6. ۹ توں ۱

شاگرد یسوع دے نال بڑی دُور دُور تک ٹر کے جاندے سن۔ جدوں تسی بائبل پڑھدے ہو، تسی وی اوہناں دے نال پورا اِسرائیل پھر سکدے ہو۔ شاگرداں نے بہت برکت حاصل کیتی: اوہ اوتھے ای سن جدوں یسوع نے بیماراں نوں چنگا کیتا، جدوں اوہنے آپنے اسمانی باپ کولوں دُعا منگی، جدوں بس اوہدے آکھیاں ای طوفان تھم گیا۔

لوقا دی اِنجیل وچ، یسوع اک دھوڑ نال بھری ہوئی سڑک اُتے آپنے شاگردوں دے نال ٹردا اک نکے جیہے پنڈ وچ آیا جیہڑا سامریہ تے گلیل دے وچکار سی۔

کوڑھی: ’’یسوع، مالک، ساڈی مدد کر!‘‘

ایہہ اوہی دس لوک نے جنہاں نوں یسوع دا پتہ لگیا تے او اوہنوں پُکارن لگے۔

جیویں ای شاگرد نیڑے آئے، اوہناں نے ویکھیا کہ پئی ایہہ دس لوک تے کوڑھی نے۔ کوڑھ اک بہت ای خوفناک بیماری اے جہدے شروع وچ کھل اُتے داغ جیہے بندے نے تے فیر پورے پنڈےنوں خراب کر دیندے نے۔ کوڑھیاں نوں علاقے وچوں باہر کڈھ دتا جاندا سی۔ اوہناں نوں غاراں وچ رہنا پیندا سی یا فیر کھُلے میداناں وچ۔ اوہناں نوں اجازت نئیں سی کہ اوہ کسے نوں ہتھ وی لا سکن۔ ہر کوئی اوہناں کولوں دُور رہندا سی۔ پر یسوع اینج نئیں سی کردا۔

کوڑھی: ’’یسوع ساڈی مدد کرو!‘‘

یسوع: ’’کاہن دے کول جاؤ۔ اوہنوں آپنا آپ وکھاؤ۔‘‘

یسوع نے ایہہ کہہ کے اوہناں لوکاں نوں اک ایسے بندے کول گھلیا جیہڑا کہ گرجے وچ عبادت کراوندا سی تے طبیب وی سی۔ کاہن ای بس اک ایسا بندہ سی جیہڑا کہ ایہہ دس سکدا سی کہ ایہہ دس لوک چنگے ہو گئے نے۔

اوہ دس لوک چھیتی نال گئے تے جدوں اوہ جا رہے سن تے اوہناں نوں لگیا:

کوڑھی: ’’اسی ٹھیک ہو گئے آں! ساڈی کھل فیر توں ٹھیک لگن لگ پئی اے!‘‘

اک بندہ فیر پرتیا تے دوڑ کے خُداوند یسوع دے کول گیا۔ جدوں او یسوع دے کول اپڑیا تے اوہنوں سِجدہ کیتا۔

کوڑھی: ’’مالِک تیرا شُکر ہووے، مینوں فیر توں چنگا کرن لئی! تیرا بہت بہت شُکریہ!‘‘

یسوع نے اوس خوشی نال بھرے بندےنوں پوچھیا تے ہسیا:

یسوع: ’’کی مَیں پورے دس لوکاں نوں چنگا نئیں کیتا؟ دوجے ۹ بندے کتھے نے؟ کی بس اکو بندہ میرا شُکر کرن واپس آیا اے؟‘‘

جی ہاں، صرف اکو بندشُکر گُزار سی۔

تے تسی؟ تسی اج کس گل لئی یسوع دا شُکر ادا کر سکدے ہو؟

لوک: بیان کرنے والی، ۲ کوڑھی، یسوع

حقوق: بحق سی ای ایف جرمنی محفوظ نے۔