07. اےقابلِ قدر اے

پطرس: ”کِنا ویلا کھنج گیا اے۔ اسی ساری رات شکار کردے رہے اَں تے کجھ وی ہتھ نئیں لگا۔“

ہارے ہوئے مچھی دے شکاری آپنی کشتی لے کے کنڈے وَل اپڑ آئے۔ اوہناں ساری رات ہار ویکھی سی۔ تاں وی اوہناں نے آپنے جالاں دی مرمت تے صفائی کرنی سی۔ اچانک ای گلیل دی جھیل دے کول لوک کٹھے ہو گئے۔ ایتھے یسوع اے! اوہ اوہنوں سُننا چاہندے سن؛ کیوں جو اوہدیاں گلاں سدا ای قیمتی ہوندیاں سن۔ اوہدیاں گلاں ہر کسے نوں نواں حوصلہ تے زور دیندیاں سن۔ لوک اک دوجے نوں دھکے ماردے پئے سن تے یسوع دے کول بالکل تھاں نئیں سی۔

یسوع: ”پطرس مینوں آپنی کشتی وچ آون دیو تے اینوں ایس کنڈے تھوں کجھ دُور لے چلو۔“

ہن ہر کسے نوں اوہدی واج آ رہی سی تے او اوہنوں ویکھ وی سکدے سن۔ جدوں اوہنے لوکاں نوں کلام سُنا لیا تے اوہنے پطرس وَل ویکھیا۔

یسوع: ”پطرس، سانوں سمندر وچ لے چلو۔ تے آپنے جال سُٹو۔ اسی مچھی پھڑاں گے!“

مینوں بڑی خوشی ہوندی جے اوس ویلے میَں پطرس دا مُنہ ویکھ سکدا۔ ہن اسی مچھی پھڑن چلے اَں؟ دن ویلے مچھی گرمی تھوں بچدی اے تے جھیل دے بالکل تھلے ٹُر جاندی اے۔ کوئی وی مچھی تر کے جال وچ نئیں آون والی۔ پطرس جاندا سی پئی یسوع کہدے بارے وچ گل کردا پیا اے۔ آخر اوہ اک مچھیرا سی۔

پطرس: ”خداوند، اساں ساری رات مچھی دا شکار کیتااے تے اک وی مچھی نئیں پھڑی گئی۔“

اسی یسوع نوں آپنی ہار بارے دس سکدے اَں۔

پطرس: ”پر کیوں جو تُساں آکھیا اے ایس لئی میَں جال سُٹاں گا۔“

پطرس نے کِڈا چنگا کم کیتا۔ اوہ خود نوں کجھ نئیں سمجھدا۔ اوہنے یسوع دی گل سُنی تے اوہ جِت گیا۔ اوہ دوجے مچھیریاں دے نال کوشش کرن لئی اگے ودھیا تے جال سُٹے۔ اک کرامات ہوئی! اوہناں اینیاں مچھیاں پھڑیاں پئی اوہناں دے جال پاٹن لگ پئے۔

پطرس: ”یوحنا، یعقوب، ساڈی مدد کرو! اسی کلے ایہہ نئیں کر سکدے۔“

اوہناں نے آپنے بیلیاں نوں اشارہ کیتا تے مچھیاں نال دو کشتیاں بھر لیاں۔ اینیاں مچھیاں ہو گیاں پئی کشتیاں ڈوبن لگ پیاں۔

پطرس نوں یسوع بڑا چنگا لگیا۔ اوہنوں لگیا پئی اوہ اوہدے نالوں بڑا وکھرا اے۔

پطرس: ”خداوند، میرے کولوں دُور ٹُر جاوو، کیوں جو میَں گنہگار اَں۔“

کِڈی ودھیا گل اے پئی یسوع پطرس کولوں دُور ناں گیا، سگوں اوہنوں معاف کر دِتا۔

یسوع تہاڈے لئی وی ایسے طرح کرے گا تے میرے لئی وی جدوں اسی آپنے گناہ اوہدے اگے مناں گے۔

یسوع: ”پطرس، خوف ناں کر۔ اج تھوں توں آدم گیر بنیں گا۔“

اک نوی نوکری۔ پطرس نوں ہن یسوع لئی بندیاں دا شکاری بننا پوے گا۔ میری سمجھ وچ ایہہ بڑی وڈی گل اے پئی یسوع بڑے وڈے تے اُچے لوکاں نوں نئیں بلاوندا، سگوں تہاڈے تے میرے تے پطرس ورگے عام لوکاں نوں، اوہ لوک جیہڑے اوہدیاں گلاں نوں سُندے نے تے فیر ایہہ تجربہ کردے نے پئی اوہدے نال رہن وچ ای فیدا اے۔

لوک: بیان کرن والی، پطرس، یسوع

حقوق: بحق سی ای ایف جرمنی محفوظ نے۔