461. گواچی بھیڈ ۲

روتھ غصے وچ دوڑ گئی۔ ماگریٹ ماسی دے لفظ اوہنو بار بار یاد آوندے رہے: ”میَں تہانوں بورڈنگ سکول وچ گھل دیاں گی۔“

جدوں سورج ڈُب گیا، اوہ گھر تھوں بڑی دور سی تے سوچن لگی پئی اوہ کِتھے سووے۔ شاید قبرستان دے پیچھے گرجے گھر وچ؟

اوہ قبراں دے پتھراں اُتے لنگدی پئی سی تے جدوں اوہنوں اک نِکی صلیب دِسی او ٹھہر گئی۔

روتھ: ” ‘جوہاناکولِنز، عمر ۹ سال۔ اوہ یسوع دے کول ٹُر گئی اے۔‘ جے اج میَں مر جاواں تے کیہ میَں وی یسوع دے کول ٹُر جاواں گی؟“

ڈوہنگی سوچ وچ ڈُبی، روتھ اوتھوں ہولی ہولی ٹُردی رہی (بوہے دی چوں چوں دی واج) تے گرجا گھر وچ گئی۔

فیر اوہ گرجے وچ بہن والی تھاں اُتے لیٹ گئی تے سو گئی۔

اگلے دِن پادری گرجے وچ آیا تے اوہدی نظر روتھ اُتے پئی۔

پادری: ”سلام۔ توں کِتھوں آئی ایں؟“

روتھ نے پادری اُتے بھروسہ کیتا تے اوہنوں ساری گل دسی پئی اوہ کس طرح دوڑی۔

فیر اوہنے پادری دے گھر وچ مزیدار ناشتہ چھیتی چھیتی کھادا اوسے ویلے روبنجر صاحب نے اوہدی ماسی نوں فون کیتا۔ روتھ نے کمرے وچ ایدھر اودھر ویکھیا تے اوہنوں کند اُتے ٹنگی ہوئی تصویر دِسی۔

پادری: ”کیہ تینوں ایہہ تصویر چنگی لگی اے؟ ایہہ یسوع اے، اک چنگا ایالی۔ اوہنے آپنی گواچی ہوئی بھیڈ دا ہتھ پھڑیا ہویا اے۔ ایہہ اینہوں بچانا چاہندا اے۔ ایہہ بھیڈ مینوں کجھ کجھ تیرے وانگ لگدی پئی اے۔“

روتھ: ”کیہ اوہ مینوں وی لبھ لوے گا؟ کیہ میَں وی جوہانا کولِنز وانگ اسمان اُتے جاواں گی؟“

پادری: ”ہاں جی۔ تُساں بس اوہنوں دسنا اے پئی تُوں اوہدے نال تعلق رکھنا چاہندی ایں۔ میَں ایہہ تصویر تینوں دے دینا۔ ہن مُڑ گھر ٹُر جا۔ تیری ماسی نوں تیری فکر ہوندی پئی اے۔“

گھر جاندے ہوئے، روتھ نے آپنی بوجی وچوں اوہ تصویر کڈی۔ جدوں اوہ اوس تصویر نوں ویکھدی پئی سی تے اوہنے دعا کیتی۔

روتھ: ”خداوند یسوع، میَں ایہو گواچی ہوئی بھیڈ اَں۔ مہربانی نال میرے گنا ہ معاف کر دیو۔ میَں تہاڈے نال تعلق رکھنا چاہندی اَں تے اک دن اسمان اُتے تہاڈے نال رہنا چاہندی اَں۔ آمین۔“

یسوع ایس طرح دی دعا دا بڑی چھیتی جواب دیندا اے۔ روتھ نے اوہدا شکریہ ادا کیتا تے خوشی نال ٹپی۔

ماگریٹ ماسی بوہے وچ اوہنوں اڈیکدی پئی سی۔ اوہناں نے اک دُجے نوں گل نال لایا۔

روتھ: ”ماگریٹ ماسی، میَں ساریاں گلاں لئی معافی منگدی اَں۔ مہربانی نال مینوں بورڈنگ سکول وچ ناں گھلیو۔ ہن تھوں میَں چنگی بچی بن جاواں گی۔“

ماگریٹ ماسی: ”میَں تینوں بڑا پیار کردی اَں۔ آؤ اک واری سارا کجھ فیر تھوں شروع کریئے تے چنگی طرح رہئے۔“

روتھ نے واقعی آپنے رویے نوں چنگا کیتا۔ اوہنےبائبل دے وسیلےچنگے ایالی دی واج نوں سُنیا جدوں اوہنے روتھ نال گل کیتی۔ تے فیر اوہنے آپنے غرور دی گل سُننا چھڈ دِتا جیہڑا اوہنوں بھڑکاندا سی۔

روتھ بالکل تبدیل ہو گئی سی۔ کجھ ویلے لئی تے سب کجھ چنگا چلدا رہیا، پر فیر۔۔۔

اگلی کہانی یاد نال سُنیو جہدے وچ میَں تہانوں دساں گی پئی ایہہ دلچسپ کہانی کس طرح اگے ودھی۔

لوک: بیان کرن والی، روتھ، پادری، ماگریٹ خالہ

حقوق: بحق سی ای ایف جرمنی محفوظ نے۔