42. بہت ودھیا

پنجویں جماعت وچ ہر کوئی ڈریا ہویا سی۔ اُستاد نے بچیاں نوں ریاضی دے ٹیسٹ واپس دِتے۔ کئیاں نے سُکھ دا ساہ لیا۔ اُوہناں دےنمبر ایڈے بُرے نئیں سی جِنا اوہناں سوچیا سی۔ بائبل وچ میں اک نمبر لبھیا جہدے لئی بہت سارے بچے سُفنا ویکھدے نے: پہلا نمبر!

کیہ تہانوں پتہ اے پئی ایہہ کِتھے ملے گا؟ اوس صفحے اُتے جِتھے خدا سانوں دسدا اے پئی اوہنے سارا کجھ کس طرح بنایا۔ اوہدیاں بنائیاں شیواں نوں پہلا نمبر دِتا جا سکدا اے۔

میَں اکثر حیران ہوندی آں پئی خدا نے کِنی چنگی طرح ہر شے نوں بنایا: چوہا، بلّی، کتّا- نکیاں نکیاں کیڑیاں، زور آور ہاتھی- تماشے کردا ہویا باندر، ساریاں مچھیاں تے پنچھی۔

ڈنگراں نوں بناون توں پہلاں خدا نے رُکھاں تے بوٹیاں نوں ودھن دِتا تاں جو ڈنگر اوہناں نوں کھا سکن۔ تے نالے بہت سارے پھُل: چھوٹے پھُل تے وڈے سورج مُکھی دےپھُل، سوہنے گلاب تے خوشبو دار بنفشی پھُل۔ ہر کسے نوں خدا نے بی وی دِتے تاں جو اوہ ہور ودھ سکن۔ بناون والے نے ہر شے دا بہت ای دھیان رکھیا۔ پہلاں اوہنے لو بنائی کیوں ھجو لو دے بغیر زندگی ممکن نئیں سی۔

خدا نے سب کجھ بنایا، کہہ تسی جاندے ہو کس طرح؟

اوہدے آکھن نال۔ اوہنے آکھیا: پئی لو ہو جا، تے لو ہو گئی۔ جیہڑی شے وی تہانوں نظر آوندی اے خدا دے آکھن نال بنی اے۔ مڈھ توں ایہو جیہا کجھ نئیں سی جہدے توں کجھ اُگدا یا کجھ پیدا ہوندا۔

نہ کوئی حادثہ نہ کوئی دھماکا۔ بس خدا قادرِ مطلق ای اینہاں شیواں توں کجھ نہ کجھ پید کر سکدا اے جنہاں توں کجھ وی نئیں بنایا جا سکدا۔

تے فیر ساریاں نالوں چنگی شے بنائی گئی۔

خدا نے آکھیا آﺅ انسان نوں بناونے اَں۔ تے اوہنے آدمی تے عورت نوں بنایا آپنی چنگی سوچ نال۔

تے چھیویں دِن خدا نے ہر شے نوں ویکھیا جیہڑی اوہنے بنائی سی تے خوش ہویا، کیوں جو اوہ سب کجھ بہت چنگا سی۔ تے اوہنے سب کجھ آدم تے حوا نوں دے دِتا۔

باغ وچ خدا دے نال اوہناں دی زندگی بہت چنگی گزردی پئی سی۔ جدوں تک اوہناں نال اک دِن اک خوف ناک واقع ہویا۔

اگلی کہانی وچ میَں تہانوں اج تک دی سب توں دُکھی کہانی دے بارے دساں گی۔

لوک: بیان کرن والی

حقوق: بحق سی ای ایف جرمنی محفوظ نے۔