451. فتحمند یسوع ۲

شیطان چالاک تے بُرا اے۔ اوہنوں ماڑا ناں سمجھنا۔ اوہ کوئی پریاں دی کہانی دا کردار نہیں اے۔ بائبل وچ ایہہ آکھیا گیا اے پئی اوہ شیر ببر وانگ گجدا پھیردا اے، تاں پئی کسے نوں برباد کر سکے۔

بچہ: ”میَں کدی سوچیا وی نہیں سی پئی اوہ سچ وچ کوئی وجود رکھدا اے۔“

اوہ خدا دا دشمن اے جیہڑا پوری کوشش کردا اے پئی اسی خدا تےبھروسہ ناں کرئیے۔

کیہ تہانوں اوہدی پہلی چال یاد اے؟

بچہ: ”اوہ شک تے بے یقینی دا بیہ بیجدا اے۔“

تُسی ہوشیار رہو پئی اوہ تہاڈے نال ایسا کجھ نہیں کردا۔ ایس جال وچ ناں پھسیو۔ خداوند یسوع مسیح اگے مِنت کرو پئی اوہ تہاڈی راکھی کرے۔ کیوں جو اوہ شیطان اُتے فتح پا چُکیا اے۔

خدا دا پُتر اوہدا ساریاں نالوں وڈا ویری سی۔ شیطا ن بالکل ایہو چاہندا سی پئی اوہ یسوع نوں ساڈی خاطر صلیب اُتے جان ناں دیوے۔ اوہ چاہندا اے پئی سانوں منع کرے پئی اسی خدا تھوں سدا دی حیاتی حاصل ناں کرئیے۔ ایس لئی اوہ مخالف ہو گیا۔

شیطان: ”جے توں خدا دا پُتر ایں، تے اینہاں روڑیاں نوں آکھ پئی ایہہ روٹیاں بن جان۔ جے توں خدا دا پُتر ایں تے ساریاں نالوں اُچے مینار تھوں چھال مار دے۔ خدا تینوں بچا لوے گا۔“

یسوع فتح مند اے! اوہنوں کوئی لوڑ نہیں سی پئی اوہ شیطان نوں ایہہ ثبوت دیندا پئی اوہ واقعی خدا دا پُتر اے۔ ایہدے بعد، دشمن نے آپنی دوجی چال چلی: اوہنے وڈا وعدہ کیتا۔

شیطان: ”میَں تینوں پوری دُنیا دا اختیار دے دیاں گا جے توں مینوں سجدہ کریں تے میری پرستش کریں۔“

یسوع: ”اے شیطان! دور ہو، کیوں جو کلام وچ لکھیا اے: توں خداوند آپنے خدا دی پرستش کر تے اوہدی خدمت کر۔“

یسوع ای فتح مند اے! اوہ بس اک گل بولدا اے تے شیطان نوں دوڑنا پیندا اے۔

یسوع ای فتح مند اے! ایس لئی شیطان اوہدے نال نفرت کردا اے۔

جدوں یسوع صلیب اُتے ٹنگیا ہویا سی، تے دشمن نے آپنا آخری ہتھیار استعمال کیتا۔

شیطان: ”جے توں واقعی خدا دا پُتر ایں، تے صلیب اُتوں تھلے اُتر آ۔“

جے یسوع نے ایس طرح کر دِتا ہوندا، تے اسی سدا لئی گواچ گئے ہوندے۔ تے فیر ساڈے گناہواں دی کوئی معافی ناں ہوندی۔ تے فیر خدا دے نال سدا دی حیاتی وی ناں ہوندی۔

پر یسوع نے خود نوں مضبوط کیتا۔ اوہ فتح مند اے! صلیب اُتے اوہنے گناہ، موت تے شیطان نوں ہرا دِتا۔ اوہدا جیو اُٹھنا اک ثبوت اے۔

جدوں تُسی یسوع اُتے یقین کردے او، تے تُسی فتح مند وَل ہوندے او۔

ڈرو ناں، کیوں جو یسوع ای فتح مند اے!

سدا اوہدا ناں پکارنا یاد رکھو! اوہدے کولوں دُعا منگو، اوہ تہاڈی راکھی کرے گا۔

لوک: بیان کرن والی، بچہ، شیطان، یسوع

حقوق: بحق سی ای ایف جرمنی محفوظ نے۔