06. بٹرا وکھرا وڈا دن ۲

پہاڑاں وچ نکے جیہے پینڈ کسے نے وڈے دن اُتے خوشی ناں منائی۔ کوئی وی خوش نئیں سی پئی خداوند یسوع پیدا ہویا اے۔ پر تورا لئی ایس طرح نئیں سی۔ اوسے سویرے اوہنے لُک کے آپنے بھرا نوں مریم، یوسف تے بچے یسوع دی کہانی سنائی سی۔ اوہ وڈے دن دی خوشی مناونا چاہندی سی پر اوہ ایہہ نئیں سی جاندی پئی کس طرح۔

مسیحی سکول وچ اوہ وڈے دن اُتے رُکھاں نوں سجاندے سن، تحفے ملدے، روشنیاں بالیاں جاندیاں تے گیت گائے جاندے، پر ایتھے ایس طرح نئیں سی ہوندا پیا۔ اوہنے کم کرن لئی پیش بند والا کپڑا بنھیا، روٹی لئی آٹا گُنھیا، کھوں تھوں پانی لے کے آئی، تے بکریاں دا دودھ چویا۔ تورا نوں ایہہ کر کے خوشی ہوئی پئی اوہنے آپنی تھکی ہوئی ماں دی مدد کیتی۔ تے ایہہ ویسے وی وڈا دن مناون دا اک طریقہ سی۔ شام ویلے بہت سارے پروہنے آئے۔ سارے رشتے دار تورا نوں فیر ملنا چاہندے سن کیوں جو اوہ بس سکول دیاں چھٹیاں اُتے ای گھر آوندی سی۔

اوہناں پجھیا ہویا خرگوش تے روٹی کھادی۔ ہر کسے نوں ایہہ کھا کے چنگا لگیا۔

کھانے دے بعد اچانک حسن بول پیا:

حسن: ”تورا، سانوں بچے یسوع دی چرنی والی کہانی سنا جیہڑی توں اج سویرے مینوں سنائی سی؟“

ایہدے نال کمرے وچ بڑی چپ ہو گئی۔ مسیح دے ناں نوں اوس گھر وچ چنگا نئیں سی جانیا جاندا ایس لئی سارے لوک تورا نوں غصّے نال ویکھدے پئے سن۔ ارمین، اوہدی رشتےدار کُڑی نے اوہنوں ٹھٹھا ماریا۔

ارمین: ”کیہ تیرے سکول والیاں تینوں ایہہ سکھالیا اے؟ توں ایہدے بارے کدی کجھ نئیں دسیا!“

تورا چپ رہی۔ اوہنوں آپنا آپ کلا لگیا تے اوہنوں ایس طرح لگیا پئی کوئی اوہنوں چنگا نئیں جاندا۔ جس طرح پئی بڑے ورھیاں پہلاں یسوع نوں لگیا سی۔ پر جو کجھ ہویا، اوہ یسوع دے نال ایماندار رہنا چاہندی سی۔ اوہدے پیو نے آکھیا:

پیو: ”ہاں بالکل تورا توں بائبل دیاں کہانیاں اُتے بالکل یقین ناں کریں۔ ساڈا مذہب کجھ ہور اے، ایہنوں پتہ اے۔ میَں ٹھیک آکھیا اے ناں تورا؟“

تورا: ”پر میرا ایمان یسوع اُتے وے۔ اوہ ای اک راہ اے جہدے وسیلے اسی اسمان دی بادشاہی وچ داخل ہو سکدے اَں۔ یسوع نے آکھیا: راہ تے سچیائی تے زندگی میَں اَں؛ میرے بِناں کوئی باپ دے کول نئیں آوندا“ (یوحنا ۴۱: ۶)۔

سارے چپ ہو گئے تے ہر کسے نے اوس ۳۱ سال دی کُڑی ول بڑی بُری نظراں نال ویکھیا۔ تورا نوں ایس گل دا بڑا دُکھ ہویا پئی دوجیا یسوع دا انکار کیتا سی۔ اوہ باہر دوڑ گئی تے رون لگ پئی۔ اوہ کلی سی جیہڑی مالک یسوع نوں پیار کردی سی۔ باقی لوک کیوں یسوع نوں پیار نئیں سن کردے؟ تورا دے کول ایہدا جواب نئیں سی۔

اچانک اوہدا نکا بھرا اوہدے اگے آ کے کھلو گیا۔

حسن: ”تورا، مینوں تیریاں کہانیاں چنگیاں لگدیاں نے۔ میَں بالکل تیرے ورگا بننا چاہندا اَں۔“

تورا ہسی۔ ہن اوہنوں ڈر نئیں لگدا پیا سی۔ وڈے دن دی خوشی ہن اوہدے دِل وچ آئی۔ اوہنے وڈے دن دی خوشی منائی۔ یسوع دے نال آپنے دِل وچ!

لوک: بیان کرن والی، حسن، ارمین، تورا، والد

حقوق: بحق سی ای ایف جرمنی محفوظ نے۔