Home -- Aymara -- Perform a PLAY -- 007 (On the winner’s side)
7. Diosajj juc’ampi ch’amaniwa
Mä cutimeijja filisteonacajja Israel marca contrajj guerrancaraquiquïnwa. David jupan jilïrinacajja nayrakata nuwasiñancänwa. Awquipasti cunjamäsquisa jilanacapajja uc uñjiriwa qhitatayna uqhamaraqui mank’a apañapataqui.
Cunapachatejja nuwasiñäqui ucjaru purisajja mä wali jach’a jake enemigo taypinjja uñjatayna. Niya quimsa metro tañsänwa. Goliat sutinïnwa. Ajjtcañ arunacampiwa Israel marcaru arnacäna uqhamaraqui maldisiraquïna. Takpach soldadonacajja ajjsarapjänwa. Rey Saulömpacha. ¿Armasjjapjpachänti Diosajj juc’ampi ch’amanïtapjja?
Goliat: “Chhoy, pisi amuyuni israelitanaca, ¿ajjsarajjay mantapjjtamjja? Ja, ja, ja. Jichurojj jamach’in manc’aparuw tucuyapjjama. Jumanacan Diosamajja janiw yanapapquiristamti. Nayasti juc’ampi ch’amanïtwa.”
David: “¿Ist’apjjati cuntejja jiski? Diosa contraw ajjtañ parlasqui. ¿Janit cuns lurapcäta?”
David jupasti cuntejja aca jan respetuni filisteojja burlascänjja isrelitanacat ucatjja wali culiratänwa. Ucasa ucaquïspawa, ucampis jacquir Diosat burlasitapatstï ¡Janipuniwa! Ucasti añchapinïnwa.
Chekpachapiniwa sascäna. Pastor bastonapacwa apjjarusitayna k’orawapampi ucatsti enemigompi jiquisiriw sarawayana.
Diosajj juc’ampi ch’amaniwa. Ucawa juc’ampi ch’amañchana juparojja.
Waljaninacawa cuntejj uñjapcänjja ucjja janiw creyepcänti: Iwijja awatirijja, uca waynuchojja uca wali jach’a nuwasiriruwa jac’achasïna. ¡Wali musparcañänwa!
Goliat jupasti jac’achasitaynawa, juc’ampi juc’ampi…
Goliat: “¿Nayasti anüt-ti lawas ayt’ata jutañamataquisti? ¿Jumanacan Diosamasti imitaniw saquit amuyasta? Ja, ja, ja, ja, nayajja jupat sipansa juc’ampi ch’amanïtwa. Jiwjayämawa.”
David: “Jumasti armampi espadampiw jut-ta, ucampisa Take Ch’aman Diosan sutïpjjaruw qhitiruti jumajja ayniwayctajja nayajj jut-ta. Jupastï jumata sipansti juc’ampi ch’amaniwa. Atipjjämawa uqhamaraqui takeniraquiwa Israel marcajj jacquiri Diosanïtapa yatipjjani.”
David jupasti mä kala irsusi, k’orawaruwa iranti ucjjarusti k’orawrantiwa… (k’orawaw ist’asi)
Goliat: “Aaaaaaaaaaaj…” (jathi jaken liwitat-tapaw ist’asi)
David jupana kalapasti uca jach’a jaken paraparuw wact’atayna. Jiwatawa pamparojj liwitat-tatayna. ¿Diosat burlasitapajja jichhajja juparojj cunjjatänsa? ¿Qhitisa jichhajja juc’ampi ch’amanïnjja? ¡¡Diosawa juc’ampi ch’amanejja!!
Uñstirinaca: Parliri, Goliat, David
© Copyright: CEF Germany