21. نا ختم ہون والی خوشی

رات دے ویلے اسمان تاریاں نال بھریا سی۔ پنڈ وچ وی بڑا ہنیرا سی۔ باہر میدان وچ ایالی آپنیاں بھیڈاں دی راکھی کردے پئے سن۔ ایہہ اک مشکل کم سی۔ پر اوہناں دی ایڈی عزت نئیں سی۔ لوک اوہناں توں نفرت کردے سن جس طرح پئی ڈاکواں تے چوراں نال کردے نے۔

کیہ اوہناں دی مدد کرن والا یا اوہناں نوں بچاون والا کوئی نئیں سی؟ کیہ اوہناں نے من لیا سی پئی اوہ دوجے لوکاں نالوں بہت گھٹ عزت والے لوک نے؟

اوہ تھک کے درخت دے مڈھ نال ٹَو لا کے بہہ گئے۔ پر اچانک اوہ سب اُٹھ کھلوتے۔ ادھی رات نوں اچانک اوہناں اُتے ایک نور چمکیا۔ بہتی لو توں اوہناں نے آپنیاں اکھاں نوں کجیا تاں جو ا وہ چنگی طرح ویکھ سکن۔ تے اوہ بہت ای ڈر گئے۔

خدا دا پیغام دین والا، اک فرشتہ، اسمان توں دھرتی اُتے اوہناں دے کول آیا، ایالی بہت ای دھیان نال فرشتے نوں ویکھدے سن جہیڑا کہ اسمان توں آیا سی۔

فرشتہ: ’’ڈرو ناں! کیوں جو ویکھو مَیں تہانوں اک خوشی دی خبر دیندا اَں جہدے توں ہر کوئی خوش ہو جاوے گا۔ اج دے دن داؤد دے شہر وچ تہاڈے لئی اک بچاون والا پیدا ہویا اے؛ اوہ مسیح اے، ساڈا مالک۔تہاڈے لئی ایہہ اک نشان ہووے گا: تسی اک بچے نوں کپڑے وچ لویٹیا تے کھُرلی وچ پیا ویکھو گے۔‘‘

ایالیاں نے بڑے دھیان نال سُنیا۔ اک بچاون والا! اوہناں دے دل خوشی نال بھر گئے۔ خُدا اوہناں نوں نئیں سی بھُلیا۔

تے فیر اسمان وچ بہت سارے فرشتے اوس کرامات بارے خُدا دی وڈیائی کرن لگے پئی بچاون والا پیدا ہویا اے۔

ایالی گدام وَل گئے تے مریم تے یوسف تے بچے یسوع نوں لبھیا۔ اوہ بہت ای خوش ہوئے جدوں اوہناں نے یسوع نوں ویکھیا جہیڑا اوہناں دا بچاون والا سی۔

ایہہ وی سچ اے: کہ بچاون والا تہاڈے لئی وی پیدا ہویا سی۔ مالک یسوع نوں آکھو پئی اوہ تہاڈی زند گی وچ آوے، تے تہانوں ایہو جہی خوشی ملے گی جہیڑی سدا تہاڈے نال رہوے گی۔

لوک: بیان کرن والی، فرشتہ

حقوق: بحق سی ای ایف جرمنی محفوظ نے۔