511. وڈے دِن دا سب نالوں ودھیا تحفہ

کُڑی: ”مینوں کرسمس دی بڑی اُڈیک اے۔ ایس سال میری خواہشاں دی فہرست اک میل لمبی اے۔“

مُنڈا: ”امید اے میری ساریاں نالوں وڈی خواہش پوری ہو جائے گی۔ میرا بڑا دل کردا اے پئی مینوں سمارٹ فون ملے۔“

تہانوں تھوڑی اڈیک کرنی پوے گی۔

کُڑی: ”جی ہاں، بدقسمتی اے!“

پر شکر اے پئی ایڈی نہیں جِنی شمعون نوں کرنی پئی۔

مُنڈا: ”اوہ کون اے؟“

بائبل اوہنوں ایس طرح بیان کردی اے: ہن جوان نہ رہیا سگوں بڈھا ہون لگ پیا۔ اوہ یروشلیم وچ رہندا سی تے خدا دے نال وفادار سی۔ اوہنوں ۰۴ سال دی لمبی مدت تیک اڈیک کرنی پئی۔ سگوں خورے ایس تھوں وی بہتی۔ اوس ویلے تیک جدوں تیک اوہدی ساریاں نالوں وڈی خواہش پوری نہ ہوئی۔

کُڑی: ”اینی لمبی مدت؟ تے اوہدی ساریاں نالوں وڈی خواہش کیہ سی!“

اوہدی خواہش خدا دے وعدیاں چوں اک نال جُڑی سی۔

خدا: ”شمعون، توں دُنیا دے نجات دہندہ نوں ویکھن دے بعد مریں گا۔“

جد کے شمعون نوں اڈیک تے اڈیک تے اڈیک کرنی پئی، اوہنے کدی امید نہ چھڈی۔ کیوں جو اوہ جاندا سی پئی اوہ خدا اُتے بھروسہ رکھ سکدا اے۔

اک دن اوہ ہیکل وچ گیا۔ تے اوسے ویلے، مریم، یوسف تے بچہ یسوع وی اپڑے۔ جدوں شمعون نے بچے نوں ویکھیا، اوہنوں اچانک پتہ لگا: پئی ایہہ اوہ ای وعدہ کیتا ہویا نجات دین والا اے!

شمعون نے یسوع نوں ویکھیا۔ ہن اوہدی ساریاں نالوں وڈی خواہش پوری ہو گئی سی۔ ایس تھوں او اینا خوش ہویا پئی دنیا دا کوئی تحفہ اینی خوشی نئیں دے سکدا!

بڑی ای خوشی نال اوہنے بچے نوں آپنے ہتھ وچ لیا تے دعا کیتی۔

شمعون: ”خداوند، ہن میَں سکون نال مر سکدا اَں، توں آپنا وعدہ میرے نال قائم رکھیا۔ میریاں اکھاں نے دُنیا دے نجات دین والے نوں ویکھ لیا۔“

کسے نے شمعون دے بارے وچ اک گیت لکھیا:

(سازوجن دی واج)

اک بڈھا بندہ سی، بڈھا بندہ جہدا ناں شمعون سی۔
اوہدی ساریاں نالوں وڈی خواہش پوری ہو گئی، پئی اوہنے خدا دے پُتر نوں ویکھ لیا۔
آ بچان والے، میرے کول وی آ، میَں بوہا کھولدا اَں۔
آ بچان والے، میرے کول وی آ، میَں بوہا کھولدا اَں۔

میَں نہیں جاندی پئی ایس کرسمس اُتے تہاڈیاں ساریاں خواہشاں پوریاں ہون گیاں پئی نئیں۔ پر میَں ایہہ جاندی اَں پئی جدوں تُسی ایہہ خواہش کرو گے پئی یسوع تہاڈی زندگی وچ آوے جس طرح ایس گیت وچ آکھیا گیا اے، تے یسوع اج ای تہاڈی ایہہ خواہش پوری کر دیوے گا۔

لوک: بیان کرن والی، کُڑی، مُنڈا، خدا، شمعون

حقوق:بحق سی ای ایف جرمنی محفوظ نے۔