951. جہڑا وی ٹووا کھودے ۴

ہامان، اوہ خوفناک انسان، بس مر ای گیا۔ اوہ ایہہ ہوندا نہیں ویکھ سکدا سی: پوری قوم دے اگے اوہنے مردکی نوں عزت دینی سی۔ جدوں پئی اوہ اوہنوں فارس وچ سارے یہودیاں دے نال پھا لانا چاہندا سی۔

پر اوہنے نہیں سوچیا پئی خدا اوہناں دے وچکار آن کھلوتاسی، خدا جیہڑا آپنے لوکاں نال پیار کردا اے تے اوہناں دی راکھی کردا اے۔

کاش ہامان نوں ایہہ پتہ ہوندا پئی اگے کیہ ہون والا اے۔ پر اوہ بڑی شیخی پیا ماردا سی پئی اوہنوں دو وار بادشاہ دے نال شام کھان دی دعوت ملی ہوئی اے۔ ملکہ آستر آپنے مہماناں لئی تیاری کر چُکی سی۔ محل وچ، کوئی ایہہ نہیں جاندا سی پئی آستر مردکی دی مترئی دھی اے۔ تے اج شام، باداشاہ اخسویرس اوہدی ہر خواہش پوری کرن والا سی۔

بادشاہ: ”ملکہ آستر، کیہ تیری کوئی خواہش ہے؟ میَں تینوں آپنی ادھی بادشاہت تیک دے سکدا اَں۔“

آستر: ”میرے بادشاہ سلامت، مہربانی کر کے مینوں تے میرے لوکاں، یہودیاں نوں ساڈی حیاتی بخش دیو۔ کوئی سانوں مار مکانا چاہندا اے۔“

بادشاہ (دُکھی ہو کے): ”کون وے ایہہ؟ کِتھے وے اوہ بندہ؟“

آستر: ”ہامان ای ساڈا ساریاں نالوں بھیڑا ویری اے۔“

بادشاہ غُصّے نال بھر گیا۔ تے ہامان آپنی حیاتی لئی مِنت کرن لگا۔ پر اوہدی ناں سُنی گئی۔ سپاہیاں نے اوہدیاں اکھیاں نوں کج دِتا تے اوہنوں دور لے گئے۔ ہامان بالکل اوسے پھا نال مریا جیہڑا اوہنے مردکی لئی تیار کیتا سی۔

کُڑی: ”خیر، جیہڑا کوئی کسے دوجے لئی کھڈا کڈھدا اے اوہ آپ اوہدے وچ ای ڈگدا اے۔“

ہامان کوئی پہلا بندہ نہیں سی جیہڑا یہودیاں نوں مار مکانا چاہندا سی۔ تے اوہ آخری وی نہیں سی۔ پر خدا آپنے لوکاں دی راکھی کردا اے۔ اوہنے ایس بھیڑے منصوبے نوں ناکام کر دِتا۔ ایہہ خدا دا ای منصوبہ سی، پئی یسوع، ساڈا بچان والا، یہودیاں وچوں جمے۔ تے خدا دی جیہڑی مرضی اے، اوہ ای پوری ہو کے رہندی اے۔

سگوں بادشاہ اخسویرس وی اوہدے ہتھ وچ سی۔

بادشاہ: ”بادشاہ دا ایہہ حکم اے: میری بادشاہت وچ ہر یہودی نوں ایہہ حق اے پئی اوہ آپنی راکھی لئی لڑ سکدا اے۔“

بادشاہ دا سنیہا لے کے جان والیاں نے ساریاں نالوں تیز گھوڑیاں اُتے پینڈا کر کے ایہہ نواں قنون ملک دے ہر صوبے وچ جا کے دس دِتا۔ ہامان، یہودیاں دے ساریاں نالوں بھیڑے دشمن نے، دسمبر دی ۳۱ تاریخ نوں سارے یہودیاں نوں مار مکان دا دن ٹھہرایا سی، پر ایہہ دن خوشی دا دن بن گیا کیوں جو یہودیاں نے آپنے دشمناں اُتے فتح پا لئی سی۔

اوہناں نے آپنی جِت نوں ۴۱ تاریخ نوں منایا۔ یہودیاں نے اک دوجے نوں تحفے دِتے تے غریباں وچ کھانا ونڈیا۔

غم وچوں خوشی نکل کے آئی۔ خدا نے آپنے اسرائیلی لوکاں نوں چُنیا تے اوہناں دی حفاظت کیتی۔

اوہدی گل سدا اخیری ہوندی اے۔

لوک: بیان کرن والی، بادشاہ، آستر، کُڑی

حقوق: بحق سی ای ایف جرمنی محفوظ نے۔