41. بادشاہ لئی چنڈ

بہت پہلاں دی گل اے ڈاکو انگلستان اُتے چڑھ آئے۔ اوہناں ظالم سمُندری ڈاکواں نے خوف تے ڈر پا دِتا۔ اوہناں چوریاں کیتیاں، لوکاں نوں قتل کیتا تے گھراں تے گرجا گھراں نوں ساڑ دِتا۔

پہلاں تے الفریڈ بادشاہ اوہناں نوں ہرا دیندا سی، پر فیر بادشاہ اوہناں کولوں ہار گیا۔ اوہدے ویریاں نے اوہنوں گھیر لیا تے اوہنوں آپنا قلعہ چھڈ کےبھجنا پیا۔

اوہ آپنا روپ وٹا کے ایدھر اوہدھر پھردا رہیا تےآپنے آپ نوں جنگلاں وچ لُکایا۔ اک نامعلوم بادشاہ! اوہنے بس کجھ لوکاں نوں ایہہ دسیا پئی اوہ کون اے۔ تے اوہناں وچوں اک ایالی الفرک سی۔ اوہنے کدی آپنے بادشاہ نوں دھوکھا نئیں سی دِتا۔ اوہنے بادشاہ نوں آپنی جھوگی وچ آون دی دعوت دِتی، پر اوہدی بیوی نوں وی ایہہ نئیں سی پتہ پئی اوہناں دا مہمان کون اے۔ اوہ حیران سی پئی اوہناں دا مہمان ٹیبل اُتے بیٹھا کسی ڈوہنگی سوچ وچ رہندا اے۔ اوہ ایہہ نئیں سی جاندی پئی اوہ اک بادشاہ اے۔

اک د ن اوہنوں غصّہ آیا:

عورت: ”میَں بہت سہہ لیا اے! تُو سارا دِن ایتھے بیٹھا رہنا ایں تے کوئی کم کار نئیں کردا۔ جا، جا کے ویکھ پئی کِتے کیک نہ سڑ جائے۔ میَں کھنوں توں پانی لے کے آونی آں۔“

الفریڈ بادشاہ چپ کر کے چولھے دے کول چلا گیا۔ اوہدی سوچ بس اوہدے ویری سن۔ ہو سکدا اے پئی کوئی ہور راہ ہووے جہدے نال اوہ اوہناں نوں ہرا سکدا۔

اوہدے مُنہ اُتے چپیڑ پئی تے اوہ یک دَم آپنے خیالاں وچوں نکل کے ہوش وچ آیا۔ اوہ عورت مڑ کے آ گئی سی، کیک سڑ گیا سی تے بہت بھیڑی بو آ رہی سی۔

عورت: ”سُست آدمی! چلا جا ایتھوں!“

اوسے ویلے اوہدا گھر والا وی بورچی خانے وچ آ گیا۔

آدمی: ”اے عورت، بادشاہ نال ایس طرح گل کرن دی تیری ہمت کس طرح ہوئی! کیہ توں اوہنوں نئیں پچھانیا؟“

فیر کی ہویا سانوں نئیں پتہ۔ پر ایس نامعلوم بادشاہ دی ایہہ کہانی مینوں خداوند یسوع دی یاد دواندی اے۔ اوہدے نال تے ایس توں وی بُرا سلوک ہویا۔ ایسے طرح ای سی کہ نئیں؟ جدوں اوہ ۰۰۰۲ سال پہلاں چرنی وچ پیا ہویا سی، کسے نے اوہنوں نہ پچھانیا۔ بعد وچ لوک اوہنوں آپنے آسے پاسے وی نئیں سن ویکھنا چاہندے۔

اوہنوں قصور وار سمجھیا گیا تے اوہدے نال نفرت کیتی گئی تے اوہنے صلیب اُتے آپنی جان دے دِتی۔

تے اج؟ اج وی اوہ بہتیاں لئی نامعلوم بادشاہ اے۔

کیہ تُسی اوہنوں آپنی زندگی دا بادشاہ بنن دیو گے؟

لوک: بیان کرن والی، عورت، آدمی

حقوق: بحق سی ای ایف جرمنی محفوظ نے۔