52. بڑی افسوسناک کہانی

کیہ تُسی جاندے ہو اوہ کون سی جہدی کدی سالگرہ نئیں آئی؟

آدم تے حوّا! اوہ پیدا نئیں سن ہوئے، سگوں خدا نے اوہناں نوں بنایا سی۔ اوہ اوہدے نال گلاں کردے سن تے اوہدی واج سن سکدے سن۔ تے کدی کوئی جھگڑا نئیں سی ہویا تے کدی کوئی بیمار نئیں سی ہویا تے کوئی پریشان وی نئیں سی ہویا۔ خدا نے اوہناں نوں بہت کجھ دِتا سی، تے اوہنے اوہناں نوں آکھیا سی:

خدا نے آکھیا: ”تسی باغ دے ہر رُکھ دا پھل کھا سکدے ہو، پر جیہڑا رُکھ باغ دے وچ کار لگیا اے اوہدا پھل نہ کھانا۔ سگوں اوس رُکھ نوں ہتھ وی نہ لاونا نئیں تے تُسی مر جاﺅ گے۔“

ہر شے نال اوہناں دا تعلق سی بس ایس اک شے دے علاوہ۔ آد م تے حوّا خدا نوں پیار کردے سن ایسلئی اوہدی گل خوشی نال مندے سن۔

پر فیر اچانک کوئی آگیا جیہنوں ایہہ چنگا نہیں سی لگدا پئی کسے دا وی تعلق خدا نال چنگا ہووے۔ اوہ شیطان سی۔ اوہ پہلاں فرشتہ ہوندا سی۔ اوہ غرور کردا سی تے خدا وانگ بننا چاہندا سی، ایس لئی اوہنوں اسمان اُتوں سُٹ دِتا گیا۔

شیطان: ”کیہ ایہہ گل سچ اے پئی خدا نے آکھیا اے پئی تُسی ایس رُکھ دا پھل نئیں کھا سکدے؟“

حوّا: ”اسی ہر رُکھ دا پھل کھا سکدے اَں سوائے ایس اک دے، نئیں تے اسی مر جاواں گے۔“

شیطان: ”تُسی نئیں مرو گے۔“

خدا دا دشمن پرانا جھوٹ بولن والا اے۔ اوہ خدا دیاں گلاں نوں جھوٹا دس کے شک پیدا کردا اے۔حوّا دے دل وچ خدا دا حکم موجود سی، پر اوہنے شیطان دی گل من لئی، غصّہ، خیر۔ اوہنے جدوں اوس پھل نوں رُکھ اُتے ویکھیا تے اوہنو چنگا لگیا، ایس لئی اوہنے اوہدے وچوں لیا، کھادا تے آدم نوں وی دِتا، جیہڑا اوہدے نال کھلوتا سی۔

نافرمانی کرنا گناہ اے، تے گناہ دا اخیر بہت خوف ناک ہوندا اے۔ سب کجھ پہلاں ورگا نئیں سی رہیا۔

خدا نے آکھیا: ”آدم، توں کِتھے ویں؟“

جدوں خدا نے اوہنوں بلایا، اوہ ڈرے ہوئے سن، ایس لئی اوہ خدا کولوں لُکے ہوئے سن۔ اوہناں دونہواں اک دوجے نوں قصوروار ٹھرایا۔ گناہ سانوں خوشی نئیں دیندا، تے سچے خدا نوں فیر اوہناں نوں سزا دینی پئی۔ گناہ دی مزدوری موت اے؛ ایہد مطلب اے پئی اسی سدا لئی خدا توں وکھرے ہو گئے اَں۔ آدم تے حوّا نوں باغ نوں چھڈنا پیا۔

دُنیا وچ پہلی واری ایڈا بُرا کم ہویا: گناہ دُنیا وچ آ گیا۔ اوس ویلے توں ہر کوئی گنہگار اے۔ پر خدا محبت اے، فیر وی اوہنے اک نجات دین والے دا عہد کیتا، اک ایسا بچاون والا جیہڑا ساڈے گناہ آپنے نال لے جاوے گا تے سانوں اک نواں آغاز دیوے گ۔

اگلے ڈرامے وچ تہانوں پتہ لگے گا پئی اوہ بچاون والا کون اے۔

لوک: بیان کرن والی، شیطان، حوّا، خدا دی واج

حقوق: بحق سی ای ایف جرمنی محفوظ نے۔