211. سچائی دا شیشہ

تساں اج کِنی واری شیشہ ویکھیا اے؟

مرقس نے شیشے وچ ویکھیا۔ اوہ حیران ہو گیا۔ پر صابن تے پانی استعمال کرن دے بدلے اوہنے غصّے نال شیشہ جا کے فرش اُتے سُٹ دِتا۔ (شیشہ ٹُوٹن دی واج)

بالکل ایسے طرح لوک بائبل دے نال وی ایہو کجھ کردے نے۔ ایہہ وی اک شیشہ اے جیہڑا بچیاں تے وڈیاں نوں ایہہ وکھاندا اے پئی اوہناں دی زندگی وچ کیہ کجھ غلط ہے۔تے بہت سارے اینہوں پسند ای نہیں کردے۔

یرمیاہ بہت سال پہلاں اک نبی سی، سگوں اسرائیل وچ خدا ولوں بولن والا وی سی، تے اوہدے نال وی ایہو کجھ ہویا۔ اوہدے پیغام وی قوم لئی شیشے وانگ ہوندے سن۔ پر اوہ بدلنا نہیں سن چاہندے۔ خدا نے اوہناں بارے بڑا صبر کیتا۔ پنجاں سال تیک اُڈیک کیتی۔

خدا دی واج: ”یرمیاہ، طومار چُک۔ جو کجھ میَں تینوں آکھدا اَں اوہ لکھ۔ ہو سکدا اے لوک فیر میری گل سنن تے آپنی زندگی وچ جیہڑیاں گلاں ہے نے اوہناں نوں بدلن۔“

ایہہ کم پورا ہون وچ اک مہینہ لگیا۔ یرمیاہ نے خدا دے لفظ آپنے مددگار نوں دسے تے اوہنے ہر اک لفظ لکھا لیا۔

یرمیاہ: ”باروک، آخرکار اساں آپنا کم پورا کر لیا۔ توں جاندا ایں پئی میَں ہیکل وچ نئیں جا سکدا۔ توں اوتھے جا تے ایہہ طومار آپنے نال لے جا۔“

جدوں طومار اُچی واج وچ پڑھےجاندے پئے سن تے میکایاہ نے وی سُنیا۔ اوہنے چھیتی نال بادشاہ دے محل وچ آپنے مُنشی نوں لبھیا۔

میکایاہ: ”باروک نے ہیکل وچ خدا دا کلام پڑھیا اے۔ اسی اوس طرح نہیں رہندے پئے جس طرح سانوں رہنا چاہیدا اے۔ خدا سانوں سزا دین والا اے۔“

مُنشی: ”اوس بندے نوں طوماراں دے نال ساڈے کول لے کے آﺅ۔“

باروک آیا۔ خدا دا کلام مُنشی دے دل لئی اک شیشے وانگ سی۔

مُنشی: ”باروک توں ایہہ سب کجھ کس طرح لکھیا؟“

باروک: ”یرمیاہ نے مینوں لکھوایا تے میَں سیاہی نال اینہوں لکھیا۔“

مُنشی: ”سانوں ایہہ گل بادشاہ نوں دسنی پووے گی۔ باروک، توں یرمیاہ دے نال جا کے لُک جا؛ کسے نوں پتہ نہیں لگنا چاہیدا پئی تُسی دونہویں کِتھے لُکے او۔“

بادشاہ یہویقیم ارام نال آپنے سردیاں والے گھر وچ اگ دے اگے بیٹھا ہویا سی۔

اوہدی زندگی وچ بہت ساریاں ایسیاں گلاں سن جیہڑیاں سیدھیاں تے ٹھیک نہیں سن۔ پر اوہ بالکل وی خدا دی گل نہیں سُننا چاہندا سی۔ جدوں کجھ حِصے پڑھے گئے تے اوہ اُٹھیا، چھُری لئی تے کجھ طومار پاڑ دِتے اوہناں نوں اگ وچ سُٹ دِتا۔ اوہ ایہو کردا رہیا جدوں تیک سارا طومار سڑ نہ گیا۔

لُکن والی تھاں اُتے ہر شے اک واری فیر لکھی گئی۔

خدا دا پیار عظیم اے۔ اوہنے آپنے کلام نوں ساڈے لئی وی لکھیا رہن دِتا۔

میرا تہانوں ایہہ مشورہ اے: بائبل نوں روز پڑھو۔ خود نوں بدلو۔

خدا چاہندا اے پئی تُسی چنگے نظر آﺅ، خاص طور تے تہاڈا دل۔

لوک: بیان کرن والی، یرمیاہ، خدا دی واج، مُنشی، باروک، میکایاہ

حقوق: بحق سی ای ایف جرمنی محفوظ نے۔