39. کُرکو وعدہ ۵

خوشی نال بھریا ہویا، رِنگو دوڑ کے مُڑ پینڈ گیا۔

رِنگو: ’’شیرمر گیا اے! شیرمر گیا اے! اساں اوہنوں ماردِتا اے!‘‘

بٹونوں آپنے بھرا اُتے فخر سی۔

بٹو: ’’توں کمال ایں۔ کیہ تینوں ڈر لگیا جدوں توں شیر دا شکار پیا کردا سیں؟‘‘

رِنگو: ’’بڑا لگیا۔ پر میَں دعا کیتی فیر میرے دل دی دھڑکن کجھ چنگی ہوئی۔‘‘ (گڈی دی واج)

رِنگو: ’’ایہہ ضرور گروُب صاحب ہووے گا، اوہ گورا پردیسی، اوہ جہنے مینوں یسوع دے بارے وچ دسیا سی۔‘‘

بٹو: ’’آدوڑ کے اوہدے کول جاندے اَں۔‘‘

دو بھارتی مُنڈے اگلے کونے تھوں غیب ہو گئے تے فیر اوہناں نے افراتفری ویکھی۔ مشنری دی جیپ چِکڑ وچ پھس گئی سی۔ رِنگو نے ڈھگیاں نوں قابو کرنا سی تاں جو اوہ جیپ نوں دلدل وچوں کھیچ کے کڈھ سکن۔

صاحب گروُب: ’’اےہوگیا۔ رِنگو، تیری مددلئی بہت بہت شکریہ۔ اج مینوں خدا حافظ بولنا پوےگا۔ لمبےعرصے تک اسی اک دوجے نوں نہیں ملاں گے۔ یاد رکھ پئی خداوند یسوع سدا تیرے نال اے۔ اوہدے نال سدا وفادار رہیں تے اوہ کم کریں جنہاں تھوں اوہ خوش ہووے۔ گناہ تینوں خوشی نہیں دے سکدا۔ کیہ تیرے کول اجے وی اوہ خط ہے اے جیہڑا خدا ولوں سی؟‘‘

رِنگو: ’’جی ہاں، میَں ایہنوں آپنی پگ وچ رکھدا اَں۔‘‘

صاحب گروُب: ’’خدا دیاں گلاں آپنے دل وچ رکھ۔ توں ایہدے اُتے بھروسہ کرسکدا ایں۔ تے ہاں، یاد آیا۔ میرا آرگن گواچ گیا اے۔‘‘

رِنگو بالکل لال ہو گیا۔ کیوں جو اوہ ای تے چور سی۔ اوہنے ای تے اوہ ساز پرانے چھپر وچ لُکایا سی۔ کیہ صاحب ایہہ گل جاندا سی؟

صاحب گروُب: ’’میرے کول ایہنوںلبھن دا ویلا نہیں اے۔ کیہ توں میرے لئی ایہہ کرسکدا ایں؟ جے اوہ تینوں لبھ جاوے، تے مہربانی نال اوہنوں لے کے شہر وچ میَری صاحبہ دے کول آجاویں۔ اوہ ہمیشہ جاندی اے پئی میَں کدوں کِتھے کلام سُنا رہیا اَں اوہ میرے کول لے آوے گی۔‘‘

رِنگو نےآپنیاں بانہواں نوں ہولی نال مخالف پاسے کر کے آپنے کناں نوں پھڑیا تے کھیچیا۔ ایہہ وعدہ کرن دا اک بھارتی طریقہ اے۔ اک اصلی کُورکُو وعدہ۔

اوہ پریشانی وچ آپنے گھرٹُر گیا۔

رِنگو: ’’میں ایہہ کیوں نہیں آکھیا پئی میَں ای چور اَں؟ میَں اک بزدل اَں۔ خداوند یسوع، کیہ تُسی اجے وی مینوں سُن سکدے ہو؟ میَں کوئی چیز چوری کیتی اے مینوں معاف کر دیو۔ مہربانی کر کے میرے گناہ نوں معاف کر دیو تے میری مدد کرو پئی میَں اوہ کراں جو چنگا اے۔‘‘

ایس معاملے وچ کیہ چنگا اے جو کرنا چاہیدا اے؟ رِنگو نوں چھیتی نال پتہ لگ گیا سی۔ اوہنوں اوہ شےموڑ دینی ہووے گی جیہڑی اوہنے چوری کیتی سی۔ پر ایہہ مشکل اے۔ لوک اوہدے بارے وچ کیہ سوچن گے؟ اوہنے آپنے دل وچ اک ہولی جیہی واج سُنی: آرگن نوں موڑ لے جا تے فیر تھوں سب کجھ چنگا کر لے۔

کیہ ایس واج نوں تُسی وی جاندے ہو؟ کیہ تہانوں پتہ اے جدوں تُساں کجھ چوری کیتا ہووے تے کس طرح مُڑ سیدھے راہ اُتے آیا جا سکدا اے؟

ایہدا جواب اگلی کہانی وچ ملے گا۔

لوک: بیان کرن والی، رِنگو، بٹو، صاحب گروُب

حقوق: بحق سی ای ایف جرمنی محفوظ نے۔