہہ ثابت کر سکدی ہو پئی تُسی سارہ ہو؟

سارہ: ”آپنے شناختی کارڈ دے نال۔ بڑے افسوس دی گل اے پئی یسوع دے کول اوہدا شناختی کارڈ نئیں سی۔“

میَں تہانوں یسوع دے پنج شناختی کارڈ وکھال سکدی اَں!

سارہ: ”اوہدے کول پنج شناختی کارڈ سن؟ کیہ اے سچ اے؟“

یسوع نے پہلا شناختی کارڈ خدا کولوں لیا سی۔ اوہدے بپتسمہ دے ویلے اسمان تھوں واج آئی۔

خدا (گونج دے نال): ”ایہہ میرا پیارا پُتر اے، ایہدے اُتے یقین کرو۔“

دوجا شناختی کارڈ بائبل اے۔ خدا دے پُتر دے بارے وچ ہر پیشن گوئی یسوع دے وسیلے ۰۰۱ فی صد پوری ہوئی۔

خدا دے پُتر لئی تیجا ثبوت اے وے پئی اوہ مویاں وچوں جی اُٹھیا۔ اوہ جیوندا اے۔ بہت سارے گواہواں نے آپ اوہنوں ویکھیا۔ تے لوکاں نے اوہنوں چوتھا شناختی کارڈ دے دِتا۔ جیہڑے لوک اوہنوں جاندے سن اوہناں آکھیا:

بندہ: ”ایہہ ضرور خدا دا پُتر اے۔“

سارہ: ”اک کارڈ گھٹ اے۔“

میرے نال آوو میَں قانا وچ تہانوں ایہہ ثبوت وکھالاں گی۔ اک وہیا دی ضیافت ہو رہی سی۔ سارا پینڈ لاڑے تے لاڑی دے نال ست دن تک خوشی مناوندے سن۔ یسوع تے اوہدے بیلیاں نوں وی سدا دِتا گیا۔ خیر اوہناں نوں اجے تیک پتہ نئیں سی لگیا پئی یسوع ای خدا دا پُتر اے۔

پروہنے بہت خوش سن۔ اوہ گاوندے پئے سن، نچدے پئے سن، کھیڈدے پئے سن، کھاندے پئے سن تے پیندے پئے سن۔ تے فیر ایہہ ہویا:

اوہناں دی مَے مُک گئی۔ پورے گھر وچ پین لئی ہور کجھ وی نئیں سی۔

سارہ: ”کِڈا بُرا لگدا ہوے گا ساریاں نوں!“

مریم نوں ایہہ ساریاں نالوں پہلاں پتہ لگ گیا۔ اوہنے یسوع نوں ایہہ دسیا تے یسوع نے نوکراں نوں آکھیا:

یسوع: ”پانی دے مٹکیاں نوں اُتے تک پانی نال بھر دیو۔“

اوہ کھوں تھوں ۰۶۱ گیلن پانی بھر کے لیائے۔ تے ہن؟

یسوع: ”جام دا پیالہ بھرو تے اوہنوں نوکراں دے پیشوا دے کول لے جاوو۔ اوہ ایہنوں چکھے۔“

نوکراں دے پیشوا نے گھُٹ لیا تے چھیتی نال لاڑے دے کول گیا۔

نوکراں دا پیشوا: ”تُساں ایہہ مَے کِتھوں لئی اے؟ میَں آپنی زندگی وچ اج تک ایڈی چنگی مَے نئیں چکھی۔“

یسوع نے صاف پانی نوں ساریاں نالوں چنگی مَے وچ بدل دِتا سی!

ایہہ پہلی کرامات سی جیہڑی یسوع نے کیتی۔ کرامات وی ثبوت نے، یسوع دے شناختی کارڈ نے، ایہناں تھوں پتہ لگدا اے پئی یسوع سچ وچ خدا دا پُتر اے۔ چیلیاں نے ایس کرامات نوں ویکھیا تے یسوع اُتے یقین کیتا۔ خدا دے پُتر لئی پنج شناختی کارڈ۔ ایہہ ثبوت میرے لئے کافی نے۔ میَں اوہدے اُتے یقین رکھدی اَں۔ تے تُسی؟

لوک: بیان کرن والی، سارہ، خدا دی واج، آدمی، یسوع، نوکراں دا پیشوا

حقوق: بحق سی ای ایف جرمنی محفوظ نے۔