71. اینا بہادر ۲

مینہ تھم گیا۔ بہت چنگا! دِناں وچ ای باغ، پیلیاں تے میدان فیر ہرے ہو گئے تے سوکڑا مُک گیا۔

کنے ایڈے ویلے سر مینہ گھلایا؟ کون ہر شے نوں جیوندا رکھدا اے؟

اسرائیل وچ اک ویلا ایسا آیا جدوں ہر کوئی ایہہ بھُل گیا پئی بس اِکو خُدا اے، جیہڑا مینہ گھلدا تے سورج لشکاوندا اے۔ لوکاں نے لکڑ تے وٹیاں دے بت بنائے۔ اوہناں بُتاں وچوں اک نوں اوہناں بعل آکھیا، تے اوہناں نے وچار کیتا پئی اوہ مردہ بت اوہناں نوں پھل تے بھیڈ بکریاں دے اِجڑ دیوے گا۔

ایس جھوٹھے وچار نوں ودھاوا دین والا اخی اب بادشاہ سی۔ ایہہ سب اودوں شروع ہویا جدوں اوہنے اک بُری عورت نال ویاہ کر لیا۔ ایزبل اک ایسے علاقے وچوں آئی سی جِتھے کوئی سچے خُدا نوں نئیں سی مندا۔ اوہ آپنے نال بعل دی پوجا کرن دا مذہب وی اسرائیل وچ لے کے آئی۔ اخی اب بادشاہ نے وی بعل دی پوجا شروع کر دِتی تے اوہدی ساری قوم نے وی اوہدی پیروی کیتی۔

نئیں، ہر کسے نے نئیں۔ ایلیاہ نے ایس طرح نئیں کیتا۔ اوہ اوہناں وچوں سی جیہڑے خدا دے نال وفا دار سن۔

اک دِن اوہنے دُعا کیتی:

ایلیاہ: ”اے خُدا! تین ورے مینہ نہ وسائیں تاں جو ایہہ ساری قوم جان لوے پئی تُوں ای اوہ خدا ایں جیہڑا مینہ وسا سکدا ایں تے اناج پیدا کر سکدا ایں۔“

ایلیاہ ایس گل لئی تیار سی پئی خدا ہر اک اُتے ظاہر کرے گا پئی اوہ ای کلا خُدا اے۔ ایلیاہ چھیتی نال بادشاہ دے محّل وچ پہنچیا۔ اوہ بنا اجازت دے دربار وچ چلا گیا تے بادشاہ دے تخت اگے پہنچ گیا، جِتھے اخی اب بادشاہ بیٹھا سی۔

خوف کھادے بنا اوہ بادشاہ دے اگے کھلوتا تے آکھیا:

ایلیاہ: ”خُدا واقعی موجود اے، اگلے ورے مینہ دا چووا وی نئیں وسے گا۔ تے ایسے توں تینوں پتہ لگ جاوے گا پئی بس اِکو جیوندا خُدا اے۔“

تے ایس توں پہلاں پئی اخی اب بادشاہ کجھ آکھدا، ایلیاہ غیب ہوگیا۔ تے فیر؟

تُسی ایہہ سُن سکدے ہو پئی فیر کی ہویا جے تُسی اگلا ڈرامہ وی سُنو۔

لوک: بیان کرن والی، ایلیاہ

حقوق: بحق سی ای ایف جرمنی محفوظ نے۔