56. تین دِن توں لاپتہ

(سڑک اُتے راہیاں دیاں واجاں)

پہلا راہی: ”مینوں اے ضیافت ایڈی چھیتی نئیں بھولن لگی۔“

دوجا راہی: ”ایہہ بڑی ای چنگی سی۔“

پہلا راہی: ”اسی بھاگاں والے اَں پئی ساڈے کول اوہ خدا اے جہنے سانوں کھوالیا پیالیا اے۔ اگلے سال فیر تھوں یروشلیم وچ جاواں گا۔“

مریم: ”تہاڈی سلامتی ہووے۔ کیہ تُساں ساڈے پُتر نوں ویکھیا اے؟“

یوسف: ”اوہ گواچ گیا اے۔ اوہ ۲۱ ورھیاں دا اے۔“

دوجا راہی: ”ہو سکدا اے اوہ دوجے لوکاں نال اگاں ٹُر گیا ہووے۔“

مریم تے یوسف یسوع نوں لبھدے پئے سن۔ ایہہ پہلی وار سی پئی یسوع اوہناں نال یروشلیم وچ آیا سی۔ گھر مُڑ جاندے ویلے اوہ اچانک گواچ گیا۔

مریم: ”یوسف، مینوں اوہدی فکر ہوندی پئی اے۔“

یوسف: ”سانوں مُڑ جا کے اوہنوں شہر وچ لبھنا پوے گا۔“

اوہناں نے ہر پاسے آپنے ۲۱ ورھیاں دے بچے دے بارے پتہ کیتا۔ کسے نے یسوع نوں نئیں سی ویکھیا۔ تین دن بعد، اوہ اوہناں نوں ہیکل وچ لبھیا۔ اوہ حیران ہوئے، کیوں جو اوہ خدا دے گھر وچ سی تے بائبل بارے بائبل دے اُستاداں نال گل بات کردا پیا سی۔ اوہ لوک وی اوہدے سوالاں تے جواباں دے بارے حیران سن۔

مریم: ”توں ایتھے کیوں رہ گیا سی؟ اساں تینوں ہر پاسے لبھیا تے سانوں تیری فکر ہوندی پئی سی۔“

یسوع: ”تُساں مینوں کیوں لبھیا؟ کیہ تہانوں ایہہ نئیں پتہ سی پئی مینوں میرے پیو دے گھر وچ ہونا ضرور اے؟“

ایہہ پہلی وار سی پئی یسوع نے خدا نوں آپنا باپ آکھیا سی تے ایس طرح اوہنے آپنے آپ نوں خدا دا پُتر وی آکھیا۔

تے یسوع، خدا دا پُتر، کدی تہاڈے وانگ اک نِکا جیہا بچہ سی۔ اوہ بالکل پورا انسان سی۔ اوہ تہاڈے وانگ ہسدا تے روندا سی۔ اوہ تہاڈے وانگ روٹی کھاندا تے سوندا سی۔ اوہنوں وی سکھن دی لوڑ سی جس طرح تُسی سکھدے ہو۔ اوہنے سدا آپنے ماں پیو دی گل منی، جس طرح تُسی مندے ہو۔ میَں تہاڈے ہسن دی واج سُن سکدی اَں! کیہ تُسی سدا آپنے ماں پیو دی گل نئیں مندے؟

بائبل سانوں ایہہ آکھدی اے پئی: بچیو آپنے ماں پیو دی گل منو۔ یسوع نے سدا آپنے ماں پیو دی گل منی۔ اوہنے کدی کوئی گناہ نئیں سی کیتا تے ناں ای کدی کوئی ببھیڑی گل مُنہوں کڈی۔ اوہنے کدی جھوٹ نئیں بولیا سی تے ناں ہی کدی چوری کیتی۔ اوہ گناہ توں پاک سی۔ گل منن نال اوہنوں خوشی ملدی سی۔ ایس لئی اوہ مریم تے یوسف دے نال مُڑ ناصرت ٹُر گیا۔

جے تُسی وی یسوع دی گل مننا چاہندے ہو۔ تے اوہ وی تہاڈی مدد کرے گا تاں جو تُسی اوہدے ورگے بن سکو۔ اوہنوں آکھو تے اوہ تہاڈی ساری نافرمانی نوں معاف کردے گا۔

جدوں تُسی اوہدے نال رہن دا فیصلہ کردے ہو تے اوہ تہاڈی مدد کردا اے پئی تُسی ایس طرح زندگی گزارو پئی جس توں خدا خوش ہووے۔

جدوں یسوع تہاڈے دِل وچ رہندا اے تے فیر کوڑا سُٹن یا بھانڈے مانجن وچ وی تہانوں مزہ آوے گا۔ یسوع دے نال زندگی گزارن دی کوشش کرنا بڑی ای چنگی گل اے۔

لوک: بیان کرن والی، دو راہی، مریم، یوسف، یسوع

حقوق: بحق سی ای ایف جرمنی محفوظ نے۔