51. پکائی ہوئی بائبل

عورت: ”اوہ آ رہے نے! اوہ آ رہے نے!“

اک عورت روٹی بنا رہی سی پئی اچانک اوہدی نظر باری دے باہر پئی تے اوہنے ویکھیا پئی مسیحاں نوں ستاون والے اوہدے گھر ول آ رہے نے۔ اوہ ہر شے نوں ویکھدے سن، تے بائبل تے گیتاں دیاں کتاباں نوں ساڑ دیندے سن۔

آدمی: ”کھولو! چھیتی کھولو!“ (بوہا کھڑکاون دی واج)

اوس عورت نوں کی کرنا چاہیدا اے؟ اوہنے چھیتی نال بائبل لئی اوہنوں کپڑے وچ ولیٹیا، آپنی سب توں قیمتی کتاب نوں گُجے ہوئے آٹے وچ پا کے اووَن وچ لُکا دِتا۔ فیر، ڈردی ہوئی بوہا کھولن گئی تے آدمی اندر آئے تے الماریاں تے درازاں نوں ایدھر اودھر سُٹیا تے اوہدی ہر شے نوں ویکھیا تے تلاشی لئی۔

ایڈا غدر! پر اوہناں نوں کجھ نہ لبھیا۔ اوہناں نے بڑے زور نال اوس عورت اُتے غصّہ کیتا تے زور نال بوہا بند کر کے ٹُر گئے۔ (بوہا بند ہون دی واج)

جدوں امن ہو گیا، اوس عورت نے چھیتی نال جا کے اووَن وچوں آپنی پکدی ہوئی بائبل نوں کڈھیا تے اوہنے ویکھیا پئی بائبل نوں تے کجھ وی نئیں ہویا۔

اوہناں دے ملک وچ بائبل نوں آپنے کول رکھن دی اجازت نئیں سی۔

پر اوہ عورت خدا دے حُکم نوں بہتا مندی سی تے آدمیاں دے حُکم نوں گھٹ تے لُک کے خدا دا کلام پڑھدی ہوندی سی۔ ایدے نال اوس عورت نوں روز اک نوی ہمت تے نواں زور ملدا سی۔

(پیچھے ساز وجائیے)

خدا دے فرمان راست نے۔ جیہڑے دِل نوں تازگی پچاندے نے۔

خداوند دا حُکم بے عیب اے۔ اوہ اکھاں نوں چانن دیندا اے۔

خداوند دا خوف پاک اے۔ اوہ سدا تیک قائم رہندا اے۔

خداوند دے حُکم برحق تے بالکل راست نے۔

اوہ سونے نالوں سگوں بہت کندن نالوں بہتے چنگے نے۔

اوہ شہد نالوں سگوں چھتے دے چویاں نالوں وی میٹھے نے۔

اوہناں توں تیرے بندے نوں ہوشیاری ملدی اے۔ اوہناں نوں منن دا اجر وڈا اے۔

(زبور ۹۱، ۸ توں ۱۱)

کیہ تہاڈے گھر وچ بائبل ہے وے؟ آپنی الماری اُتے پئی اوہدے اُتے دھوڑ نہ پین دیو۔ اوہنوں پڑھو تے خوش ہوو پئی خدا تہانوں کیہ کہناچاہندا اے۔

تے جے تہاڈے کول بائبل ہے نئیں تے مینوں دسو۔

ہو سکدا اے بائبل تہاڈے لئی ساریاں نالوں پیاری کتاب بن جاوے۔

لوک: بیان کرن والی، عورت، آدمی

حقوق: بحق سی ای ایف جرمنی محفوظ نے۔