36. سیمی دی دریافت

نیویارک دیاں گلیاں وچ ٹھنڈی وا چلدی پئی سی۔ سیمی نے آپنی ٹوپی نوں کھچ کے کناں اُتے کر لیا۔ اوہ روز شام ویلے آپنے پیو دے نال پھرن جاندا سی۔ گڈیاں تیزی نال اوہناں دے کولوں لنگدیاں پیاں سن۔ تے اوہناں دیاں بریکاں لگن دی واج آوندی پئی سی، تے عورتاں سمان نال بھرے آپنے تھیلے لے کے اپنی منزل تے جان والیاں بساں ول جا رہیاں سن۔ ہر کوئی چھیتی وچ سی۔

سیمی: ”ابو، اوہ نشان کیہڑی شے دا اے؟“

اوہدا پیو، جیہڑا ڈونگی سوچ وچ سی، اوہنے پوچھیا:

پیو: ”کیہ مطلب اے تیرا؟“

سیمی: ”اوہ تارا، ابو، اوہ تارا! کیہ تہانوں اوہ پیا دِسدا اے؟“

بڑے جوش نال اوہنے گھراں دی اک باری ول اشارہ کیتا۔ اوتھے اک موم بتی بلدی پئی سی جہدی لو ہنیرے وچ کسے تارے وانگ لگدی پئی سی۔

پیو: ”اوہ لوک باری وچ آپنے پُتر لئی اک موم بتی رکھدے سن۔ اوہ دُور سی بڑی دُور ساڈے دشمناں نال جنگ وچ لڑدا پیا سی۔ جے کدی اوہنوں گولی لگ جاوے تے اوہ اوس موم بتی نوں بجھا دین گے۔“

جدوں اوہ ٹُردے ٹُردے اگے ودھے تے پیو نے سوچیا: مینوں اُمید اے پئی مینوں کدی آپنے پُتر لئی کوئی موم بتی باری وچ نئیں رکھنی پووے گی۔

سیمی فیر وی تاریاں نوں ویکھدا رہیا۔

سیمی: ”ابو، اوہ اک ہور اے۔ تے اک ہور وی۔ ویکھو، اوتھے اک ای باری وچ دو موم بتیاں نے۔ ہو سکدا اے اوہناں دے خاندان دے دو پُتر جنگ اُتے گئے ہوون۔“

گلی دے اخیر اُتے سیمی نے آپنا سر چکیا تے اچانک رُک گیا۔ اوہنے آپنا ساہ ای روک لیا جس طرح کوئی ایسا کم ہویا ہووے جیہڑا اوہ سوچ وی نہ سکے۔

سیمی: ”ویکھو، ابو اوتھے ویکھو!“

اوہنے شام ویلے ہنیرے اسمان وچ اک تارا لبھیا سی۔

سیمی: ”کیہ خدا دا وی اک پُتر اے؟ اوہنے وی باری وچ اک موم بتی بال کے رکھی اے۔“

پیو: ”ہاں، خدا دے کول اک ہی پُتر اے۔ اوہنے اوہنوں ایس دُنیا وچ بریائی دے نال لڑن لئی گھل دِتا سی۔

تے اوہ جِت گیا! ہتھیاراں نال نئی سگوں پیار نال۔ اوہنوں ایہدے بدلے آپنی جان دینی پئی۔ پر اوہ فیر وی آپنے دشمناں نال پیار کردا اے، اوہ دشمن جنہاں نے اوہنوں صلیب اُتے چاھڑ دِتا۔ خدا نے اوہنوں مویاں وچوں فیر جیوندا کر دِتا۔ اوہدے وسیلہ نال اسی تسلی پا سکنے اَں تے دوجے لوک وی۔“

بعد وچ، سیمی اکثر باریاں وچ تاریاں دے بارے وچ سوچدا سی تے اوہدے بارے وچ وی جہنے دُنیا وچ بریائی دے نال لڑن لئی آپنی جان تک دے دِتی۔ یسوع نے سانوں تسلی دِتی۔ تے اجے تک بڑیاں مشکل لڑائیاں ہوندیاں پیاں نے جنہاں تھوں ڈر تے دُکھ پیدا ہوندے نے۔ بم دھماکے تے گولیاں نال بہت سارے لوکاں دیاں زندگیاں برباد ہوندیاں نے۔

پر خدا دی باری دے تارے نوں بجھایا نئیں جا سکدا۔ تے نہ ای اوہنوں بھلایا جا سکدا اے جیہڑا اوہناں نوں نجات تے تسلی دیندا اے جیہڑے اوہدے کولوں منگدے نے: یسوع مسیح کولوں۔

لوک: بیان کرن والی، پیو، سیمی

حقوق: بحق سی ای ایف جرمنی محفوظ نے۔