31. یسوع لئی تحفے

توما آپنے دادے دیاں بنائیاں ہوئیاں مورتاں نوں ویکھدا پیا سی۔ اوہ بڑیاں سُچیاں پیاں لگدیاں سن۔ ایالی، یوسف، مریم تے بچہ یسوع۔ ویلہ لنگدا گیا تے اوہنوں نیندر آون لگ پئی۔

اوہنے بیت لحم دے اصطبل دے بارے سُفنا ویکھیا۔ توما نے سوچیا میَں کھرلی دے کنّا نیڑے جا سکنا اَں۔

اوہ نیڑے گیا تے اچانک اُداس ہوگیا۔ یسوع نے اوہدے نال گل کیتی۔

یسوع: ”تسی کیوں ایڈے اُداس ہو؟“

توما: ”کیوں جو میَں تہاڈے لئی کوئی تحفہ نئیں لے کے آیا۔“

یسوع: ”دُکھی ناں ہوو۔ مینوں بس تہاڈے کولوں تین شیواں دی لوڑ اے۔“

توما: ”میَں تہانوں آپنی ہر شے دے سکدا اَں جو کجھ میرے کول اے۔ میری بجلی والی ریل گڈی، میریاں کمپیوٹر دیاں کھیڈاں، تے۔۔۔“

یسوع: ”نئیں، مینوں تہاڈیاں اینہاں شیواں دی لوڑ نہیں اے؛ میَں ایس لئی اسمان توں دھرتی اُتے نئیں آیا۔“

توما: ”فیر تہانوں کی چاہیدا اے؟“

یسوع: ”مینوں آپنا پچھلا ریاضی دا امتحان دے دیو۔“

توما: ”پر مینوں اوہدے وچ بہت گھٹ نمبر ملے نے۔“

یسوع: ”ایسے لئی تے میَں اوہ منگ رہیا اَں۔ میرے کول سدا اوہ شیواں لیایا کرو جیہڑیاں گھٹ ہون۔ کیہ تُسی ایس طرح کرو گے؟“

توما: ”ہاں جی! میَں ایہہ کراں گا۔“

یسوع : ”دوجا تحفہ جیہڑا مینوں چاہیدا اے اوہ تہاڈا کھاون والا بھانڈا اے۔“

توما: ”میَں تہانوں اوہ نئیں دے سکدا کیوں جو اوہ میرے کولوں ٹُٹ گیا اے۔“

یسوع: ”ایسے لئی تے میَں ایہہ منگ رہیا اَں۔ میرے کول سدا اوہ شیواں لے کے آیا کرو جہیڑیاں ٹُٹ گیاں ہون۔ کیہ تُسی ایس طرح کرو گے؟“

توما: ”ہاں جی! میَں ایہہ کراں گا۔“

یسوع: ”ہن میری تیجی شے۔ توما میَں اوہ جواب جاننا چاہناں اَں جیہڑا تُساں آپنی ماں نوں دِتا جدوں اوہنے تہانوں پوچھیا پئی تہاڈا کھاون والا بھانڈا کس طرح ٹُٹیا۔“

تد توما رون لگ پیا تے آس ڈھا بیٹھ۔۔

توما: ”میَں۔۔۔ میَں آپنی ماں نال جھوٹ بولیا سی۔“

یسوع: ”توما تہاڈے جھوٹ، نافرمانی، ہر اک شرارت جیہڑی تہاڈی زندگی وچ اے تُسی میرے کول لیا سکدے ہو۔ جدوں تک تہاڈی زندگی اے۔ میَں تہانوں معاف کراں گا تے میَں تہاڈی مدد کراں گا پئی کس طرح چنگی زندگی گزارنی اے۔ میَں سدا تہاڈے نال رہواں گا تے تہانوں زندگی گزارنا سکھاوندا رہواں گا۔ کیہ تُسی ایہہ چاہندے ہو؟“

تے جس طرح توما ایہہ چاہندا سی! اوس ویلے توں اوہنے یسوع اُتے ایمان رکھیا تے اوہدی گل نوں منّیا۔

لوک: بیان کرن والی، توما، یسوع دی واج

حقوق: بحق سی ای ایف جرمنی محفوظ نے۔