751. آستر اپنی جان خطرے وچ پاندی اے ۲

ہامان بس مطلبی قسم دا بندہ ای نہیں سی، اوہ بڑا مغرور سی۔ وڈے فارسی بادشاہ اخسویرس نے اوہنوں مُلک دا دوجے درجے دا ساریاں نالوں بہتا اختیار والا بندہ مقرر کیتا۔ ہر کوئی اوہنوں سیس نواندا سی تے اوہدی تعظیم کردا سی۔ پر مردکی ایس طرح نہیں سی کردا، جیہڑا پئی ملکہ آستر دا متریا پیو سی۔ اوہنے کدی اوہنوں سیس نہیں نوایا سی۔ ہامان غُصّے نال بھر گیا۔

ہامان: ”توں حکم منن تھوں انکار کردا پیا ایں! توں میرے اگے سیس کیوں نہیں نواندا؟“

مردکی: ”کیوں جو میَں یہودی اَں تے میَں بس خدا نوں ای سیس نواندا اَں۔“

ہامان: ”تینوں پچھتانا پوے گا!“

ہامان نوں بڑی بے عزتی محسوس ہوئی۔ تے اوہدے دل وچ اک شیطانی منصوبے نے جنم لیا۔

ہامان: ”میَں اینہوں جانوں مار دیاں گا۔ تے بس اینہوں ای نہیں، سگوں اوہناں ساریاں یہودیاں نوں جیہڑے فارس دے ۷۲۱ صوبیاں وچ رہندے نے۔ میَں اوہناں نوں نیست کر دیاں گا۔“

ہامان نے یہودیاں دے بارے وچ بادشاہ نال بُری طرح گل کیتی، تے اوہدے جھوٹ نے بادشاہ نوں آپنے شیطانی منصوبے لئی منا لیا۔ ہن اوہ جو چاہندا سی کر سکدا سی۔ ہامان نے آپنے ساریاں نالوں تیز گھوڑیاں اُتے آپنے سنیہا دین والیاں نوں گھلیا؛ اوہ آپنے نال مُہر والے خط لے کے ہر شہر وچ گئے۔ ہر پاسے اوہدا خوف ناک حکم جاری ہو گیا۔

سنیہا لے کے جان والا: ”بادشاہ سلامت دے حکم دے مطابق، دسمبر دی ۳۱ تاریخ نوں، ہر یہودی، بندہ، بی بی تے بچہ قتل کر دِتا جائے۔ کسے نوں وی جیوندا ناں چھڈیا جائے! ہر کسے نوں مار مُکایا جائے تے اوہناں دی ہر اک شے نوں وی!“

ایس حکم نے بڑا خوف پھیلا دِتا۔ یہودیاں نے افسوس والے کپڑے پا لئے۔ اوہ روئے تے خدا نوں پکاریا۔

مردکی نے چھیتی ای محل وچ عرض گھلی۔ کیوں جو ہن بس اک ای اے جیہڑی اوہدی مدد کر سکدی اے، اوہدی مترئی کُڑی، ملکہ آستر۔

مردکی: ”آستر، تینوں بادشاہ دے کول جانا چاہیدا اے! اوہدے اگے عرض کر پئی اوہ سانوں جیوندا رہن دیوے۔“

آستر: ”میَں ایہہ نہیں کر سکدی۔ کسے نوں وی اجازت نہیں پئی اوہ بادشاہ دے کول جاوے جد تیک پئی اوہ آپ ناں بلائے۔ جے فیر وی میَں گئی، تے میَں مر سکدی اَں۔“

مردکی: ”توں چپ ناں رہو! ہو سکدا اے پئی ایہو سبب اے پئی توں ملکہ ایں۔ تے سانوں بچا سکیں۔“

آستر: ”میرے لئی دعا کرو۔ میَں بادشاہ دے کول جاواں گی۔ جے مینوں مرنا پیا، تے میَں مر جاواں گی!“

بالکل آستر وانگ، یسوع نے آپنے آپ نوں پیش کیتا۔ اوہ تیار سی پئی اوہ مر جاوے تاں پئی اسی لوک بچ سکئے تے سدا دی حیاتی حاصل کر سکئے۔

آستر نے آپنے ساریاں نالوں سوہنے کپڑے پائے۔ تیزدھڑکتے ہوئے دل نال اوہ تخت والے کمرے تیک اپڑی۔ بادشاہ نے ویکھیا اوہ آوندی پئی اے۔ کیہ اوہ اوہنوں آون دے گا یا۔۔۔

ایہہ میَں تہانوں اگلی کہانی وچ دساں گی۔

لوک: بیان کرن والی، ہامان، مردگی، آستر، سنیہا لے کے جان والا

حقوق: بحق سی ای ایف جرمنی محفوظ نے۔