061. یسوع ایدی اجازت کیوں دِتی ۱

تین بہن بھرا ایسے سن جیہڑے وکھ نہیں ہو سکدے سن۔ کیہ تُسی اوہناں نوں جاندے ہو؟ مارتھا، سدا چنگے خیالاں نال بھری ہوئی تے کماں وچ رُجی۔ مریم، چپ رہن والی تے تھوڑی جیہی شرمیلی۔ لعزر، اوہناں دا بھروسہ دے قابل بھرا۔ اوہ تینوں یسوع نال پیار کردے سن۔

جدوں اوہ آپنے چیلیاں دے نال بیت عنیاہ وچ آیا، تے اوہ اوہناں نوں ملن آیا۔

نِکا جیہا گھر، اکثر سوہنی فضا نال بھر جاندا سی، ہویا ایس طرح، پئی اچانک لعزر بڑا بیمار پے گیا۔ مریم اوہدے بستر دے کول بیٹھی سی۔ بیمار بھرا بڑی مشکل نال بولدا سی۔

اوہنے آپنیاں اکھاں بند کر لیاں۔

مارتھا: ”مریم، ایس طرح گل نہیں بنے گی۔ یسوع ای اوہ ہستی اے جیہڑا اوہدی مدد کر سکدا اے۔ میَں ہن ای اوہنوں سنیہا گھلدی اَں۔“

تھکے ہارے سنیہا لے کے جان والیاں نے خداوند یسوع نوں یردن دے دریا دے کنڈے لبھ لیا۔

پیغام لے کے جان والا: ”یسوع چھیتی آﺅ! مریم تے مارتھا نے مینوں گھلیا اے۔ لعزر بڑا بیمار اے۔ چھیتی آیو نہیں تے اوہ مر جاوے گا۔“

یسوع اوہناں تین بہن بھائیاں نال پیار کردا سی۔ پر اوہنے اوہناں کول جان وچ چھیتی ناں کیتی۔ اوہ آپنے شاگرداں دے نال اوتھے ای رہیا جتھے ہے سی۔ اوہنے کجھ دن لنگن دِتے۔

یسوع: ”آﺅ، ہن اسی جاواں گے۔ لعزر سو گیا اے۔ میَں جا کے اوہنوں جگا دیاں گا۔“

چیلا: ”جے اوہ سوگیا اے، تے اوہ چھیتی ای فیر چنگا ہو جاوے گا۔“

یسوع: ”سون تھوں میرا مطلب کجھ ہور ای اے۔ لعزر مر گیا اے۔“

چیلا: ”مر گیا؟“

یسوع: ”مینوں خوشی اے پئی میَں اوتھے نہیں ساں۔ ایہو وجہ اے، پئی تُسی میرے اُتے یقین کرنا سیکھو گے۔“

چیلیاں نوں ایہہ سمجھ ناں آیا پئی ایہہ سب کیہ ہوندا پیا سی۔ لعزر مر گیا سی تے یسوع خوش ہوندا پیا سی۔ ایس حال وچ اوہ کس طرح اوہدے اُتے یقین کردے؟ خورے یسوع دے آکھن دا ایہہ مطلب تے نہیں سی پئی جدوں کسے دے نال کجھ بُرا ہوندا ہووے تے تد وی اوہ اوہدے اُتے یقین رکھے؟

لعزر نوں دفن کر دِتا گیا سی۔ مریم تے مرتھا بڑا روندیاں پیاں سن۔ بہت سارے رون والے لوک آئے ہوئے سن۔ اوہ اوہناں دونہواں نوں تسلی دینا چاہندے سن۔

ہن میَں تہانوں اک نِکا جیہا کم کرن نوں دیندی اَں۔ ایس سوال دے جواب دے بارے وچ سوچو: جے یسوع تہاڈی دعا دا فوراً جواب نہیں دیندا تے تہاڈی مدد نہیں کردا تے تُسی کیہ کرو گے؟

جے اوہ تہاڈے نال بھیڑے تھوں بھیڑا ہون دتا جاوے تے تُسی کیہ کرو گے؟

اینہاں ساریاں گلاں دے باوجود وی کیہ تُسی اوہدے اُتے یقین کرو گے؟

ذرا ایہدے بارے وچ سوچو تے یاد رکھیو۔ اگلے ڈرامے وچ کہانی چلدی رہوے گی۔

لوک: بیان کرن والی، مرتھا، سنیہا لے کے جان والا، یسوع، چیلے

حقوق: بحق سی ای ایف جرمنی محفوظ نے۔