401. فرعون ضدی اے ۴

ہارون: ”موسیٰ، کیہ ایہہ توں ای ایں؟ شالوم۔“

موسیٰ: ”ہارون، مینوں یقین نئیں ہوندا پیا۔ اساں اک دوجے نوں ۰۴ ورھیاں توں نئیں ویکھیا۔“

دونہواں بھائیاں نے اک دوجے نوں گل نال لایا۔ اوہ بڑے خوش سن۔

خدا دے کول اوہناں دے کرن لئی کم سی۔

موسیٰ نے اسرائیلیاں دے اگے ٹُرنا سی تاں جو اوہ مصریاں دی غلامی تھوں رہائی پاﺅن۔ تے اوہدے بھرا نوں ایہہ کم کرن لئی آپنے بھرا دی مدد کرنی سی۔ اوہناں فرعون دے کول جانا سی، اوس ظالم بادشاہ دے کول۔ ایہدے لئی اوہناں نوں بڑے حونصلے دی لوڑ سی۔

موسیٰ: ”فرعون، خداوند اسرائیل دا خدا تینوں ایس طرح آکھدا اے: میرے لوکاں نوں جان دے۔“

فرعون: ”خداوند؟ اوہ کون اے؟ میَں اوہنوں نئیں جاندا۔ تے میرا کوئی ارادہ نئیں پئی اسرائیلیاں نوں جان دواں۔ چلے جاﺅ ایتھوں!“

فرعون خدا دی گل نئیں سُننا چاہندا سی۔

فرعون: ”سست لوکو! جاﺅ مُڑ آپنے کم اُتے۔ تہانوں ایٹاں بناون لئی ہور تُوڑی نئیں ملے گی۔ تُسی آپ او لبھنا۔ پر تہانوں اونیاں ای ایٹاں بنانیاں پین گیاں جنیاں تُسی پہلاں بناوندے او۔“

منن والی گل نئیں! ہن حالات پہلاں تھوں وی وگڑ گئے سن۔ اسرائیلی موسیٰ دے نال لڑن لگے۔ موسیٰ نے دعا کیتی۔

موسیٰ: ”خداوند، توں مینوں فرعون دے کول کیوں گھلیا؟ ہن ساڈے حالات ایڈے وگڑ گئے نے پئی ایس تھوں پہلاں کدی ایس طرح نئیں ہوئے۔ توں آپنے لوکاں نوں رہا کرن لئی کجھ وی نئیں کیتا۔“

خُدا نے آکھیا: ”توں چھیتی ای ویکھیں گا پئی میَں فرعون دے نال کیہ کرن والا اَں۔ میَں اوہنوں مجبور کر دواں گا پئی اوہ تہانوں جان دیوے۔ میَں جیہڑا عہد کیتا اے، میَں اوہنوں پورا کراں گا۔ میَں تہانوں رہا کراواں گا۔“

خدا نے مصریاں لئی بڑیاں ساریاں آفتاں گھلیاں۔

مُنڈا: ”اک وار اوہنے سارا پانی خون وچ بدل دِتا سی۔ پر فیر وی فرعون نے ایہدے اُتے یقین نہ کیتا۔“

کُڑی: ”اخ، تے فیر سارا مُلک ڈڈواں نال بھر گیا۔ سگوں اوہ فرعون دے منجے اُتے وی آگئے سن۔“

مُنڈا: ”تے فیر اک خوفناک طوفان نے ساریاں فصلاں نوں برباد کر دِتا۔“

کُڑی: ”تین دِن تیک گھپ ہنیرا ہویا رہیا۔ پر ایہناں ساریاں کرامات دے بعد وی فرعون راضی نہ ہویا۔ اوہ بڑا ضدی سی۔“

مُنڈا: ”ایہہ کڈی چنگی گل اے پئی ایہناں آفتاں نے اسرائیلیاں نوں کوئی نقصان نہ دِتا۔“

فیر خدا نے ساریاں آفتاں وچوں بُری آفت نوں گھلیا۔

خدا نے آکھیا: ”فرعون تے مصر اُتے ہن اک ہور آفت آوے گی، تے فیر تُسی لوک رہا ہو جاﺅ گے۔“

موسیٰ آخری واری فرعون دے کول گیا۔

موسیٰ: ”اج راتی خدا مصر دی دھرتی وچوں لنگے گا تے ہر خاندان دا پہلوٹھا بچہ مر جاوے گا۔ ایتھوں تیک پئی تیرا مُنڈا وی۔ فیر تینوں پتہ لگ جاوے گا پئی اسرائیل جیوندے خدا دی خدمت کردا اے۔“

کیہ فرعون نوں آخر ایہہ پتہ لگیا؟ تہانوں اگلی کہانی وچ ایہہ پتہ لگے گا۔

لوک: بیان کرن والی، موسیٰ، ہارون، فرعون، خُدا، مُنڈا، کُڑی

حقوق: بحق سی ای ایف جرمنی محفوظ نے۔