8. ادھی رات نُوں زلزلہ

جہاز کنڈے اُتے اک کھمبے نال بجھیا ہویا سی۔ پولس تے سلاس اک شہر فلّپی وچ گئے۔

بزاراں تے گلیاں وچ اوہناں نے بار بار اے واج لائی:

پولس: ’’خُدا تہانوں پیار کردا اے۔ اوہنے آپنا پُتر دنیا اُتے گھلیا۔ خداوند یسوع اُتے ایمان لیاؤ تے اوہ اتہانوں بچاوے گا۔‘‘

لُدیہ نے ایہہ منَیا تے خوشی نال یسوع دے بارے وچ سارے قِصَیاں نوں سُنیا۔ دوجے لوک دُکھی ہوئے تے غصے وچ چیکن لگ پئے:

بندہ: ’’ایہہ لوک بغاوت پیدا کر دے پئے نے! اسی ایہہ سب نئیں سُننا چاہندے۔ ایہناں نوں ایتھوں کڈھ دیو!‘‘

اوہناں نوں روڑے مارے گئے۔ اچانک سارے لوک خُدا دے گھلے ہوئے رسولاں دے خلاف کھلو گئے۔ غصے نال بھرے لوکاں نے اوہناں دے لیِڑے پاڑ سُٹے تے اوہناں نوں ماریا۔ اوہناں دےلک سوٹی نال کُٹ کے اوہناں نوں دُکھ دِتا۔ اوہناں نوں کال کوٹھڑی وچ سُٹ چھڈیا تے جیل دے سپاہیاں نے اوہناں دے ہتھ پیر بنھ دِتے۔ اوہ پیِڑ نال بھرے سن، تے اوہناں دے لک پیِڑ نال سڑدے پئے سن۔

بائبل وچ اسی پڑھنے اَں کہ قیدیاں نے نہ کجھ پُچھیا تے نہ کوئی شکیت کیتی، پئی ’’خُدا نے ساڈے نال ایہہ کیوں ہون دِتا؟‘‘ سگوں اوہناں نے رات دے ویلے خُداوند دی حمد دے گیت گائے۔ تے فیر ایہہ ہویا: خُدا نے اک زور دا پچال گھلیا تے اوہناں دی مدد کیتی۔ اوہناں دیاں بیڑیاں آپ ای کھل کے ڈگ پیاں تے قید خانے دے بوہے کھل گئے۔ جیل دا راکھا شور دے سبب اُٹھ کھلوتا۔ پہلوں اوہنے خیال کیتا پئی سارے قیدی دوڑ گئے نے۔ اوہ آپنے مالک توں ڈردا پیا سی، ایس لئی اوہ چاہندا سی پئی آپنے آپ نوں ختم کر لئے۔ اوہنے آپنی تلوار کڈی۔۔۔

پولس: ’’کھلو جا! آپنے آپ نوں زخمی نہ کر اسی سارےایتھے ای اَں۔‘‘

سچی! کوئی وی نئیں بھجیا۔ کنبدا ہویا، جیل دا راکھا پولس دے پیراں وچ ڈگ پیا۔

جیل دا راکھا: ’’مینوں بچن لئی کیہ کرن دی لوڑ اے؟‘‘

پولس: ’’تینوں کجھ وی کرن دی لوڑ نئیں۔ یسوع نے تیرے لئی سب کجھ کر دِتا ا ے۔ اوہدے اُتے ایمان لیا تے توں بچ جاویں گا۔‘‘

ایہہ بہت ای سوکھا کم سی۔ جیل دے راکھے نےاےمن لیا تے اوہ بچ گیا۔ اوہدے بعد اوہنے کدی قیدیاں نوں دُکھ نئیں پچایا، سگوں اوہناں نوں کھانا کھان نوں دیندا سی تے اوہناں دے زخم دا دارو کردا سی۔

اگلی صبح، عدالت دے قاضیاں نے سپاہیاں نوں قید خانے دے راکھے کول گھلیا تے آکھیا پئی اوہناں دونہاں قیدیاں نوں چھڈ دے۔ تے اوہ آپ آئے تے پولس تے سلاس نال بدسلوکی کرن لئی معافی وی منگی۔ ایہدے بعد پولس تے سلاس ہور بہت ساریاں تھاواں اُتے گئے تے دوجے لوکاں نوں وی دسیا۔

پولس: ’’خُداوند یسوع اُتے ایمان لیاؤ، تے تسی سارے بچ جاؤ گے تے ہمیشہ دی زندگی پاؤ گے۔‘‘

لوک: بیان کرنے والی، پولس، بندہ، جیل دا راکھا

حقوق: بحق سی ای ایف جرمنی محفوظ نے۔